«Teriskeı» áni osylaı týǵan edi

Sozaqtaǵy jyldaryn saǵyna eske alady

1985 jyly Sozaq aýdandyq «Mol­shy­lyq úshin» (qazirgi «Sozaq úni») gazetinde jaýapty hatshy bolyp júrgenimde oblys kóleminde laýazymdy qyzmetter atqarǵan 37 jastaǵy jigerli jas Dosybaı Aıtbaıuly Sherimqulov aýdandyq partııa komıtetiniń birinshi hatshysy bolyp keldi. Ol kisiniń kezinde partııa qata­ryna qabyldanyp, oblystyq tele­radıo kompanııasynyń basshysy Baý­dýl­la Qonysbekov aǵamyz arnaıy kelip, Dosybaı Aıtbaıulyna jolyǵyp, áleý­mettik-ekonomıkalyq jaǵynan artta qalǵan aýdanda jańadan ashylǵan radıo ha­bary redaksııasyna jaýapty redaktor etip taǵaıyndaýy, keıinnen «Sozaq teledıdarynyń» negizin qalap, eńbek etýim – jastyq shaqtaǵy umytylmas kezderim edi. Tarıhy baı shejireli ólkede qundy málimetter jınap, kónekóz qarttardyń áńgimesin tyńdaýym shyǵarmashylyǵyma arqaý boldy.

Bul kúnde elge tanymal memleket jáne qoǵam qaıratkeri, Qazaq KSR Joǵarǵy Keńesi HII shaqyrylymynyń halyq depýtaty, Ońtústik Qazaqstan oblysynyń qur­metti azamaty, «Halyqtar dostyǵy» jáne «Qurmet» ordenderiniń ıegeri Dosybaı Sherimqulov shalǵaıdaǵy Sozaq aýdanyna kúrdeli qıyn kezeńde kelip, 1994 jylǵa deıin toǵyz jyl boıy jemisti eńbek etti. «Jas kelse – iske» demekshi, aýdanda iri ózgerister jasady, keńshar dırektorlary men partkom hatshylaryn, mekeme-uıym basshylaryn jigerli jas mamandarmen aýystyrdy. Partııalyq jaýapkershilik turǵysynan ótkizgen talaı jıyndaryna qatysyp, saýatty da jigerli aıtqan sózderine syrttaı rıza bolyp júretinmin. Jergilikti jerdiń áleýmettik-eko­nımıkalyq damýyna qatysty ózekti máse­lelerdi she­shý Dosekeńniń iskerlik qabiletin jan-jaqty tanytqan edi. Odan bólek Do­sybaı Aıtbaıuly Sozaqta qyzmet etken jyldary talaı tarlanboz ádebıet jáne mádenıet qaıratkerlerin, sahna sańlaqtaryn kútip alyp, halyqpen kezdesý jıynyn ótkizgeniniń de kýási boldym. Qazaqtyń talantty jazýshylary Sáýirbek Baqbergenov, Táken Álimqulov, Qýandyq Shań­ǵytbaev, Tólegen Toqbergenov, Tut­qa­baı Imanbekov, Oralhan Bókeı, akademık Ismet Keńesbaev, sahna sańlaqtary Bıbigúl Tólegenova, Roza Baǵlanova, Sholpan Jandarbekovalarmen kezdesýde óner maıtalmandarynyń mereıin kó­terip sóılep, áserli kesh ótkizgeni esim­nen shyqpaıdy. Kúıshi Tólegen Mom­bekovtiń 70 jyldyq mereıtoıyn dúrkiretip ótkizip, Tókeń «Dosybaı» atty kúı shyǵarǵanyn da bilemin. Dosybaı Aıtbaıuly Sozaqta qyzmet etken jyldary sol eldiń yntymaq-birligin saqtap, áleýmettik-ekonomıkalyq jaǵdaıyn kóte­rýde, talanttaryn qurmetteýde abyroı­ly eńbek etti. Ol kisiniń ádil de isker bas­shy bolǵanyn Sozaq halqy áli kúnge aıt­yp júredi. О́z basym Dosekeńmen osy kezge deıin habarlasyp, kezdesken saıyn qýanyp qalamyz. Jaqynda jolyqqanda Sozaqta birge qyzmet etken jyldardan syr sýyrtpaqtaǵan edik.

– Doseke, shalǵaıdaǵy tabıǵat jaǵ­daıy kúrdeli, oblystyń ózge óńirle­rimen salystyrǵanda halqynyń tur­mysy tómen Sozaqqa óz erkińizben barmaǵan shyǵarsyz?

– Myna saýalyń Sozaqta ótken kezdi eske túsirdi. 1985 jyly oblys basshysy Asanbaı Asqarov kabınetine shaqyryp, Sozaq aýdanynyń bos turǵan birinshi hatshysy ornyna meniń kandıdatýramdy laıyq kórip otyrǵanyn aıtty. Ol kezde Sozaq aýdanynyń ekonomıkalyq ahýaly, halqynyń áleýmettik jaǵdaıy basqa óńirlermen salystyrǵanda kóp artta qalyp ketken, problemalary shash-etekten, ony sheshý úshin kóp ýaqyt jáne qarjy qajet ekenin jaqsy biletinmin. Sondyqtan onsha aıaǵym tarta qoımady. «Aseke, sol aýdanǵa mal sharýashylyǵy mamandarynyń bireýin jibergenińiz durys bolar. Meniń mamandyǵym ekono­mıst qoı», dep jaltaryp edim, ol kisi jaqtyrmaı qaldy. «Iá, ol aýdannyń problemasy jetkilikti, tabıǵaty ereksheleý ekenin bilemin. Biraq sen áli jassyń, kúsh-qýatyń jetkilikti. Mundaı jumysty qazir istemegende qaı ýaqytta istemeksiń? Mundaı qıyndyqtardy sender jeńbegende kim jeńedi? Biz osy jumys seniń qolyńnan keledi dep senim artyp otyrmyz, sol senimdi aqtaýyń kerek!», dep kesip tastady. Artqa sheginer jol joq ekeni túsinikti boldy. Ári mundaı úlken kisi ekiniń birine qolqa sala bermeıdi, búkil oblys halqy pir tutqan Asekeńniń ózi senim artyp otyrsa, onyń sózin qalaı aıaqasty etpekpin? Sondyqtan kelispeske amalym qalmady. Obkomnyń aýyl sharýashylyǵy bólimin basqarǵan eki jyldyń ishinde barlyq aýdanmen tyǵyz baılanysta jumys istegendikten, Sozaq aýdanynyń jaǵdaıyn jaqsy biletinmin. Sol jyly Asanbaı Asqarov respýblıka Ortalyq komıtetiniń qaýlysymen qyzmetinen bosatylyp, oblysymyzǵa Rysbek Myrzashev kelgende Asekeńniń usynysy taǵy da qozǵalyp, Sozaqtaǵy qyzmetke barýyma týra keldi. Sozaqta toǵyz jyl qyzmet etkende baıqaǵanym – halqy tekti, minez-jaratylysy bólek jandar eken.

– Zamanymyzdyń uly sazgeri, jer­lesińiz Shámshi Qaldaıaqovpen uzaq jyl­dyq syılastyq qarym-qatynasta bolǵa­nyńyzdy bilemiz. Shámshi aǵamen jaqyn ta­nystyǵyńyz qalaı bastalyp edi? Siz bas­shylyq jasaǵan jyldary Shám­shi aǵanyń Sozaqqa jıi keletinin kóre­t­inbiz.

– Sazger Shámshi Qaldaıaqovtyń ánde­rin bala kezden tyńdap, jatqa aıtyp júrgen jastar bizdiń kezimizde az bolmady. Ásirese, stýdent kezimizde bas qo­sa qalsaq, Shámshiniń ánderin aıtýdan ja­lyqpaıtynbyz. Shámshiniń ózin kórmesek te, ánderi arqyly biz úshin qol jetpeıtin dara tulǵa, danyshpan, týma talant bolyp kórinetin. Ol kisimen eń alǵash kezdesýdiń sáti oblystyq komsomol komıtetiniń ekinshi hatshysy qyzmetinde júrgen kezimde, 1976 jyly kóktemde tústi. Jumystyń aıaǵyna taman kabınetke Shámshi aǵa kirip keldi. Men ony birden tanyp, ornymnan turyp amandasyp, oryndyq usyndym. Ol kisi ózin tanystyra bastap edi, men sózin bólip:

– Sizdi bilemin ǵoı, siz Shámshi aǵasyz ǵoı, – dedim. Ol kisi:

– Bárekeldi, tanyǵanyńa rahmet! – dep qýanyp qaldy. Sosyn: – Men osynda kele jatyp senderge soǵa keteıin dep oıladym. Qazir Jambyldan kele jatyrmyn, Jambyl oblystyq partııa komıtetiniń birinshi hatshysy H.Bekturǵanov maǵan sý jańa mashına syılady, – dep balasha máz bolyp, jelpinińkirep qoıdy. Kóńiliniń kóterińki ekenin baıqap, men de qosyla qýanyp, quttyqtap jatyrmyn. Eldiń ardaqty perzentine aınalǵan sazgerge osyndaı qurmet bildirgen H.Bekturǵanovqa ishteı rıza bolyp ta otyrmyn. Sóılese kelip, ol kisi meni burynnan syrtymnan biletindigin aıtyp, ákemmen dámdes bolǵan sátterin esine túsirdi. «Jaqsy áke jaman balaǵa qyryq jyl azyq» degen osy eken-aý. Talaı jaqsy-jaısańmen syılasyp ótken ákemniń maǵan qaldyrǵan eń úlken baılyǵy jaqsy aty ekenine osyndaı ardaqty azamattardyń jyly lebizin estigen saıyn kóz jetkize túsemin. Búgin de, mine, bir kórip, qolyn alýdy talaı adam armandaǵan Shámshi aǵanyń ákemniń arqasynda tanyp, aldyma kelip otyrǵanynyń ózi ne turady?! Sondyqtan «Árkim syılaǵannyń quly» demeı me, jumystyń aıaǵy bolyp qalǵandyqtan: «Sháke, kelip qalypsyz, úıge júrińiz. Nemese asyǵys bolsańyz, bir jerge baryp tamaqtanaıyq!» dep izet bildirgende ol kisi Sháýildirge, óziniń týyp-ósken jeri «Temir» sovhozyna ketip bara jat­qanyn aıtyp, sypaıy ǵana bas tartty. Ol kisimen birge syrtqa shyǵyp, shyǵaryp salaıyn dep oıladym. Tysta Shákeńniń syıǵa alǵan sý jańa, sary tústi «Jıgýlı» kóligi jarqyrap tur eken. Shámshi aǵanyń ázilqoı kisi ekenin buryn da estip júretinmin. Bul joly da qýaqylana jymıyp, alǵan ol kóliginiń esigin ashyp jatyp: «Men mashına aıdaýdy endi úırenip júrmin. Baǵdarshamnyń aldyna kelip, mashınadan túsip, jan-jaǵyma qaraımyn. Eger basqa mashınalar joq bolsa, sonda ǵana júremin», degen sózine kúlip aldym. Sazgerdi jaqsy kóńil kúı­men qoshtasyp, shyǵaryp saldym. Odan keıin aǵamen kezdesýdiń reti bolmady. Biraq únemi syrttaı amandyǵyn bilip júretinmin.

«Raıkomnyń qaýlysymen án jazylmaıdy»

– Endi áńgimemizdi tek Sozaqtyń ǵana emes, jalpy qazaqtyń súıip aıtar «Teriskeı» ániniń dúnıege kelýine sebepshi bolǵanyńyzǵa toqtalsańyz...

– Sozaq aýdandyq partııa komıtetiniń birinshi hatshysy bolǵannan keıin, Shámshi aǵa Jambyldan baıaǵy kóligimen kelip, arnaıy quttyqtady. Ol kisiniń bul izetine qatty qýanyp, tóbem kókke jetkendeı bolyp qaldy. Bul kezde meniń otbasym áli aýdanǵa kóship kelmegen. Sondyqtan ony ózim jatqan shaǵyn meımanhanaǵa, qasyma jaıǵastyrdym da:

– Sháke, aqyry kelip qalǵan ekensiz, endi 2-3 kún bolyp, halyqpen kezdesip qaıtyńyz, – dep qolqa saldym.

Ol kisi birden qabyl alyp:

– Men qaıda asyǵamyn? Saǵan kedergi bolmasam boldy ǵoı, – dep kúldi.

Sonymen aýdannyń eki-úsh sharýa­shylyǵynda bolyp, halyqpen birneshe kezdesý ótkizdi. Ol kisiniń qasyna erip júrý úshin aýdandyq atqarý komıteti tóraǵasynyń orynbasary Amangeldi Myrzalıev degen aǵamyzdy qosyp ber­dim. О́zim kúndiz partııa jumysynan qo­lym bosamaıtyndyqtan, tek keshke q­araı dastarqan basynda birge otyryp, áńgimelesip, ol kisiniń qyzyqty hıkaıa­laryn tyńdaıtynmyn. Shákeńniń árbir áńgimesinen kishipeıildiligi, qarapaıym­dylyǵy, sózge sheber, ázil-qaljyńǵa qumar­lyǵy baıqalyp turatyn. Ádette aýdanǵa kelgen óner men ádebıet ókilde­riniń óz talaptaryn qoıa keletini burynnan belgili jaǵdaı. Al ondaılardyń janynda Shámshi aǵanyń bolmysy múlde bólek edi. Ol kisi ózine jasalǵan mundaı «qamqorlyqtardy» jaqtyrmaıtyn. Elge ol úshin kelmegenin aıtyp, keıbir basshylar usynǵan «hatqaltalaryn» qaıtaryp jibergenin de estip júrdim.

Shákeńniń sol kelgeninde dastarqan ústinde:

– Sháke, sizdiń elimizdiń ár óńirine arnap jazǵan ánderińizdi búginde halyq aýzynan tastamaı aıtyp júr. Mysaly, «Arys jaǵasynda», «Syr sulýy», «Mo­ıynqum jastarynyń áni», «Kaspıı tol­qynynda», taǵy sol sııaqty ánderińiz kóp. Biraq bizdiń syrly Sozaq eline arnaǵan ánińiz joq sııaqty. Sondyqtan osy el men jerdiń qurmetine arnap bir án shy­ǵarsańyz, – dep tilegimdi aıttym.

– Dosybaı, seniń aıtyp otyrǵanyń durys. Biraq án shyǵarý raıkomnyń qaýly­sy­men oryndalmaıdy ǵoı. Án ózi­nen-ózi shyǵa bermeıdi. Biraq oılasaıyq, men saǵan ýáde bermeı-aq qoıaıyn, degenmen áreket jasap kóreıin, – dedi Shákeń.

Sazger osylaı degen soń, budan keıin bul áńgimeni qaıtyp qozǵaǵan joqpyn.

1986 jyldyń jaz aılarynda Shám­shi aǵa maǵan telefon soǵyp, aýdanǵa keletindigin, qasynda belgili aqyn, ózimiz­diń jerlesimiz Sabyrhan Asanov bolatynyn eskertti. Sozaqta «Qyzylkól» degen demalys ornynda syrttan kelgen qurmetti meımandardy kútetin qara­paıym úsh-tórt úıimiz bar edi. Bul úıler aýdan­dyq tutynýshylar qoǵamynyń esebin­de bolǵandyqtan, mekeme basshysy Ábdi­májıt Bıtabarovty shaqyryp, sol úıdiń bireýin qonaqtarǵa arnap daıyndaýdy tapsyrdym.

Kóp uzamaı aqyn men sazger de kelip jetti. Olardy aldyn ala daıyndalǵan kól jaǵasyndaǵy úıge jaıǵastyryp, bar jaǵdaıyn jasap jatyrmyz. Sabyrhan Asanovty buryn-sońdy estigenim bolmasa, kórgen adamym emes. О́zi iri de­neli, sym­batty, óte mádenıetti kisi eken. Sa­byrhan aǵamyz da Shákeńnen qalys­paı­tyn, ázilge júırik adam bolyp shyqty. Ta­nysyp, sóılese kele maǵan:

– Shákeń aǵań óte qyzyq kisi ǵoı, ót­ken joly maǵan telefon arqyly Al­­ma­tyǵa zvondap: «Men Sozaq aýdany týraly bir án jazýǵa sol aýdannyń bas­­­shysy Dosybaı degen inimizden tap­syr­ma aldym, sen soǵan óleń jaz», deıdi. Men: «Oý, Sháke, men ol aýdan­dy kór­mesem, bilmesem, óleńdi qalaı jazamyn? Almatyda otyryp jaza almaımyn ǵoı», desem, «Onda sol jaqqa baryp qaı­­taıyq», dedi. Sosyn senderge keldik», dep ázildep otyrdy.

Sóıtip, qonaqtarymyz «Qyzylkólde» demalyp, arasynda 2-3 sharýashylyqta kezdesý ótkizip, on shaqty kún bolyp, qaıtyp ketti. Keterinde Shákeń maǵan:

– Dosybaı, seniń ótinishińniń oryndalatyn túri bar. Sabyrhan ekeýmizge biraz ýaqyt ber, daıyn bolǵanda habaryn aıtamyz, ózimiz ándi alyp kelemiz! – dedi.

Sonymen 1986 jyldyń kúzinde kabı­netimde otyrsam, Shámshi aǵa kirip keldi. Qushaqtasyp amandasqan soń, ol kisi án daıyn ekendigin aıtyp, maǵan notalar men óleń mátinin kórsete bastady.

– Sabyrhan aǵamyz qaıda? Bul qýa­nysh­ty jańalyqtyń súıinshisin ózi suraı kelmedi me? – dep edim:

– Ol aýyryp, aýrýhanaǵa túsip qaldy. Men bul jaqsylyqty jetkizýdi  keıinge qal­dyrǵym kelmeı, ózim keldim. Sen qazir eki ánshi jáne baıanmen súıemeldeýshini al­dyrt. Men olarǵa ándi ózim úıretip ke­teıin, – dedi.

Tez arada Mádenıet bóliminiń bastyǵy Turlybek Jaqsybaevty jáne ánshilerdi shaqyrtyp, «Báriń kishi meımanhanaǵa baryp, án úırenýge kirisińder» dep tapsyrma berip, shyǵaryp saldym.

Jumystan soń sol kezdegi aýdandyq atqarý komıtetiniń tóraǵasy marqum Rah­matýlla Mombekov ekeýmiz Shámshi aǵa án­shilerdi úıretip jatqan jerge bardyq. Úlken bólmede jumys qyzý júrip jatyr eken, bizdiń ánshiler ándi tolyq bol­masa da, biraz úırenip alǵan sııaqty. Má­denıet bóliminiń meńgerýshisi Turlybek Jaq­sybaevtyń án salatyn qabileti bar edi, ózi ótinish aıtyp:

– Osy ándi men oryndaıynshy, meniń daýsym osy ánge yńǵaıly. Shákeń de qoldap otyr, – dep báıek bolǵanda Shákeń:

– Bul jigitter men qyzdardyń bári jaqsy ánshiler eken. Barlyǵy tamasha oryndap jatyr. Biraq, Turlybektiń aıtyp otyrǵany durys, sonyń daýsyna la­ıyqtalyp jazylypty, – dep Turlybekti qoldady.

Ánniń aty «Teriskeı» eken, bul maǵan azdap jupynylaý estildi de:

– Sháke, ataýyn «Teriskeı áni» nemese «Teriskeı saǵynyshy» sııaqty etip ózgert­sek qaıtedi? – dep usynys aıtyp kórip edim, ol kisi:

– Dosybaı, Teriskeı degen sózdiń ózi seniń aıtyp otyrǵan uǵymdaryńdy tolyq qamtıdy. Sondyqtan aty tamasha. Onyń ústine Sabyrhan aǵań da atyn ózgert­peńder dep jatyr! – dep kesip tastady.

Sonymen áńgime aıaqtalyp, biz ándi tyń­daýǵa otyrdyq. Turlybektiń oryn­daýyn­daǵy ándi elite tyńdap shyqqan soń, onyń sózi maǵynaly, sazy tartym­dy shyqqanyn bárimiz japyryla maqtaı jóneldik. Sol joly ándi eki-úsh emes, keminde 20-30 ret tyńdasaq ta qanbaı, tyńdaı bergimiz keldi. Sóıtip otyrǵanda túnniń ortasy bolyp qalypty. Sozaqtyń kelbetin aıshyqtaıtyn jańa ánniń týǵ­anyna qýanyp otyryp, ýaqyttyń qalaı ótkenin de bilmeı qalyppyz. Ara­synda Shákeńe: «Tamaqtanyp alaıyq, sosyn jal­ǵastyrarmyz» dep usynys jasa­ǵanmen, ol kisi: «Joq, mynalarǵa tolyq áýendi jetkizbeıinshe men tamaq ishe al­maımyn!» dep jumysyn jalǵastyra berdi. Sodan óziniń qońyr daýysymen ándi ánshilermen birge qosylyp aıtýmen boldy. Kóp jerlerinde toqtatyp, «Bul jer bylaı aıtylýy kerek» dep túsindirip álek bolyp jatty. Aqyry ánshiniń oryn­daýyndaǵy án oıdaǵydaı bolyp shyq­qannan keıin ǵana demin alǵan aǵany tamaqtanýǵa kóndirdik.

Erteńine keshke, kelisilgendeı, aýdan halqyn Kalının atyndaǵy sovhozdyń klýbyna jınap, án keshin ótkizdik. Jınal­ǵan qaýym «Teriskeı» ánin óte jyly qabyldap, qaıta-qaıta qol soǵyp jatty. Sol keshte Shákeńniń basqa da ánderi aıtylyp, halyq bir demalyp qaldy. Men óz basym osy kúnge deıin sol án­niń shy­ǵýyna yqpalym tıgenine, oǵan sebep­shi bolǵanyma maqtanamyn. 1988 jyly «Qazaqstan» telearnasyna bergen suhbatynda sazger: «Teriskeı» ánim Sozaq aýdanynyń basshysy Dosybaı inimizdiń ótinishimen shyqqan edi, biraq sátti shyq­qan án dep esepteımin», degen edi.

Eldiń súıip oryndaıtyn «Teriskeı» áni men Sozaqta qyzmet etken jyldary ómirge kelgenin, Shákeńdi kútip alyp, ánniń alǵash oryndalýynda basy-qasynda bolyp, óner ıelerin uıymdastyryp, elge jetkizýde shyn nıetimmen eńbek etkenimdi maqtanysh etemin.

Shákeńniń án-ǵumyry jalǵasyp jatyr

– Shámshi aǵanyń ómirsheń ánderi ha­lyq arasynda jalǵasyp jatyr. Ol kisiniń ánderi qazaq mádenıetiniń altyn qoryna óshpesteı jazylyp qaldy desek te bolady.

– Iá, qazaqtyń birtýma azamaty, talantty sazger, adamdyq qasıeti taýdaı azamat, jerlesim Shákeńmen dámdes, syr­las ini bolǵan kúnderimdi ómirimniń bir jarqyn belesi dep esepteımin. Odan keıin de Shákeń bizdiń aýdanymyzǵa bir­neshe ret kelip júrdi, syılasyp, kóp ret dastarqandas boldyq. Ol kisige qolym­nan kelgenshe járdemimdi berip júrdim. Mundaı eldiń baǵyna týǵan birtýar azamatqa qandaı qurmet kórsetseń de jara­sady ǵoı... Sońǵy ret Shákeńdi 1992 jyly Otyrar aýdanynyń toıyn­da kórdim. Bul kezde aýyryńqyrap júr­se kerek, mazasy bolmaı, reńi solǵyn tart­qanyn baıqadym. Aldyna baryp amandasqanymda burynǵysynsha qushaq­tap, kózine jas alǵan Shákeń maǵan: «Dosybaı, meniń «Teriskeı» ánimdi aıtyp júrsińder me?» dep surady. Men bul án aýdannyń ánuranyna aınalǵanyn aıtyp, kóńilin kóterip qoıdym. Bul rasynda da solaı edi. Shámshi aǵa budan keıin jaǵdaıynyń tómen ekenin, aýrýhanada jatqanyn aıtyp qaldy. Osy kezdesýden keıin Shákeń emdelip jatqan aýrýhanaǵa baryp, kóńilin surap qaıttym. Bul bizdiń sońǵy kezdesýimiz eken. Kóp uzamaı ol kisi dúnıeden ótti. Qazir oılap otyrsam, sazgerdiń 60-tan endi ǵana asqan shaǵy eken ǵoı. Sol az ǵumyrynda qoshemetti de kóp kóre almaı ketti. Shámshi aǵa taǵy biraz ómir súrgende, áli «Teriskeı» sııaq­ty qanshama tamasha ánder dúnıege keler edi... Degenmen, áıgili sazgerdiń artynda urpaqtan-urpaqqa jalǵasqan baǵa jetpes mura, rýhanı baılyq qaldy. Ol kisiniń ómirsheń ánderin halyq osy kúnge deıin súıip tyńdap, oryndap keledi. Mun­daı ánderdi umytý múmkin emes, kerisinshe ol ánderge ýaqyt ótken saıyn jańa kúsh, jańa rýh qosylatyn sııaqty. Sonyń ishinde kezinde kóp teperish kórgen «Meniń Qazaqstanym» áni búginde elimizdiń Ánuranyna aınalǵanynyń ózi nege turady?! Buǵan da shúkirshilik...

Qazirgi tańda jyl saıyn astana men Almatyda, basqa da oblystarda, sonyń ishinde sazgerdiń týǵan jeri – ońtústikte Shámshi ánderiniń festıvaldary men baı­qaýlaryn ótkizý dástúrge aınaldy. Solardy kórip, Shákeńmen qatar júrgen kezderim oıǵa oralyp, kóńilim bir bosap qalady. Shákeń sııaqty uly adamdy bizge syılaǵan Allaǵa myń da bir rahmet!

Áńgimelesken

О́tesh QYRǴYZBAEV,

Qazaqstannyń qurmetti jýrnalısi