Oqıǵa • 30 Qyrkúıek, 2020

Internasıonalmen qoshtasatyn kez keldi

14 ret kórsetildi

Jýyrda «Egemende» Petropavl qalasynda áli kúnge Internasıonal kóshesiniń bar ekendigi, biraq qazaq halqynyń ulttyq kósemderi Álıhan Bókeıhan, Ahmet Baıtursynuly jáne taǵy basqa Alash ardaqtylarynyń atynda birde-bir kóshe joq ekendigi jazyldy («Egemen Qazaqstan», «Petropavl Internasıonaldy ulyqtap otyr. Nege?», 23.09.2020 j).

Shynynda da biz búgingi urpaqty patrıottyq rýhta tárbıeleýde óziniń halqyna ólsheýsiz eńbek sińirgen erlerdi ulyqtaı alyp otyrmyz ba? Eger qala kósheleri solardyń atymen atalsa – jetkinshekter óz halqynyń múddesin qor­ǵaǵan erlerdi de tereńirek bilip ósken bolar edi. Onyń ústine ulylarymyzdyń qandaı qyzmet atqarǵanynan habardar etetin jasóspirimderge arnalǵan sharalar ótkizilip tursa jaqsy emes pe. Tipti qala kóshelerine ulylarymyzdyń attary berilse, olardyń kim ekenin bilýge, ózdiginen zert­teýge umtylatyny sóz­siz. Máselen, biz Ahmet Baıtur­syn­uly «ult ustazy» dep ataımyz. Al onyń qandaı ustaz bolǵanyn jastar túgil keıbir úlkenderdiń ózderi bile bermeıdi. Arab qarpiniń negizinde qazaqtyń alǵashqy tól álipbıin jasap, qazaq tili bilimin de alǵash aınalysqa engizgendikten ony ult ustazy deımiz. Bastaýysh, baıandaýysh, tolyqtaýysh, pysyqtaýysh degen sııaqty tamasha termın­derdi de til bilimine sol kisi engizdi. Osyndaı adamdary­myz elimizdiń barlyq burysh­tarynda tereńnen nasıhattalyp, jastarǵa tanystyrylyp otyrý kerek qoı. Sonda patrıottyq sezim tereńdep, jetkinshekterimizdiń boıynda ulttyq rýh oıana túspes pe?

Qazir bizde Álıhan Bó­keı­hannyń, Mirjaqyp Dý­latov­tyń jáne basqa Alash ar­daqtylaryn «bizdiń jer­les­terimiz emes» dep syrtqa tebetin keri túsinik qalyp­tasqan. Qazaq­stannyń qazir­gi terrıtorııa­syn aıqyn­dap, Lenınniń aldynda qazaq jeri­niń kólemin dáleldep, kartasyn syzyp bergen Álimhan Ermekov sııaqty erlerimizdiń erliginen múlde beıhabar urpaq ósip keledi. Sondyqtan maqa­lada aıtylǵan Alash ardaq­tylaryn ardaqtap, olardyń atyna kóshe attaryn berý týraly pikirdi tolyq qoldaımyn. 

Árıne, bir kezde biz kommý­nıstik partııanyń murattaryn boıymyzǵa sińirdik. Sol úshin proletarlardyń halyqaralyq gımni Internasıonaldy da jattadyq. Barlyq álemde sosıalızm jeńetinine sendik. Biraq kommýnıstik partııa­nyń ıdeıasy sóz júzinde durys bolǵanymen is júzinde onyń ómirde tolyq iske aspaıtynyn kózimizben kórdik. Sosıalızmniń de barlyq álemde kúshpen ornaýy – zor­lyq ekenin, sondyqtan onyń kúresine shaqyrǵan Inter­nasıonaldyń da durys emes ekenin tanydyq. Biz qazir demokratııalyq muratty qoldaıtyn el ornatýdy aldy­myzǵa maqsat etip otyrmyz.

Demokratııalyq jolmen damý – barlyq zorlyqqa, qarýly kóteriliske qarsy. Qoǵam­daǵy saıası jáne áleý­mettik-ekonomıkalyq saıasatty saılaýda kópshilik daýys alǵan partııa aıqyndaıdy. Qazirgi bılik partııasy Nur Otan ha­lyqtyq demokratııalyq partııasy. Ol kommýnıstik ınternasıonaldy moıyndamaıdy, maqsaty eldi demokratııalyq jolmen damytý. Endeshe In­ter­nasıonal degen sekildi uǵym­­dardy búgingi jastyń sana­­synan yǵystyra berýimiz kerek. Olardy ardaqtap, qala­myzdaǵy eń kórnekti kóshesiniń atyn berip qoıýdyń ózi – bizdiń maqsatymyzdyń ózin dúbára halge ushyratady emes pe? Sondyqtan ondaı ataýlardy batyl ózgertýge tıispiz.

 

Eskendir ELEÝSIZOV,

Soltústik Qazaqstan oblystyq Ardagerler keńesiniń tóraǵasy

 

PETROPAVL

 

Sońǵy jańalyqtar

Namysyn tý etken

Rýhanııat • Keshe

Uqsas jańalyqtar