Oǵan qosa táýligine 2 myń zertteý jasaıtyn taǵy 4 zerthanany qosymsha iske qosý josparlanǵan. Qorda 50,6 myń zertteýge jetetin test-júıeler jıyntyǵy bar. Búgingi kúni óńirde PSR tásilimen 241 myń zertteý jasalǵan.
Oblystyq densaýlyq saqtaý basqarmasynyń habarlaýynsha, qazirgi kezde aımaqta KVI-den emdeýge arnalǵan 686 ınfeksııalyq baǵyttaǵy tósek bar. Sonyń 139-y qazir bos emes, júkteme 20,2% qurap otyr. Epıdemıologııalyq jaǵdaı kúrdelenetin bolsa, tósek orny 5 280-ge deıin ulǵaıtylady, sonyń ishinde 1900 tósek ınfeksııalyq jáne 2780 tósek provızorlyq bolmaq. Bul rette daıyndalǵan 5280 tósektiń 45% kıslorodpen qamtamasyz etiledi.
Oblystyń medısınalyq mekemelerinde dári-dármektiń eki aılyq qory jáne jeke qorǵanys quraldarynyń úsh aılyq qory jınaqtalǵan. Jeke qorǵaný quraldaryn shyǵarý isi de jolǵa qoıyldy. Bul baǵyttaǵy iri kásiporyndar qatarynda "Dolche", "SP "Abdı Ibrahım Global Farm", "Kelýn-Kazfarm" JShS-lary bar.
Sol sııaqty qorǵaný betperdelerin tigýge 5 tigin kásiporny beıimdeldi, Taldyqorǵan qalasynda úsh qabatty betperde tigetin seh jumys isteıdi. Jalpy táýligine 250 myńnan astam betperde shyǵarylady. Sonymen birge 2 kásiporyn táýligine 40 myń lıtrden astam dezınfeksııalaýshy quraldar shyǵarady.
