114 myńnan astam otbasy baspanamen qamtyldy
Táýelsizdik jyldary birneshe memlekettik baǵdarlama júzege asyryldy. Atap aıtqanda 2005-2011 jyldary turǵyn úı qurylysyn damytý, «Qoljetimdi baspana-2020», «Nurly jol» jáne О́ńirlerdi damytý memlekettik baǵdarlamalary. Osy kezeńde 114 myńnan astam otbasy áleýmettik turǵyn úımen qamtylyp, 63 myńnan astam úleskerdiń turǵyn úı máseleleri sheshildi.
«2017 jyldan bastap «Nurly jer» memlekettik baǵdarlamasy iske asyrylýda. Baǵdarlama iske qosylǵan 3 jyldyń ishinde 36,8 mln sharshy metr nemese 330 myń turǵyn úı salyndy. Qoljetimdi turǵyn úı jáne jeńildetilgen nesıe berý arqyly memlekettik qoldaý sharalarymen 89 myńǵa jýyq otbasy qamtyldy», dedi M.Jaıymbetov.
Bul jyldar aralyǵynda turǵyn úı qurylysyna 3,6 trln tengeden astam jeke ınvestısııa tartyldy. Komıtet basshysynyń aıtýynsha, salynǵan memlekettik ınvestısııalardyń 1 teńgesine jeke ınvestısııalardan 6 teńgeden keledi.
Vedomstvonyń aqparatyna sensek, Qazaqstanda turǵyn úıge qoljetimdiliktiń satyly júıesi qarastyrylǵan.
«Memleket basshysy turǵyn úı baǵdarlamalaryna qatysý úshin naqty baǵalaýdy qarastyrýdy tapsyrdy. Bıyldan bastap baǵdarlama boıynsha árbir otbasy múshesiniń tabysyn eskere otyryp, turǵyn úıge qoljetimdiliktiń satyly júıesi qarastyrylǵan. Tabysy eń tómengi kúnkóris deńgeıinen aspaıtyn áleýmettik osal topqa jatatyndar úshin satyp alý quqyǵynsyz jalǵa beriletin turǵyn úı – 32 700 teńge. Tabysy eki AEK-ten aspaıtyn kópbalaly, tolyq emes, múgedek balalary bar otbasylar úshin jyldyq 2%-ben jeńildikti nesıeler, tabysy 3,1 AEK-ten asatyn kezekte turǵandar úshin «5-10-20» baǵdarlamasy, «7-20-25» baǵdarlamasy jáne bankter men turǵyn úı jınaqtaý júıesiniń ózge de naryqtyq baǵdarlamalaryn paıdalaný múmkindigi bar. Elbasynyń jáne Memleket basshysynyń tapsyrmasyna sáıkes, birinshi kezekte kópbalaly otbasylardy satyp alýsyz jalǵa beriletin turǵyn úımen qamtamasyz etemiz», dedi komıtet tóraǵasy.
Baǵdarlamalardy iske asyrý kezeńinde 30 myń otbasyna turǵyn úı berý kózdelgen, onyń ishinde bıyl 4 835 otbasy qonys toıyn toılamaq.
Baspana qory jetkilikti
Quzyrly organnyń málimetine sáıkes, elimizde baspana qory jetkilikti. Sondyqtan tapshylyq bolmaıdy dep sendirdi mınıstrlik ókilderi.
«Jańa turǵyn úı qoryn qurýymyz kerek. Memleket bólgen qarajatty tıimdi paıdalaný kerek. Osy arqyly jańadan qurylys salasyn damytýǵa, jumys oryndaryn ashýǵa basymdyq berilýi tıis. Sondyqtan baǵdarlama jańa turǵyn úı alýǵa baǵyttalyp otyr. Páter jetkilikti» dedi spıker.
Jaýapty vedomstvonyń aqparaty boıynsha «Shańyraq» baǵdarlamasy arqyly 390 mlrd teńge bólinip, onyń 180 mlrd teńgesi nesıelik páterler salýǵa ákimdikterge berildi. 210 mlrd teńge 17 myń jeńildetilgen nesıe berýge baǵyttaldy.
Bıyl bas shaharda 5 myńǵa jýyq, Almatyda shamamen 4 myń, sondaı-aq óńirlerde 200-600 páter tapsyrý josparlanǵan.
Memlekettik qoldaý 1,5 esege ósti
Byltyrǵy sáıkes kezeńmen salystyrǵanda osy jyly turǵyn úı qurylysyn memlekettik qoldaý kólemi 1,5 esege ósti.
«2020 jyly 15 mln sharshy metr turǵyn úı salý boıynsha mindetteme aldyq. Bul 150 myńnan astam otbasynyń turǵyn úı jaǵdaıyn jaqsartýǵa múmkindik berip, 40 myńǵa jýyq otbasy memlekettik ınvestısııalar sheńberinde turǵyn úımen qamtamasyz etiledi. Memlekettik qoldaý kólemi 2019 jylmen salystyrǵanda 1,5 esege artyp otyr», dedi Qurylys jáne turǵyn úı-kommýnaldyq sharýashylyq isteri komıtetiniń tóraǵasy.
Prezıdent Q.Toqaevtyń tapsyrmasy boıynsha shalǵaı eldi mekenderge de nazar aýdarylyp, aýylsharýashylyq salasynyń qyzmetkerlerin qoljetimdi turǵyn úımen qamtamasyz etý tetigi ázirlenip jatyr.
«Jumys berýshi belgilengen jobaǵa sáıkes, óz qarajaty esebinen turǵyn úı salady. Memleket óz tarapynan úıdiń tirkelgen qunynyń 50%-yn respýblıkalyq bıýdjetten sýbsıdııalaý mindetin alady. Bul aýyldyq jerlerge bilikti mamandardy tartýǵa jáne eńbek resýrstaryn saqtap qalýǵa múmkindik beredi», – dedi M.Jaıymbetov.
«Qazaqstannyń turǵyn úı qurylys jınaq banki» AQ Ortalyq fılıalynyń dırektory Jansultan Mataevtyń aıtýynsha, naryqtyq ekonomıkada turǵyn úı baǵasyn suranys pen usynys retteıdi. Sol sebepti, qaıtalama naryqta baspananyń qunyn belgileý múmkin emes. Al memlekettiń esebinen salynyp jatqan úılerdiń sharshy metrine naqty baǵalar bekitildi.
«Almaty jastary» syndy memlekettik baǵdarlama aıasynda qaıtalama naryqtan baspana alýǵa ruqsat berilgen kezde baǵalar sharyqtap ketedi. Qazir «Nurly jer» baǵdarlamasy arqyly turǵyn úıdiń sharshy metri úshin baǵalar bekitilgen. Máselen, Nur-Sultan qalasynda – 220 myń teńge, Almaty qalasynda – 240 myń teńge, Shymkentte – 200 myń teńge jáne óńirlerde 160 000-180 000 teńge aralyǵynda», dedi J.Mataev.
