Fılıppın memleketinde oryn alǵan «Haııan» taıfýny 220 myń halqy bar Takloban qalasynyń tas-talqanyn shyǵardy. Bul týraly ITAR-TASS habarlady.
Búgin Fılıppınniń tótenshe jaǵdaılar jónindegi ulttyq agenttigi apat saldarynan 100-den astam adamnyń qaza bolǵanyn málimdedi.
Alapat taıfýnnyń qaýipinen Fılıppın memleketinde jalpy 1 mıllıonnan asa adam qaýipsiz jerge kóshirildi. Daýyl epısentrindegi jeldiń jyldamdyǵy saǵatyna 275 shaqyrymdy qurap, al ekpini kúsheıgen kezde saǵatyna 310 shaqyrymǵa deıin jetýde. Apat aımaǵyndaǵy teńizdiń tolqyndary 6 metr bıiktikke deıin kóterilgen.
Tabıǵı apattyń negizgi salmaǵy Fılıppın ortalyǵyndaǵy Samar men Leıte araldaryna kelip tústi. Jergilikti BAQ ókilderiniń málimdeýinshe, bul aımaqtarda elektr jelisi tolyǵymen úzilgen. Sondaı-aq birqatar kólik pen temirjol qozǵalystary toqtap, 450-den asa áýe sapary keıinge qaldyrylǵan.
Aıdar О́risbaev.
