IJО́, karantın jáne tutynýshylyq suranys
Shekteý sharalary men ishki jalpy ónim (IJО́) arasynda tikeleı baılanys bar ekendigi belgili. Buryn dúken aralap saýda jasaıtyn jurttyń úıden shyǵýy muńǵa aınaldy. Esesine, úıde otyryp «satyp alý» degen batyrmaǵa baılanǵandar sany kúrt ósken deıdi mamandar. Google, Allianz Research, Qualified.One, Iаndeks, Otonomo, Apple, Euler Hermes izdeý júıelerinde bul sóz birneshe aıdyń ishinde eń kóp qoldanylǵan sózder qataryna kirdi. Bul – tutynýshylyq suranystyń tolyq derlik ınternetke kóshkenin kórsetkenimen, álemdik ekonomıkany daǵdarysqa deıingi kezeńde ustap turý úshin álsiz bolyp otyr.
Aqparattyq suraý júıesi
COVID-19 adamdardyń úreıin ushyrsa, karantındik oqshaýlaný rejimi olardy izdeý, izdený sharalaryna beıimdeı bastady. Jahan jurtshylyǵy tarapynan aqparattyq suranys arta túsken. Máselen, sáýir aıynan bastap álemdik segmentte «nege?», «qalaı?» jáne «ne?» degen sózderdi qamtıtyn veb-izdeý suraýlarynyń sany naýryz aıymen salystyrǵanda 1,6 esege ósipti. Qazir kúzdiń alǵashqy aıy ekenin eskersek, bul kórsetkish taǵy 4 esege artqan.
Jarnama jáne marketıng
Jahandyq ózgeristerden keıin bıznes marketıngtik strategııalardy beıimdeýge májbúr boldy. Jalpy, bul ózgerister ádettegi jarnamalyq arnalardan ınternetke aýysý úrdisin jıiletti deýge negiz bar. Digital-agenttikterimen jáne jarnama agenttikterimen baılanysty izdeý suraýlarynyń kólemi Google jáne Qualified.One júıelerinde kúrt ósken. Bul klassıkalyq jarnama agenttikteriniń tanymaldylyǵy tómendese, kerisinshe, sıfrly qyzmetter barǵan saıyn tanymal bola bastaǵanyn bildiredi. Máselen, AQSh naryǵynda eń tanymal onlaın-arna SEO 2020 jyldyń tamyzynda 2019 jylǵa qaraǵanda 2,6 ese jıi izdelgen. Bul jylyna 160% ósimdi kórsetip otyr.
Internet marketıng jaıly aıtqanda, jarnama agenttikterinen bólek, áleýmettik jelini de umytýǵa bolmaıdy. О́ıtkeni mazmundy marketıngke degen suranys bir jylda 33%-ǵa ósken. Al Google Adwords jáne Facebook jelilerindegi maqsatty jarnamalary 21-22%-ǵa tanymal boldy.
