Degenmen ýaqyt óte kele tompaq qyzdyń eńbeksúıgishtigi Elmıra Álıeva syndy bilikti bapkerdiń nazaryn ózine aýdara bastaǵan. Aıtqandy qaǵyp alyp, týra kóńilden shyǵatyndaı isteýge tyrysatyny unady. Suńǵyla bapker onyń ústel tennısine ıkemdiligin birden baıqaǵan. Aýnap aı, jyljyp jyl ótip jatty. Záýreshtiń boıynda sportshyǵa tán tabandylyq pen qaısarlyqtan bastaý alatyn minez-qulyq qalyptasty. Árbir oıynda jeńiske jetip, birinshi bolýǵa yntyq qushtarlyq ta birte-birte paıda bola bastaǵan.
Kóp uzamaı alǵashqy jeńister de tóbe kórsete bastady. Basynda Qaraǵandy oblysy boıynsha ózinen jasy áldeqaıda úlken qarsylastaryn birinen soń birin jeńip, respýblıka deńgeıindegi jarystardyń jeńis tuǵyryna jıi kóterile bastady. Sonyń nátıjesinde jasóspirimder arasyndaǵy ulttyq qurama sapyna qabyldanyp, halyqaralyq týrnırler men Azııa chempıonattarynda tabysty óner kórsetip júrdi. Osynyń bári jas qyz úshin mańdaı ter, mehnatty eńbekpen kelgen nátıje edi.
Záýresh Aqashevanyń juldyzy bıyl jarqyraı jandy. Qańtar aıynda Qaraǵandy qalasynda ústel tennısinen Qazaqstannyń jekeleı jáne komandalyq chempıonaty ótken bolatyn. Mine, osy synda Záýresh tamasha óner kórsetip, úsh birdeı altyn medal alyp, elimizdiń absolıýtti chempıony atandy. Táýelsiz Qazaqstan sportynyń tarıhynda qazaq qyzdarynyń arasynan buryn mundaı bıikti birde-bir sportshy baǵyndyryp kórmegen edi.
Osy tolaıym tabysynan soń, Záýresh eresekter arasyndaǵy Ulttyq qurama komanda sapyndaǵy ornyn «shegelep» qoıdy. Bul degenińiz, qazaqtyń qarshadaı qyzynyń keler jyl dodasy bastalady dep júrgen Tokıo Olımpıadasyna qatysýy bek múmkin degen sóz. Álbette, alda lısenzııa úshin jan alysyp, jan berisken jekpe-jekterdiń bolary sózsiz. Al Záýresh bolsa, ózine senimdi.
Ústel tennısindegi úrdisti únemi qadaǵalap júretin Záýresh álemniń birneshe dúrkin chempıony Fan Chjendýn esimdi qytaı tennısshisiniń oıynyn ózine úlgi etedi eken. «Fan Chjendýn – dúnıe júzindegi álemniń eń jas chempıony: altyn medaldy 17 jasynda jeńip alǵan. Ol oń qolymen oınaıdy, raketkany eýropalyq tásilmen ustaıdy. Negizinde ol shabýyldaýshy mánerdiń oıynshysy», deıdi Záýresh.
Qazir ózi Qaraǵandy memlekettik ýnıversıtetiniń dene tárbıesi jáne sport fakýltetinde bilim alyp júr. «Bos ýaqytymda tátti-dámdi toqash túrlerin pisirgendi jaqsy kóremin», deıdi sportshy qyz. О́ziniń bolashaqtaǵy ómiri sportpen, onyń ishinde tennıspen tyǵyz baılanysty bolatynyna senimdi.
«Meniń alǵashqy jáne qazirgi jattyqtyrýshym – Elmıra Qaıyrqyzy Álıeva. Ol kisi jattyǵýda tártipti qatań saqtaıtyn bapker. Tártip bolǵan jerde nátıje de bolady degen qaǵıdatty ustanady», deıdi Záýresh óziniń bapkeri týraly.
Elmıra Álıeva kezinde ústel tennısinen úlken tabysqa jetken sportshy boldy. KSRO-nyń sport sheberi ataǵyn ıemdenýdiń ózi onyń qandaı tennısshi bolǵanyn ańǵartsa kerek. Elmıra Qaıyrqyzy óziniń sporttyq mansabynda bes jyldaı Qazaqstan qurama komandasynyń sapynda óner kórsetken. Elimizdiń birneshe dúrkin chempıony atandy. Keńes Odaǵy kýbogy synynda júldeger bolsa, KSRO birinshiliginde top jarǵan tamasha jetistigi de bar.
«Záýreshtiń basqa tennısshilerden basym túsip turatyn qasıetteriniń biri – shapshańdyǵy men kúshtiligi. Shardy shyrqyratyp turyp urǵanda, oqsha zýlatady. Qorǵanysy myǵym, kóbine shabýyldap oınaǵandy jaqsy kóredi», deıdi Qazaqstannyń eńbek sińirgen jattyqtyrýshysy Elmıra Álıeva shákirti týraly syr aqtaryp.
Záýreshtiń otbasyn taza sportshylar shańyraǵy dep aıtýǵa kelmes. Ákesi Ramazan Dúısentaıuly ekonomıst mamandyǵy boıynsha eńbek etedi eken. Al anasy Tatıana Borısovna Sın zańger bolyp jumys isteıdi. Degenmen anasy jas kezinde sportqa qatty áýes bolǵan eken: basketbol, voleıbol, shańǵymen aınalysypty. Al Záýreshtiń ózi úıdegi bes balanyń kenjesi.
Talantty tennısshi Qaraǵandy oblystyq dene tárbıesi jáne sport basqarmasy tarapynan jasalyp jatqan jaǵdaıǵa rıza ekenin aıtady. «Qazir joǵary deńgeıde nátıje kórsetip júrgen sportshylardyń stıpendııasy kóterilgen, basqa da turmystyq deńgeıdegi máseleler sheshimin tolyqtaı tapqan. Basshylyq jaǵynan jan-jaqty qamqorlyqty sezingen saıyn jankúıerdi uıatqa qaldyrmaýǵa, namysty qoldan bermeýge tyrysasyń. Munyń ózi kez kelgen sportshyǵa úlken jaýapkershilik júkteıdi», deıdi sańlaq sportshy.
Qazir Záýresh qurama sapynda Talǵardyń mańyndaǵy «Aqbulaq» olımpııalyq ortalyǵynda oqý-jattyǵý jıynynda júr. Sátin salsa, aldymyzdaǵy qańtar aıynda Qaraǵandyda Tokıo Olımpıadasynyń joldamalary sarapqa salynatyn halyqaralyq týrnır ótpekshi. Osy synda biz Záýreshteı qazaq qyzy úshin taqym qysyp, talantty tennısshiniń tileýin tileıtin bolamyz.
QARAǴANDY
