Qazaqstan Prezıdenti janyndaǵy Memlekettik basqarý akademııasynda oblystyq jáne olarǵa teńestirilgen sottardyń qylmystyq isterdi qaraıtyn sýdıalary úshin biliktilikti arttyrý kýrstary bastaldy.
Qazaqstan Prezıdenti janyndaǵy Memlekettik basqarý akademııasynda oblystyq jáne olarǵa teńestirilgen sottardyń qylmystyq isterdi qaraıtyn sýdıalary úshin biliktilikti arttyrý kýrstary bastaldy.
Qarashanyń 20-synda sýdıalardyń quryltaıy ótetini belgili. Sot júıesine Elbasy Nursultan Nazarbaev árqashanda kóńil bólip, ony bıýrokratııadan aryltý barysyn basty nazarda ustap keledi. Jáne de isterdi qaraý prosesin barynsha jeńildetýdi de tapsyrǵany málim. Osyǵan oraı Joǵarǵy Sot Tóraǵasy Qaırat Mámı sot júıesine kadrlardy daıarlaý eń mańyzdy máselelerdiń biri retinde qalyp otyrǵanyn kóldeneń tartqan edi. Memlekettik basqarý akademııasynyń rektory Bolatbek Ábdirasılov Elbasynyń tapsyrmasymen kezinde Sot tóreligi ınstıtýtynda arnaıy magıstratýra ashylǵanyn, ony 469 túlek bitirip shyqqanyn atap ketti. Rektor málimetine qaraǵanda, solardyń 30 paıyzy sot júıesine barǵan. Ústimizdegi jyly Joǵarǵy Sot Tóraǵasynyń jáne Memlekettik basqarý akademııasy rektorynyń ókimimen Joǵarǵy Sot pen Akademııa arasynda sot bilimi máseleleri boıynsha ózara is-qımyl erejeleri bekitilgen-di. Atalǵan ereje magıstratýranyń bilim baǵdarlamalary men biliktilikti arttyrý kýrstarynyń sapasyn arttyrýǵa, sonymen qatar, uıymdastyrý nysandaryn birshama jaqsartýǵa yqpal etkeni erekshe ataldy.
Buǵan deıingi oqytýlar leksııa, ne semınarlar túrinde bolyp kelse, qazir trenıng túrinde júzege asyp otyr. Akademııa rektorynyń aıtýynsha, kýrs tyńdaýshylaryna Joǵarǵy Sot sýdıalary men akademııanyń ustazdary dáris beretin bolady. Eki apta ishinde qosymsha biraz is-sharalar BUU baǵdarlamasymen birigip, EQYU mamandaryn tarta otyryp, birneshe semınar ótkizý de qarastyrylǵan. Atalǵan semınarlardy ótkizýge eń tanymal degen sheteldik sarapshylar da shaqyrylǵan. Semınarlar nátıjesi boıynsha elektrondyq test alý jáne referat qorǵaý kózdelgen.
Joǵarǵy Sot Tóraǵasynyń shaqyrýymen Sot tóreligi ınstıtýtynyń barlyq magıstranttary men biliktilikti arttyrý kýrsynyń tyńdaýshylary Qazaqstan sýdıalarynyń VI sezine qatysatyny belgili boldy.
Asqar TURAPBAIULY,
«Egemen Qazaqstan».
