Qazaqstannyń dúnıejúzi elderimen mádenı-gýmanıtarlyq yntymaqtastyǵy jyldan-jylǵa jandana túsýde. Sonyń bir aıǵaǵy 2012 jylǵy maýsymda Memleket basshylarynyń ýaǵdalastyǵyna sáıkes 2013 jylǵy qarasha aıynda Qytaıda Qazaqstannyń mádenıet kúnderin ótkizý josparlanǵan bolatyn. Al 2014 jyly Qazaqstanda QHR mádenıet kúnderi ótkizilmek.
Qazaqstannyń dúnıejúzi elderimen mádenı-gýmanıtarlyq yntymaqtastyǵy jyldan-jylǵa jandana túsýde. Sonyń bir aıǵaǵy 2012 jylǵy maýsymda Memleket basshylarynyń ýaǵdalastyǵyna sáıkes 2013 jylǵy qarasha aıynda Qytaıda Qazaqstannyń mádenıet kúnderin ótkizý josparlanǵan bolatyn. Al 2014 jyly Qazaqstanda QHR mádenıet kúnderi ótkizilmek.
Buǵan, árıne, eń aldymen eki el basshylarynyń jemisti kezdesýleriniń nátıjesi zor yqpal etip otyrǵandyǵy aıtpasaq ta túsinikti. Árisin aıtpaǵanda, osy jylǵy qyrkúıek aıynda Qytaı Halyq Respýblıkasynyń Tóraǵasy Sı Szınpınniń Qazaqstan Prezıdenti Nursultan Nazarbaevtyń shaqyrýy boıynsha bizdiń elimizge jasaǵan memlekettik saparynyń qorytyndysy joǵarydaǵy qaǵıdattyń shyndyqqa janasymdy ekenin taǵy bir márte dáleldedi.
Ústimizdegi jyldyń sáýir aıynda Beıjińde Qazaqstan kınosynyń aptalyǵy ótti. Jalpy, Qazaqstannyń Qytaıdaǵy elshisi N.Ermekbaevtyń aıtýy boıynsha, Qazaqstan men Qytaıdyń túrli shyǵarmashylyq ujymdary eki eldiń aımaǵynda ótetin halyqaralyq sharalarǵa únemi qatysyp keledi. Bizdiń elimiz kıno kórsetý jáne kitap basý salasynda da birlese áreket etýde. Máselen, Qazaqstanda qytaı jazýshysy Lo Gýanchjýannyń romandary qazaqshaǵa aýdarylý ústinde. Bul atalǵan shara Qazaqstannyń Mádenıet jáne aqparat mınıstrligi men Qytaı Halyq Respýblıkasynyń Baspasóz, radıo, kıno jáne televıdenıe, BAQ memlekettik basqarmasynyń kómegi arqasynda júzege asqany belgili. Osy oraıda «Meniń balalyq shaǵymnyń aspany», «Jaýjúrek myń bala», «Mahabbat tálkegi», «Joıýshy» jáne «Shal» sekildi qazaqstandyq fılmder kórsetildi.
Sol sııaqty, jaqynda Qytaı Halyq Respýblıkasynyń astanasy – Beıjiń qalasynda qytaı tilinde jaryq kórgen «Elin súıgen, eli súıgen Elbasy. Qazaqstan Respýblıkasynyń Prezıdenti týraly ocherkter» kitabynyń tusaýkeseri ótti. Kitap avtory – Qazaqstan Respýblıkasy Prezıdenti Keńsesiniń basshysy, saıası ǵylymdar doktory, professor Mahmut Qasymbekov naqty faktilerden quralǵan materıaldardyń, biregeı muraǵattyq qujattardyń negizinde Memleket basshysynyń kópqyrly tulǵasyn adam, azamat, Elbasy retinde kórsete bildi.
Sarapshylardyń sózderine qaraǵanda, Qazaqstannyń Qytaıdaǵy Mádenıet kúnderine óte úlken mańyz berildi. Bul turǵyda alǵanda eki eldiń arasyndaǵy ózara mádenı baılanys jaıy jáne eki jaqty dostyq qarym-qatynas barysy ashyq aıtyldy. Sonyń aıǵaǵyndaı, Qytaıdyń Memlekettik úlken teatrynda Qazaqstannyń klassıkalyq mýzykasynyń maqtanyshy – Qurmanǵazy atyndaǵy akademııalyq orkestri óner kórsetse, quryltaıshysy «N.Nazarbaev mádenıet, bilim jáne áleýmettik baǵdarlamalar qory» bolyp tabylatyn Qazaqstan bı óneriniń ulttyq kórki – Astana Ballet horeografııalyq ujymynyń halyqaralyq tusaýkeseri ótti. Sóıtip, atalǵan ujym álemdik jáne ulttyq horeografııalyq ónerdiń dástúrli artyqshylyǵyn aıshyqtaıtyn aıryqsha konserttik baǵdarlamany usyndy. Sondyqtan da bul keshke kelgen qytaı kórermenderi keremet kúıge bólendi.
Gala-konsert baǵdarlamasyna qazaqstandyq jáne álemdik mýzykalyq mádenıet murasynan klassıkalyq, sondaı-aq qazirgi tańdaǵy operanyń shyǵarmalary, vokaldy-aspapty jáne bı óneri qamtyldy. Buǵan qosa, Qytaıdyń Ulttyq murajaıynda Mádenıet jáne aqparat mınıstrliginiń uıymdastyrýymen «Uly dala qazynasy» atty kórmeniń ashylý saltanaty ótti. Altyn buıymdardan turatyn bul eksponattar kesheni álemdi Táýelsiz Qazaqstanymyzdyń baı mádenı murasymen, tarıhymen, ónerimen jáne dástúrlerimen tanystyryp, shynaıy da mazmundy málimetter berdi.
Endi budan keıin Qurmanǵazy atyndaǵy akademııalyq orkestriniń gala-konserti Úrimji qalasynda odan ári jalǵasyn tappaq.
Aleksandr TASBOLATOV,
«Egemen Qazaqstan» –
Beıjińnen.
--------------------------------------
Sýretti túsirgen
Erlan OMAROV,
«Egemen Qazaqstan».
