«Aýyl saqshysy» – jańa teleserıal

11 qarashadan bastap «Qazaqstan» ulttyq telearnasy «Aýyl saqshysy» atty jańa teleserıal kórsete bastaıdy. Endi bul premera «aıaq-astynan qaıdan paıda bola ketti, kimder jasady» degen máselege toqtalaıyq...

11 qarashadan bastap «Qazaqstan» ulttyq telearnasy «Aýyl saqshysy» atty jańa teleserıal kórsete bastaıdy. Endi bul premera «aıaq-astynan qaıdan paıda bola ketti, kimder jasady» degen máselege toqtalaıyq...

Sábıt Qurmanbekov – qyl­qalamyn qaıqy qylyshtaı sermep júrgen tanymal karı­ka­týrashy-sýretshi. Elimizde esimi karıkatýrashy-sýretshi, kıno-qoıýshy qyzmetimen tanymal bolǵan ónerli azamat bul jo­ly kınoserıaldyń rejısseri tuǵyrynda jańa qyrynan ta­nylmaq. Vıktor Klımov – Qa­zaq­stan kórermenine derekti fılmderdiń avtory retinde ta­nylǵan belgili tele-jýrnalıst, qazir kıno óndirisine, onyń ishinde teleserıaldarǵa pro­dıýserlik etip keledi. Jańa sa­la­da «qalamyn synaǵan» onyń «Bizdiń zamanymyzdyń qahar­many» fılmi kórermenin beıjaı qaldyrmaǵany kópshilikke málim. Beıbarys Jumanııazov – mýzykant. Ataqty «Úrker» tobynyń baıyrǵy múshesi. Búginde kınoǵa ssenarıı jazýmen aınalysady. Al Beıbarystyń «Úrker» tobyndaǵy áriptesi, kompozıtor Aıdos Saǵa­tov biz aıtyp otyrǵan osynaý «Aýyl saqshysy» teleserıalynyń mýzykasyn jazyp shyqty.

Mine, ózderińiz baıqaǵandaı, serıaldyń avtorlary, bir qara­ǵanda, kıno áleminde kezdeısoq bas qosqan, lıberal, memlekettik arnanyń kirpııaz talaptaryn túsinip te bilmegen jandar sekildi. Alaıda, osynaý jańa týyndydan Ulttyq arnanyń jańa zamanǵy jańasha izdený tájirıbesine esh nuqsan kelmegeni anyq. «Qa­zaqstan» 11 qarashadan bastap ımporttyq serıaldardy taǵy da belgili mólsherde qysqartýǵa májbúr... О́ıtkeni, ekranǵa «Aýyl saqshysy» shyǵady! «Aýyl saq­shysy» fılminiń bul qadamy otandyq kıno óndirisiniń búgingi bulqynysynan syr tartqandaı. Bul qubylysty Ulttyq arnanyń memlekettiń basty saıasaty – aýyl­ǵa betburys baǵytymen úndesýi dese de jarasamdy bolyp tur.

Fılmniń oqıǵasy qarapaıym jelide qurylǵanmen, búgingi kúngi kókeıkestiligimen, zárýligimen kórermenin birden baýraıdy. Ardy aıaqqa basqan attóbelindeı azǵantaı top paıdaly qazba tabylǵan aýyldyń aınalasynda teris pıǵyldy oımen «órmekshiniń toryn quryp» álekke túsedi. Kezekti tekserý isimen qaladan aýylǵa az ýaqytqa atbasyn burǵan polısııanyń jas leıtenanty bul jerde kezdeısoq kidiredi. Árı­ne, árıne, áýelde ...aýyldyń qyzyǵy men shyjyǵyna batyp, dıirmenniń tasyndaı shyr aınalyp esinen tanǵan qala balasy tezirek bul ıirimnen qutylýǵa asyqqan. Alaıda, leıtenantty kidirtken talshybyqtaı maıysqan aýyl qyzyna degen shoqtaı sezim edi... Qyzmettik borysh pen jeke ómirindegi sezim áýezderi aınalyp kelip naǵyz búgingi kúnniń qaharmany – polısııa pogonyndaǵy batyrdyń bolmysy somdalady. Kórermen osyny baıqaıdy.

Shynaıy aýyl ómiri týra­ly serıaldy «Qazaqstan» ult­tyq arnasynyń qazirgi saıası jaǵdaıattardyń pernesin dóp basýy demeske amalyń joq. Barshaǵa málim, bıylǵy 1 qarashadan bastap, elimizdiń kóshelerine ámbebap polııasııa qyzmetkeri shyqty. Sonyń izin ala Ulttyq arna ol qyzmetkerdiń qandaı bolý kerektigi jaıynda kórkem shejire usynyp otyr. Shynaıy úılesimdilik! Aqıqaty solaı, eshqandaı da pafossyz beınelenetin teleserıal polısııa qyzmetkerin ádettegideı qamshynyń astyna ala bermeı, onyń kimge de bolsa dos, joldas, qajetti kezinde qolushyn beretin kómekshi ekenin kórsetedi. Aýyl saqshysynyń (polısııa ınspektorynyń) mindeti – halyqty qorǵaý, halyqqa qolushyn berý ekenin qaıtalap eske salady!

Sonymen, qazirgi qazaq kınoserıaldary qatarynda óziniń jaıdary da ýytty syqaq-ázilge baı kórinisterimen, aınalaıyn aýyldyń búgingi ómiri men onyń qarapaıym adamdarynyń beıne-bolmysyn aına-qatesiz somdaǵan fılm kórermenge jol tartty. Shyǵarmanyń kúlli jelisin kóz aldymyzdan tizbektep ótkizgen bizdiń oıymyz osyndaı. Al siz­ge, qurmetti kórermen, «Aýyl saq­shysy» serıalynyń premerasy «Qazaqstan» ulttyq arnasy­nan 11 qarashada 19.30 saǵatta kórse­tiletinin eskertkimiz ǵana keledi.

Talǵat SÚIINBAI,

jýrnalıst.

ALMATY.