AQSh budan 53 jyl buryn Kýbaǵa qarsy jarııalaǵan sanksııasyn qaıta súzgiden ótkizedi. Bul týraly TREND aqparattyq portaly habarlady.
Florıda shtatynda bolǵan jıynda: «Biz óz saıasatymyzdy jasampazdyqpen júrgizýimiz kerek», – dep sózin bastaǵan prezıdent Barak Obama AQSh-Kýba qarym-qatynasyna qatysty óz oıyn bildirdi.
Barak Obamanyń pikirinshe, jarty ǵasyrdan astam ýaqyt Kýbaǵa baǵyttalyp kelgen barlyq shekteýler qazirgi kezde óziniń ózektiligin joǵaltqan. AQSh prezıdenti atalǵan túıtkildi qaıta qaraý eki eldiń ara-qatynasyn jańa deńgeıge kóteredi dep esepteıdi. Sondaı-aq, ol Amerıkanyń jas urpaǵy AQSh pen Kýba arasyndaǵy qarym-qatynasty jumsartý úshin tyń tetikter izdeı bastaıtynyn jetkizdi.
Sál shegine sóılesek, 1960 jyly AQSh Kýbany saıası jáne ekonomıkalyq qysymǵa alýdy bastaǵan. Munyń sebebin túsindirsek, sol tustarda Kýba bıligi óz aımaǵyndaǵy amerıkalyqtardy burynǵy áleýmettik artyqshylyqtarynan jáne jeke menshikterindegi dúnıe-múlikterinen aıyrǵan-dy. Mine, sodan beri álgi sanksııa qamyty Kýbanyń moınynda turǵan bolatyn. Tipti, 1962 jyly AQSh Bostandyq aralyna qysymdy tym kúsheıtip jiberdi. Alaıda, Kýba bıligi oǵan da aıylyn jımady.
Jalpy, AQSh Kýbadan demokratııalyq úrdisterge jol ashýdy, adam quqyǵyna qurmetpen qaraýdy talap etip keledi. Sondaı-aq, AQSh bıligi óziniń degenine kóne qoımaıtyn eldermen Kýbanyń áskerı qarym-qatynas jasaýyn da qalamaıdy.
Joldybaı Bazar.
