Ispanııanyń ulttyq soty Qytaı Halyq Respýblıkasynyń eks-tóraǵasy Szıan Szemın men Qytaıdyń tórt birdeı iri saıası qaıratkerin tutqyndaýǵa order berdi. Bul týraly RBK saıty habarlady.
Ispanııa ulttyq soty Qytaı bıliginiń Tıbet turǵyndaryna jasaǵan zorlyq-zombylyǵyn teksere kelip, nátıjesinde joǵaryda aty atalǵan Qytaı saıasatkerlerin kináli dep tanyǵan.
Sonymen, Qytaı Halyq Respýblıkasynyń eks-tóraǵasy Szıan Szemın, eks-premer Lı Pen, QHR úkimeti basshysynyń burynǵy orynbasary Sıao Shı, Tıbet kompartııasynyń birinshi hatshysy Chen Kııan men Qytaı otbasyn josparlaý mınıstri Pen Peıýnge «izdeý» jarııalandy.
Ispanııa ulttyq soty Qytaıdyń joǵaryda atalyp ótken burynǵy basshylaryn Tıbette turǵyndardy aıaýsyz qyrdy, lańkestik áreketterdi uıymdastyrdy, adamgershilikke jat qylmys jasady dep aıyptady.
Endi kináli dep tabylǵan Qytaı saıasatkerleri Ispanııa aýmaǵyna nemese Ispanııamen azamattardy ekstradısııalaý týraly kelisim jasasqan ekinshi bir eldiń terrıtorııasyna kele qalsa tutqyndalady.
Al osy máselege qatysty Qytaı jaǵy Madrıdti ózderiniń ishki isine aralasyp otyr dep aıyptady. Qytaı bıligi Ispanııadan Szıan Szemın, Lı Pen, Sıao Shı, Chen Kııan men Pen Peıýndi tutqyndaýǵa baılanysty shyǵarǵan qaýlylarynyń kúshin joıýdy talap etýde.
Qytaı syrtqy ister mınıstrliginiń ókili Hýn Leı: «Qytaıdyń Tıbetke baılanysty saıasaty ózgermeıdi... Biz Ispanııa úkimetinen eki el arasyndaǵy qarym-qatynasqa selkeý túsiretin mundaı qate sheshimdi ózgertýdi talap etemiz», – dedi.
Joldybaı Bazar.
Derekkóz: RBK.
