«Biz bul jobany merziminde jáne sapaly júzege asyrý úshin eń jaqsy resýrstardy jiberemiz. Qazaqstannyń, atap aıtqanda Qaraǵandy oblysynyń avtomobıl ónerkásibin damytýǵa óz úlesimizdi qosýǵa daıynbyz. Joba jańa jumys oryndaryn qurý, ımportty almastyrý jáne eksporttyq áleýetti qamtamasyz etý sııaqty ólshemderge sáıkes keledi», dep atap ótti N.Maganov.
Birden aıta ketý kerek, qazirdiń ózinde aýqymdy jobany iske asyrý boıynsha jol kartasy ázirlengen. Asa iri jobaǵa salynatyn ınvestısııalardyń jalpy kólemi shamamen 111 mlrd teńgeni quraıdy. Jospar boıynsha zaýyt qurylysy kelesi jyldyń naýryz aıynda bastalmaqshy.
Reseılik ınvestordyń aıtýynsha, iske qosylýy 2022 jyl dep boljanǵan kásiporyn arada úsh jyl ótkende óziniń jobalyq qýattylyǵyna tolyq qol jetkizbekshi. Iаǵnı kásiporyn jylyna 3 mln jeńil kólik shınasy men 0,5 mln júk kóliginiń shınasyn jasaıtyn bolady. Al jergilikti klımattyń ereksheligine sáıkes jasalynatyn «Made in Kazakhstan» tańbaly bul ónimder ishki naryqpen qatar shetelderge de eksportqa shyǵarylmaqshy.
Qaraǵandy oblysynyń basshylyǵy sheteldik ınvestorǵa qoldan kelgen kómektiń bárin kórsetip jatyr. Mysaly, kásiporyn qurylysyna jer telimi berilip, oǵan ınfraqurylymdy jetkizý bastalǵan. Qazirdiń ózinde reseılik kompanııa ókilderi óńirdiń ınvestısııalyq klımatyna joǵary baǵa berip otyr.
Jergilikti «Saryarqa» áleýmettik-kásipkerlik korporasııasy bul jobaǵa qatysýshy retinde ózindik úlesin qosady.
Jańa óndiris ornynyń óńir úshin jańa baǵytty damytýǵa múmkindik beretin mańyzdy joba bolǵaly turǵany ras. Eń bastysy, zaýyt iske qosylǵan kezde myńnan astam jańa jumys oryndary ashylady. Investor men jergilikti atqarýshy bılik arasynda ótken kezdesýde aıtylǵandaı, kásiporynda jergilikti mamandar jumys isteıtin bolady. Sondaı-aq jańa jumys oryndarynan úmittilerdi Tatarstanda oqytyp alý da daıarlyq baǵdarlamasy boıynsha qarastyrylǵan.
Jalpy, Qaraǵandy oblysy kórshiles Reseı memleketiniń aımaqtarymen kóptegen sala boıynsha áriptestik tyǵyz qarym-qatynas ornatqan. Mysaly, qazirgi tańda óńirde 891 birlesken kásiporyn jumys isteıdi. Al bıylǵy taýar aınalymynyń 1 mlrd AQSh dollarynan asqany taraptar arasyndaǵy iskerlik baılanystardyń óse jáne nyǵaıa túskenin baıqatady.
Búgingi tańda shaǵyn ǵana Saran qalasy ınvestorlardy magnıtshe tartqan qutty meken bolyp tur. Joǵaryda aıtylǵan shına shyǵaratyn kásiporynnan basqa, qaladaǵy burynǵy rezına-tehnıkalyq buıymdary zaýytynyń aýmaǵynda qytaılyq Yutong kompanııasymen birlesip avtobýs shyǵaratyn jańa zaýyt salynyp jatyr. Jospar boıynsha kásiporyn jyl sońyna taman óziniń alǵashqy ónimin shyǵarmaqshy. Joba júzege asyrylǵanda 1 100 adam jumyspen qamtylady degen boljam bar. Zaýyt jobalyq qýatyna sáıkes, jylyna 1 200 avtobýs jáne 500 arnaıy tehnıka shyǵara alady. Daıyn ónim el aýmaǵynda satylady, sondaı-aq jaqyn shetelderge eksporttalýy múmkin.
Jalpy alǵanda, Sarandaǵy bul jarqyn jobalar iske asqanda, shaǵyn qalanyń ındýstrııalyq aımaǵyn ǵana emes, onyń áleýmettik jaǵdaıyn da jandandyrýǵa ıgi yqpalyn tıgizedi degen úmit bar.
Qaraǵandy oblysy
