Byltyrdan bastap aýdannyń bilim berý jáne densaýlyq saqtaý salalarynyń jáne basqa mekemeleri eskertkishti ashý qoryna bir kúndik eńbekaqylaryn aýdardy. Sonyń ózinde qarjy tapshy boldy. Alaıda, «Stroıservıs» JShS qolda bar qarajatpen kóriktendirý jáne eskertkishti turǵyzý jumystaryn júrgizýge kelisti. Músinshi Aıapbergen Qarpekovtiń jobasy tańdap alynyp, jumys qarqyndy júrgizildi. Eskertkishti ornatý jumystaryna alǵalyq aýǵan soǵysynyń ardagerleri de uıymshyldyqpen atsalysty. «Alǵa aýdandyq aýǵan soǵysy ardagerleri» qoǵamdyq birlestiginiń tóraǵasy Kenjebaı Kósherbaevtyń aıtýynsha, qazir aýdanda 54 aýǵan soǵysyna qatysýshy turady.
Eskertkishtiń ashylý saltanatynda sóz alǵan aýdan ákimi Asqar Sherııazdanov bul óte mańyzdy is bolǵanyn atap ótti. Eskertkish erlikke taǵzymnyń azamattyq úlgisi ekenin jetkizdi. Aýǵan soǵysyna qatysýshy jaýyngerlerdiń erligine qurmet retinde baǵalady. Parlament Májilisiniń depýtaty, Halyq Qaharamany Baqytjan Ertaevtyń osy sharaǵa arnaıy kelýiniń ózi onyń mańyzyn arttyra tústi. Ol jınalǵandar aldynda aýǵan soǵysyna qatysýshy jaýyngerlerdiń erligi, ulttyq patrıotızm, otansúıgishtik, azamattyq paryz týraly oılaryn aıta kelip, aýǵan soǵysy jaýyngerlerine qoıylǵan mundaı eskertkishtiń ázirge aýdan ortalyqtarynda kezdespeıtinin jetkizdi. Bul ınternasıonaldyq boryshyn óteý jolynda qaza tapqandardyń erligin este saqtaýdyń, sondaı-aq, aramyzdaǵy aýǵan soǵysy ardagerlerine qurmettiń úlgisi ekenin atap ótti.
Satybaldy SÁÝIRBAI,
«Egemen Qazaqstan».
Aqtóbe oblysy.
