Abyz aqyn bul jerde eldiktiń belgisin, birliktiń úlgisin aıtyp otyr. О́z yrqy ózinen ketip, eldiginen ajyraǵan keı aǵaıynnyń at quıryǵyn kesiskendeı ara bólip, aıarlyq aqparǵa qanyǵyp júrgen zamanda yntymaq pen ymyraǵa qazyq baılaýdyń jolyn kórsetti. Bes jasar balasynan jer besikke taıap qalǵan qartyna deıin adaldyqty dáripteı bilgen halyqtyń eń basty ustanymy aýyzbirshilik ekenin shegeledi. Keshegi babalardyń erligi men eldik dástúrin joǵaltpaı, júrektiń túbine tumar etip taǵýdy tuspaldady. Bul – aqylmannyń halyq ǵumyryna máńgilik azyq bolar parasatty tolǵamy.
Ras, qaı kezeńde bolmasyn eldiń berekeli birligin bekemdeý abyzdar men alyptardyń eń basty paryzy sanalǵan. Sondyqtan sonaý Kúltegin jazbalarynda, Bilge qaǵan ósıetinde bekti-halqynyń jaýlasqany, aǵaly-ininiń daýlasqany saldarynan eldiginen aıyrylǵan qaǵanattyń qaıǵyly tarıhy baıandalady. El aıyrylǵan tusta Sypyra jyraý, Asan qaıǵy sekildi alyptarymyz ataly sózdiń ardasy, arly máteldiń jorǵasy osy tatýlyq pen tektilikten tamyr jaıatynyn nusqady. Bı babalardyń túbin taýyp shegelep, sheshendiktiń sheńberin keńeıtken birlik haqynda oıly da zildi ósıetnamalary kóp. Bolý nemese bordaı tozýdyń aldynda turǵan kezeńde qalyń eli qazaǵynyń qaıǵysy qabyrǵasyna batqan dala dilmary Abaıdyń da «edınısa bolmasa, ne bolady óńsheń nól» deýiniń astarynda úlken mán jatyr. Halyq tanymynyń asylyn arshyp, adamzattyq ozyq úlgilermen sabaqtastyrǵan danyshpan tulǵalarǵa senim arta sóılep, syn saǵatta jumylyp judyryq bolýdy kózdeıdi.
Asyqtan saqa shyǵarýǵa qumar qoǵamda asyl iske qol sozý, máıekti sózderdiń nárli sólimen aýyzdaný arda týǵan azamatqa paryz bolsa kerek. Tanym men túsinýdiń arajigin ajyrata aıtsaq, baryna maldanǵan, dúnıege aldanǵan urpaqtyń ósip kele jatqanyn ańdaǵan danyshpan aqyn, halyqtyń birlikti besiginde terbeter tabandy taý tulǵalardyń bekzat bolmysyna zárý ekenin sezdi. Sondyqtan onyń ár sózinde taý mújilip tas bolmasyna, jaqsynyń elge qas bolmasyna sener jurttyń sáýlesi jarqyrap tur. Ǵasyrdyń sýyq jeli esse de, daýyl borap, burqasyn býlyǵyp jetse de sónbek emes. Sebebi onda kókirektiń kózi bolyp sanalar judyryqtaı etke bekinip, bekem birlikke shaqyrǵan, Uly dalaǵa jaryq shashqan rýhanı sham bar. Sol shamdy jaqqan, ulttyń jańa bolmysyn túzýde aıanbaı eńbek etken Alashtyń arystary edi. Saıyn saharada janartaýdaı jarylǵan jalyn júrekti Alash arystarynyń ańsary el kósegesin kógertýmen astasty. «Alash týy astynda, Kún sóngenshe sónbeımiz!» dep, munarmen búrkelgen qarańǵy qoǵamdy qysastyq pen qusalyqtan qutqarýdy armandaǵan arystar bir týdyń astynan tabylyp, halyqtyń namysyn qaırap, birlikke shaqyrdy.
Ejelden ulysty uıystyryp, nar namysyn oıatqan, eldik birlik pen memleket tutastyǵynyń bas rámizi tuǵyrly tý, jelkildegen aıdyndy baıraq bolǵany belgili. Teńge bult júzgen záý júzinen tógilgen altyn sáýlege kóz tastasańyz, osy bir yrysty yntymaq pen bútin birliktiń jarqyn kórinisi baǵzydan beri baıtaq dalany en jaılaǵan qaısar halyqtyń baıraǵynda beınelengenin ańdaısyz. El basyna ekitalaı kún týsa, ardan da bıik turatyn tuǵyrly týdyń jyǵylmaýy «janym – arymnyń sadaǵasy» dep biletin halyqtyń eń uly erligi. Búginde el azamattarynyń áleýmettik jelide saıqymazaqqa qarsy «Men týymdy maqtan etemin» dep lebiz bildirýi – sol aspan tústes kók baıraǵyna degen perzenttik seziminiń ushqyny ispetti.
Bul rette Memleket basshysy Q.K.Toqaevtyń Twitter jelisinde jastarǵa ún qosyp, azattyǵymyzdyń aıǵaǵy, táýelsizdigimizdiń tumary bolǵan kók baıraǵymyzdy patrıotızmniń kórinisi retinde erkin qoldanýǵa, maqtan etip ár úıdiń tórine ilýge múmkindik berý týraly tolǵana aıtýy qoǵam tarapynan qyzý qoldaý tapty. О́ıtkeni Alashtyń abyroıyn asqaqtatqan aspan tústi kók baıraǵy – ulttyq tutastyǵymyz ben eldik birligimizdiń myzǵymas aıbary, rýhymyzdyń asqaq aıbyny, abyz Abaı aıtqan aýyzbirshilik pen namysymyzdyń asyl qaıraǵy. Sondyqtan ol árbir úıdiń shańyraǵynda, árbir mekemeniń tórinde, ár qalanyń eń kórnekti jerinde jelbirep tursa, ulttyq rýhymyzdyń da asqaqtaı túseri anyq.
