«Biz qazaqstandyqtardyń karantın jaǵdaıynda da qajetti qyzmetterdi alýyna jaǵdaı jasaýdy aldymyzǵa maqsat etip qoıdyq ári bul rette olardyń ómiri men densaýlyǵyna nuqsan kelmeýin qadaǵalaý kerek boldy. Ol úshin kompanııamyzdyń barlyq resýrstaryn jumyldyryp, halyqqa sıfrlyq tehnologııalarmen qoldaý kórsetýdiń anaǵurlym basym baǵyttaryn aıqyndadyq. Eń aldymen memlekettik jáne áleýmettik qyzmetterge, halyqty aqparattandyrýǵa, sonymen qatar qashyqtan oqytý máselesine den qoıdyq», dedi BTS Digital kompanııasynyń basshysy Nurtaı Ábilǵalıev.
Kompanııa kez kelgen adam 42 500 teńge mólsherindegi áleýmettik kómekti alýǵa ótinim bere alatyn 42500enbek.kz saıtyn iske qosty. Ázirlengen saıt memleketten kómek alýdyń azdaǵan tásilderiniń birine aınaldy. Nátıjesinde 2 mln-nan astam azamat qarjylaı kómekke ýaqtyly qol jetkizdi.
Sonymen qatar kompanııa eGov.kz elektrondy úkimet portalyna Digital ID sıfrlyq sáıkestendirý júıesin engizdi. Jobanyń basty maqsaty – qazaqstandyqtarǵa memlekettik jáne bilim berý qyzmetterin úıden shyqpastan alý múmkindigin usyný. Ol úshin saıtqa tirkelip, paıdalanýshynyń fotosýreti men vıdeosy, sonymen birge jeke kýáliginiń nemese tólqujatynyń úlgileri arqyly onlaın-sáıkestendirýden ótý jetkilikti boldy. Júıe derekterdi avtomatty túrde salystyryp, paıdalanýshy tulǵasynyń onyń qujattarymen sáıkes keletinin anyqtap otyrdy. Osylaısha, karantın kezinde 1,7 mln-nan astam jeke jáne 113 myń zańdy tulǵa ESQ alyp, memlekettik qyzmetterdi halyqqa qyzmet kórsetý ortalyqtaryna barý qajettiliginsiz paıdalandy.
Kompanııanyń kelesi áleýmettik jobasy mektep túlekterin UBT-ǵa jáne magıstranttardy keshendi emtıhanǵa tirkeý kezinde Digital ID-di paıdalaný boldy. Sıfrlyq sáıkestendirý júıesi arqyly UBT tapsyrýshylardyń 82%-y jáne magıstranttardyń 98%-y onlaın tirkeldi.
«Tájirıbe kórsetkendeı, qyzmetterdi onlaın alýǵa baǵyttalǵan jobalar koronavırýs pandemııasy kezinde áldeqaıda tıimdi bolyp shyqty. Bul barlyǵymyzǵa áleýmettik qashyqtyqty saqtap, qajetti qyzmetterdi onlaın alýǵa múmkindik beredi. Biz ázirlegen sıfrlyq sáıkestendirý tehnologııasy mıllıondaǵan qazaqstandyqqa paıdasyn tıgizgenine qýanyshtymyn», dedi N.Ábilǵalıev.
Oǵan qosa, BTS Digital kompanııasy Aitu Birge biryńǵaı kommýnıkasııa ortalyǵyn quryp, onda dárigerlerdiń aldyńǵy qatarly ádistemelerin paıdalana otyra, naqty jaǵdaıdaǵy eń durys is-áreket algorıtmin avtomatty túrde usynatyn azamattardyń ózin-ózi dıagnostıkalaý biregeı botyn iske qosty.
Kompanııanyń taǵy bir ázirlemesi help.coronavirus2020.kz saıty azamattar men memleket arasyndaǵy qatynastyń basty alańyna aınaldy. Atalǵan saıtta kez kelgen adam áleýmettik kómek alý jáne vırýspen kúres ádisteri jóninde sarapshylarǵa suraq qoıý múmkindigine ıe boldy. Saıt jumysy kezinde 41 myń suratý óńdeldi.
Júrgizilgen jumys barysynda kóptegen áleýmettik mańyzdy jobalardy bir ortaǵa toǵystyrǵan Aitu ekojúıesi aıryqsha ról atqardy. Onyń kómegimen 1 mln-nan astam qazaqstandyq smartfon arqyly elimizdiń kez kelgen óńirinen azyq-túlik pen alǵashqy qajettilik taýarlaryna tapsyrys berip, jańalyqtar men aqparattarǵa, tanymdyq ári oıyn-saýyq servısterine jáne damý múmkindikterine qol jetkizdi.
«AT-kompanııa ókili retinde pandemııa saldarymen tıimdi kúresýde tehnologııa ataýlynyń úlken kómek beretinine senimdimin. О́ıtkeni sol arqyly qazaqstandyqtar qajetti qyzmetterdi onlaın alyp, áleýmettik qashyqtyqty saqtaı alady. Sondyqtan kompanııamyzdyń aldynda turǵan kezekti mindet – ári qaraı da áleýmettik, qaıyrymdylyq jáne volonterlik qyzmetter mıssııasy túıisken jobalardy ázirleý. Biz sıfrly tehnologııalardyń Qazaqstandaǵy ómirdi jaqsyraq, jeńilirek ári yńǵaılyraq etetinine senemiz», dedi N.Ábilǵalıev.
Jýyrda koronavırýs pandemııasymen kúreske qosqan úlesi úshin BTS Digital kompanııasynyń bas dırektory N.Ábilǵalıev «Halyq alǵysy» medalimen marapattalǵanyn aıta ketelik.
