Depýtattar mınıstrge osy suraqty kóldeneń tartty
Májilis Tóraǵasy Nurlan Nyǵmatýlınniń jetekshiligimen ótken palatanyń keshegi jalpy otyrysynda EKSPO-2017 halyqaralyq mamandandyrylǵan kórmesine qatysty zań jobasy zańnamalyq aınalymǵa alyndy. Sondaı-aq, depýtattar nazaryna agroónerkásip kesheni men memlekettik organdardyń quzyretin zańǵa táýeldi deńgeıde bekitý máseleleri usynyldy.
Depýtattar mınıstrge osy suraqty kóldeneń tartty
Májilis Tóraǵasy Nurlan Nyǵmatýlınniń jetekshiligimen ótken palatanyń keshegi jalpy otyrysynda EKSPO-2017 halyqaralyq mamandandyrylǵan kórmesine qatysty zań jobasy zańnamalyq aınalymǵa alyndy. Sondaı-aq, depýtattar nazaryna agroónerkásip kesheni men memlekettik organdardyń quzyretin zańǵa táýeldi deńgeıde bekitý máseleleri usynyldy.
Kún tártibine shyǵarylǵan «Qazaqstan Respýblıkasynyń keıbir zańnamalyq aktilerine agroónerkásip kesheni máseleleri boıynsha ózgerister men tolyqtyrýlar engizý týraly» zań jobasyna Májilistiń bir top depýtaty bastamashy bolypty. Qysqasha baıandama jasaǵan Májilis depýtaty Roman Kım 12 zańnamalyq aktige, sonyń ishinde 4 kodeks pen 8 zańǵa ózgerister kózdelip otyrǵandyǵymen bólisti.
Atap aıtqanda, zań jobasy agroónerkásip kesheni men veterınarııa salasyn jetildirýge baǵyttalǵan. Jalpy, zań jobasy Memleket basshysynyń zaemdardy memlekettik saqtandyrý men kepildendirýdiń júıesin endirý týraly tapsyrmasyna sáıkes ázirlenip otyr eken. Bul jeke ınvestorlardyń agroóndiristik keshendegi oryn alýy múmkin táýekelderin tómendetýi tıis. Sonymen qatar, jańa óndiris qýatyn qurǵan nemese baryn jańǵyrtýǵa jibergen shyǵynnyń bir bóligin ótep berý kózdeledi. Budan basqa, qaıta óńdeýshi kásiporyndardyń aýyl sharýashylyǵy shıkizatyn satyp alýǵa arnalǵan shyǵyndaryn sýbsıdııalaý qarastyrylǵan.
Ásirese, elimizdiń azyq-túlik qaýipsizdigin qamtamasyz etýde mańyzdy sanalatyn qant qyzylshasy men sútti satyp alýdy sýbsıdııalaý basty nazarda bolmaq. Baıandamashynyń sózine qaraǵanda, osynyń ózi túpki ónimniń baǵasyna, onyń naryqtaǵy básekelestigine áser etedi. Túptep kelgende, mundaı tetik ishki naryqta tutynylatyn otandyq ónimniń úlesin arttyryp, azyq-túlik qaýipsizdigin nyǵaıtýǵa ózindik yqpalyn tıgizetin bolady.
R.Kım, sonymen qatar, zań jobasymen veterınarlyq-sanıtarlyq qaǵıdalardy buzǵany úshin ákimshilik jaýaptylyqty qataıtý usynylyp otyrǵandyǵyn da jetkizdi. Jáne de aýyl turǵyndaryn qoldaýdyń jańa sharalary da qarastyrylyp, agroóndiristik keshenge barýshylardy «Dıplommen – aýylǵa!» baǵdarlamasymen qoldaý bolary aıtylmaı qalmady. Aýyl sharýashylyǵy maldaryna qajetti buıymdar men veterınarlyq anyqtamalardy jáne pasporttardy tegin berý nazardan tys qalmaǵan.
Depýtattar zalda otyrǵan Aýyl sharýashylyǵy mınıstri Asylbek Mamytbekovke birqatar suraqtar qoıyp úlgerdi. Májilis depýtaty Rozaqul Halmuradov óz saýalynda atalǵan sala jumysyna kóńili tolmaıtyndyǵyn ashyq bildirdi. Depýtat Úkimet Prezıdenttiń aýyl ınfraqurylymyn damytýǵa qatysty tapsyrmasyn qashan, qalaı júzege asyrmaqshy? degen suraqty tótesinen qoıdy. Zań jobasymen aýylda ósken jastardyń aýyl sharýashylyǵy mamandyǵyn alǵandaryn aýylǵa qaıtarý úshin memleketten qarjy bólý qarastyrylyp otyrǵandyǵyn kóldeneń tartqan depýtat ony bylaısha túıindedi: «Negizgi sebep – aýylda turmys-tirshilik úshin qajetti ınfraqurylymnyń joqtyǵy. Qalada qalaı ómir súrip jatsa, aýylda sondaı ómir súretin bolsa, mundaı sharanyń keregi joq edi».
Etke qatysty qoıǵan Vladıslav Kosarevtiń suraǵyna oraı jaýabynda mınıstr qara maldyń analyq basyn ustaýǵa 18,5 myń teńge sýbsıdııalaý nátıjesinde Qazaqstan alǵash ret syrtqa sıyr etin shyǵara bastaǵandyǵyn jetkizdi. Osylaısha, talqydan ótken zań jobasy birinshi oqylymda maquldandy.
Otyrysta budan basqa «Qazaqstan Respýblıkasynyń keıbir zańnamalyq aktilerine memlekettik organdardyń quzyretin zańnamalyq jáne (nemese) zańǵa táýeldi deńgeıde bekitý máseleleri boıynsha ózgerister men tolyqtyrýlar engizý týraly» zań jobasy ekinshi oqylymda qoldaý taýyp, Senatqa joldandy. Zań jobasymen memlekettik organdardyń quzyreti el Konstıtýsııasynda, konstıtýsııalyq zańdarda, sondaı-aq, zańǵa táýeldi aktilerde de belgilenýi múmkindigi qarastyrylady. Osy rette qoldanystaǵy zańnamalyq aktilerden memlekettik organdardyń mańyzdy qoǵamdyq qatynastardy rettemeıtin fýnksııalaryn alyp tastaý usynylyp otyr. Sóıtip, memlekettik organdar qyzmetiniń tıimdiligin arttyrý úshin quqyqtyq salany jetildirýge múmkindik berý kózdelgen.
Jalpy otyrys sońynan depýtattar ádettegideı saýaldaryn joldady. Máselen, depýtat Irına Aronova Úkimet basshysyna joldaǵan saýalynda bylaı deıdi: «Qashan Úkimet Prezıdenttiń eskertpelerine qulaq asady? Ázirge eshqandaı naqty qadam kórip turǵan joqpyz! Al eńbekti qorǵaý jáne qaýipsizdik erejelerin buzý qapalandyrady. Ústimizdegi jyldyń 9 aıynda elimizdiń óndiris oryndarynda 1200 qaıǵyly oqıǵalarǵa jol berilgen». Áriptesi Egor Kappel О́ńirlik damý mınıstrligi Aýyldyq jerlerdi damytý baǵdarlamasyn júzege asyrý jónindegi jumystardy atqarýǵa asyǵar emes degen turǵydaǵy renishin jasyrmady. Depýtattyń sózine qaraǵanda, atalǵan baǵdarlama qazirgi tańda tek 30 paıyzǵa ǵana oryndalýda eken.
Asqar TURAPBAIULY,
«Egemen Qazaqstan».
