Komıtet tóraǵasy Murat Baqtııaruly bul kezdesý qoǵamdyq baqylaý júıesiniń quqyqtyq negizderin qalyptastyrýǵa jáne azamattyq qoǵamnyń odan ári damýyna jaǵdaı jasaýǵa arnalǵanyn aıtty.
Senator jumys toby qurylǵanyn jáne joba boıynsha jumys jospary daıyndalǵanyn tilge tıek etti. Aqparat jáne qoǵamdyq damý mınıstri Aıda Balaeva zań jobasy qazaqstandyq jáne halyqaralyq sarapshylarmen birlesip ázirlenip jatqanyn eskerdi. Mınıstr Memleket basshysy óz Joldaýynda memlekettik organdar men kvazımemlekettik sektordyń qoǵam aldyndaǵy ashyqtyǵy men esep berýine baǵyttalǵan qoǵamdyq baqylaý tetikterin ázirleý qajettigin aıtqanyn basa aıtty.
Depýtattarǵa eńbek zańnamasynyń saqtalýy, sybaılas jemqorlyqqa qarsy is-qımylǵa qoǵamnyń qatysýy, quqyqtyq aktilerdiń monıtorıngi boıynsha qoǵamdyq baqylaý tolyq júzege asyrylmaı jatqandyǵy týraly aqparat berildi. Mundaı jaǵdaı tıisti zańnyń bolmaýynabaılanysty paıda boldy.
"Zańnyń sheńberinde qoǵamdyq baqylaýdyń maqsat, mindetterine arnalǵan tásilder kórsetilgen jalpy sıpat bolady. Zań jobasy adam quqyqtarynyń, zańdylyqtyń, eriktiliktiń, obektıvtiliktiń, ashyqtyqpen jarııalylyqtyń basymdyǵy qaǵıdattaryn bekitedi", dedi mınıstr Aıda Balaeva.
Azamattyq sektor óz kezeginde qoǵamdy eldiń saıasıjáne áleýmettik-ekonomıkalyq jańarý prosesterine tartýdy kózdeıtin usynystar jasady. Sonymen qatar qoǵamdyq baqylaý júıesin qalyptastyrý úshin jaǵdaı jasaýdyń mańyzdylyǵyn atap ótti.
Onlaın-otyrysqa Qazaqstannyń ekologııalyq uıymdary qaýymdastyǵy, azamattyq alıans, Adam quqyqtary jáne zańdylyqty saqtaý jónindegi qazaqstandyq halyqaralyq bıýronyń ókilderi, sondaı-aq Senat sarapshylar klýbynyń músheleri qatysty.
