Keshe Astana qalasynda KAZENERGY qaýymdastyǵynyń Úılestirý keńesiniń uıymdastyrýymen adam kapıtalyn damytýǵa arnalǵan májilis ótti. Oǵan Munaı jáne gaz mınıstrligi men qaýymdastyq qyzmetkerleri, sondaı-aq, Bilim jáne ǵylym mınıstrligi men birqatar qoǵamdyq uıymdar qatysty.
Keshe Astana qalasynda KAZENERGY qaýymdastyǵynyń Úılestirý keńesiniń uıymdastyrýymen adam kapıtalyn damytýǵa arnalǵan májilis ótti. Oǵan Munaı jáne gaz mınıstrligi men qaýymdastyq qyzmetkerleri, sondaı-aq, Bilim jáne ǵylym mınıstrligi men birqatar qoǵamdyq uıymdar qatysty.
Otyrysty bastaǵan KAZENERGY qaýymdastyǵynyń bas dırektory Áset Maǵaýov jıynǵa qatysýshylardy aldymen kadrlyq ózgeristermen tanystyrdy. Onyń aıtýyna qaraǵanda, Úılestirý keńesine taǵy eki teń tóraǵa taǵaıyndalypty. Onyń birinshisi – burynǵy Eńbek jáne halyqty áleýmettik qorǵaý mınıstri bolǵan, búginde «QazMunaıGaz» AQ-tyń Adam resýrstary basqarmasynyń basqarýshy dırektory Serik Ábdenov eken. Ekinshisi – elimizdegi munaı-gaz salasynda birneshe jyldardan beri basshylyq qyzmetterde bolǵan Muqash Murat. Bul eki teń tóraǵa qaýymdastyqtyń áleýmettik áriptestik salasynda qyzmet etpek.
KAZENERGY qaýymdastyǵynyń uıymdastyrýymen ótken jıynda munaı jáne gaz salasyna qajetti mamandardyń sanyn belgileý jónindegi máseleler, 2014 jylǵa arnalǵan jumys jospary men sertıfıkattaý ortalyǵyn qurý úlgileri talqylandy. Sonymen qatar, otyrys barysynda Munaı jáne gaz mınıstrligi, KAZENERGY qaýymdastyǵy jáne Munaı jáne gaz sektory jumysshylarynyń kásiptik odaǵy arasynda 2014-2016 jyldarǵa arnalǵan salalyq úsh jaqty kelisimge úsh mekemeniń basshylary qol qoıdy.
«Atalǵan kelisim boıynsha, munaı jáne gaz salasyndaǵy jumysshylardyń qyzmetiniń aýyr ekendigi eskerile otyryp, jumys ýaqyty aptasyna 40 saǵattan, ıaǵnı táýligine 8 saǵattan aspaýy tıis. Eger de jumys ýaqyty bekitilgen ýaqyttan asyp jatsa, onda jumysshyǵa qosymsha aqy tólenedi», dedi Qazaqstan Kásipodaqtar federasııasynyń tóraǵasy Ábilǵazy Qusaıynov.
«Osy kelisimshartty jasaýdaǵy basty maqsat – salanyń birizdilikpen damýyn qalyptastyrý. Sóıtip, kompanııalardaǵy áleýmettik turaqtylyqty qamtamasyz etý tetigin retteý bolyp tabylady. Oǵan qosa, eńbekaqy men ótemaqy tóleý isinde salalyq kepildemelerdiń tómengi mólsherin belgileıdi. Eńbek qaýipsizdigi men onyń shartyn jetildirip, eldegi zań men halyqaralyq eńbek quqynyń normalaryn sáıkestendiretin tetikterdi jasaıdy», dedi bas dırektor.
Nurbaı ELMURATOV,
«Egemen Qazaqstan».
