• 08 Qarasha, 2013

Senator óz ustanymyna senimdi

287 ret

kórsetildi

2 mın

oqý úshin

Egemen Qazaqstan

Keshe «Qazmedıa ortalyǵynda» Prezıdent Nursultan Nazarbaevtyń Úkimettiń keńeıtilgen otyrysynda bergen tapsyrmalary men aıtqan syn-eskertpeleri týraly óz oıyn senator Sergeı Plotnıkov ortaǵa saldy.

Qarjy jáne bıýdjet komıtetiniń múshesi Sergeı Plotnıkov óziniń sózinde Prezıdent jarııalaǵan «Qazaqstan-2050» Strategııasyn qoldaýǵa baǵyttalǵan pikirleri men eldegi makroekonomıkalyq turaqtylyqty saqtaý úshin ne isteý kerektigin ortaǵa saldy. Sonyń ishinde ol Joldaýdyń elimizdiń makroekonomıkalyq jaǵdaıyn ońaltýǵa arnalǵanyn, ásirese, bıýdjettik saıasatty jetildirýdi kózdeıtinin jetkizdi. Osy maqsatty oryndaý úshin eki túrli tujyrym qabyldandy. Onyń birinshisi – jańa bıýdjettik saıasat jáne ekinshisi – nátıjelilikti baǵdarǵa ala otyryp, memlekettik josparlaý júıesin jetildirý.

Birinshi tujyrym eldiń qarjylyq jaǵdaıyn turaqtandyrýdy, bıýdjettik shyǵyndardyń nátıjeliligin arttyrýdy maqsat etedi; ekinshi tujyrym teńgerimdi strategııalyq, ekonomıkalyq, bıýdjettik josparlaýdy jetildirýge baǵyttalǵan. Osy maqsattardy oryndaý úshin birneshe zańnamalyq qujattarǵa ózgerister men tolyqtyrýlar engizý jónindegi zań jobalary ázirlendi. Qazir olar Senattyń komıtetterinde talqylaný ústinde, dedi ol.

Sondaı-aq, senator óziniń sózinde makroekonomıkalyq turaqtylyq pen memlekettik bıýdjettiń teńgerimdiligin saqtaý úshin Úkimet ne isteýi kerek degenge toqtalyp, ol úshin bıýdjet saıasaty tapshylyqty azaıtýǵa baǵyttalǵan erejeni nyq ustanǵany maqul ekenin aıtty. 2020 jylǵa deıingi aralyqta bıýdjet tapshylyǵyn IJО́-niń 1,4 paıyzyndaı deńgeıge túsirý kerek. Ulttyq qordyń qarajaty tek shekteýli kólemde jumsalǵany durys. Bıýdjettiń shyǵys bóliginiń artýy tek salyqtyń kóbeıýi esebinen bolǵany jón. 2018 jylǵa deıin aǵymdaǵy shyǵystardyń bárin munaı sektorynyń tabysynan emes, basqa túsimder arqyly jabý josparlanyp otyr, dedi ol.

Jaqsybaı SAMRAT,

«Egemen Qazaqstan».