Balqash kóliniń jaǵalaýyn damytýdyń Bas jospary 2013 jyly jasalǵan. Jıynda sol qujat jobasyna sáıkes kól jaǵalaýyna ınjenerlik ınfraqurylymdar júrgizý, elektr jelisin tartý, jol salý máseleleri týraly sóz boldy.
Máselen, jobaǵa sáıkes 15 shaqyrym avtokólik jolyn tóseý, 50 km sý qubyry júıesin salý, 40 km káriz júıesin júrgizý, 55 km elektr jelilerin tartý josparlanǵan. Jobalaýshy mekeme tarapynan elektr jelisin Tentek, Kókterek, Lepsi qosalqy stansalary arqyly tartý usynylǵan. Alaıda Amandyq Batalov bul jumysty eki kezeńge bólip, alǵashqy kezeńin eń jaqyn ornalasqan Lepsi qosalqy stansasy arqyly tartý qajettigin aıtty. Sol sııaqty jaǵalaýǵa aparatyn joldarmen qatar radıaldy joldar salýdy da qarastyrýdy tapsyrdy.
Sonymen qatar taý týrızmine ınvestorlardyń qyzyǵýshylyǵyn arttyrý úshin jol jóndeý jumysyna oblys ákimi qoldaý bildiretinin aıtty. Aýdan ákimine qurylys jumystaryna ketetin barlyq esep-qısapty anyqtap ákelýdi tapsyrdy.
- Balqashqa qatysty arnaıy bıznes-forým ótkizý kerek. Týrıstik aımaq retinde Balqashty bári biledi. Biraq biz ony ınfraqurylymy tartylǵan, jaǵdaı jasalǵan kól jaǵalaýy retinde bıznesmenderge tanystyrýymyz kerek, - dedi A.Batalov.
