Tuńǵysh Prezıdent kúnine oraılastyrylǵan is-sharaǵa Qazaqstan Repýblıkasynyń Tuńǵysh Prezıdenti – Elbasy kitaphanasynyń dırektory, saıası ǵylymdardyń doktory, professor Ámirhan Rahymjanov, ál-Farabı atyndaǵy QazUÝ rektory, akademık Ǵalymqaıyr Mutanov, ýnıversıtet ǵalymdary, BAQ jáne qoǵam ókilderi qatysty. Olar BUU-nyń turaqty damý boıynsha "Akademııalyq yqpal" baǵdarlamasyn júzege asyratyn jahandyq habtyń jumysymen tanysty.
Bul habqa ál-Farabı atyndaǵy QazUÝ-dyń "Máńgilik el" tarıhı-kórkem kesheni jetekshilik etedi. Keshenge ál-Farabı mýzeıi, "Alash", "Abaı", Qazaqstan Repýblıkasynyń Tuńǵysh Prezıdenti – Elbasy zaldary, "Uly dalanyń jeti qyry", "Máńgilik el" ekspozısııalary kiredi. Meımandar joǵarǵy oqý ornynyń ǵylymı kitaphanasymen tanysyp, XVII ǵasyrdyń sırek kezdesetin basylymdary men biregeı arab, shaǵataı qojazbalaryn tamashalady.
Ámirhan Rahymjanov 300-den astam álemniń iri joǵarǵy oqý oryndarymen seriktes bolyp keletin, memlekettiń myqty kadrlaryn daıyndaıtyn ustahana retinde ál-Farabı atyndaǵy QazUÝ-diń rólin atap ótti.
"2009 jylǵy 13 qazanda N.Á. Nazarbaev "Qazaqstan daǵdarystan keıingi kezeńde: bolashaqqa qaraı ıntellektýaldy serpin" dárisin QazUÝ-da oqyǵan bolatyn. Bul dáris taıaýda jaryq kórgen "Qazaqstan Respýblıkasynyń Tuńǵysh Prezıdenti – Elbasy N.Á. Nazarbaevtyń álemniń jetekshi ýnıversıtetterinde oqyǵan dáristeri" kitabyna engen. Tusaýy kesilgen zal – táýelsiz memlekettiń qurylýy men nyǵaıýy tarıhynan syr shertetin materıaldardy toǵystyrǵan aǵartý ortalyǵy. Elbasy murasy – el kelesheginiń irgetasy. Bul zalǵa kelgen joǵarǵy oqý ornynyń kez kelgen stýdenti men qonaǵy damýǵa qajetti serpindi ala alady", dedi Á.Rahymjanov.
Is-shara barysynda Elbasy kitaphanasy ýnıversıtetke mekemeniń avtorlyq 100 kitabyn syıǵa tartty. Bul basylymdardy daıyndaǵan jumys tobyna Elbasy keńsesiniń basshysy, saıası ǵylymdardyń doktory, professor M.B.Qasymbekov jetekshilik etken.
Ál-Farabı atyndaǵy QazUÝ rektory Ǵalymqaıyr Mutanov Elbasy kitaphanasynyń kóp jyldyq seriktestigine rızashylyǵyn bildirip, Qazaqstan Repýblıkasy Tuńǵysh Prezıdenti zalyn qurýda qoldaý tanytqanyna alǵysyn aıtty.
"Bul zaldyń qundylyǵy – mańyzdy aqparattyń magıstranttarymyz bez doktoranttarymyzǵa qol jetimdi ete túsýinde. Bul jerde elimizdiń jetekshi ǵalymdary bastaǵan konferensııalar men forýmdar ótetin bolady. Zal materıaldary áli de tolyǵa bermek. Bul istiń shymyldyǵyn ashyp, kitaphanamyzdyń qoryn ult tarıhymen sýsyndatqan Elbasy kitaphanasyna alǵysymyz zor", dedi Ǵ.Mutanov.
Zal qory kóbinde táýelsizdiktiń alǵashqy jyldaryn qarastyrǵan Elbasynyń ǵylymı zertteýleri men kitaptarynan, ózge de materıaldardan quralǵan. Bul jerde arhıv qujattary kóshirmeleri, foto, beıne qujattar, baspa materıaldary, Elbasynyń balalyq shaǵy men stýdent kezi, eńbek joly men qoǵamdyq-saıası qyzmeti týraly fılmder usynylǵan.
Stýdentter men ǵalymdardyń nazaryna usynylatyn Elbasy kitaphanasynyń "Qazaqstan Respýblıkasynyń Tuńǵysh Prezıdenti – Elbasy N.Á. Nazarbaevtyń álemniń jetekshi ýnıversıtetterinde oqyǵan dáristeri" kitaby Nursultan Nazarbaevtyń ál-Farabı atyndaǵy QazUÝ sııaqty iri joǵarǵy oqý oryndarynda oqyǵan dáristerin qamtıdy.
Zal ǵylymı-praktıkalyq konferensııalar men semınarlardyń uıytqysyna, sarapshylar qaýymdastyǵy men mádenıet, bilim salasynyń mamandary men mamandarynyń basyn qosatyn oshaqqa aınalmaq.
