Qazaqstan halqy Assambleıasy muryndyq bolǵan keńes otyrysyna Qazaqstan halqy Assambleıasy Tóraǵasynyń orynbasary Janseıit Túımebaev, Parlament Májilisi Tóraǵasynyń orynbasary V.Bojko, Aqparat jáne qoǵamdyq damý vıse-mınıstri M.Ázilhanov, Qoldanbaly etnosaıası zertteýler ınstıtýtynyń dırektory T.Qalıev, Prezıdent janyndaǵy Qazaqstan strategııalyq zertteýler ınstıtýtynyń dırektory Z.Sháýkenova, Qazaqstan halqy Assambleıasynyń ǵylymı-sarapshylyq keńesiniń tóraıymy A.Sádýaqasova, basqa da qazaqstandyq sarapshylar men ǵalymdar, QHA ǵylymı-sarapshylyq keńesiniń jáne QHA músheleri, memlekettik organdar men etnomádenı birlestikterdiń ókilderi qatysty.
Qazaqstan halqy Assambleıasynyń 25 jyldyǵy men Tuńǵysh Prezıdent kúni qarsańynda ótkizilip otyrǵan ǵylymı-sarapshylyq keńesiniń keńeıtilgen otyrysy barysynda alǵashqylardyń biri bolyp sóz alǵan Qazaqstan halqy Assambleıasy Tóraǵasynyń orynbasary Janseıit Túımebaev «Assambleıanyń 25 jyldyǵy Táýelsizdik jyldary júrgizilip kele jatqan beıbitshilik pen kelisim saıasatynyń sımvolyna aınaldy», dedi.
Sonymen birge ol 11 qarashada Elbasynyń tóraǵalyǵymen jáne Memleket basshysynyń qatysýymen ótken Assambleıa Keńesi uıym jumysyna jańa serpin bergenin aıta kele, qazirgi ýaqytta etnosaralyq qatynastar salasynda atqarylyp jatqan jumystar týraly da sóz etti.
«Qazaqstannyń saıasaty men ultaralyq qarym-qatynas modeli barlyq halyqaralyq standartqa sáıkes keledi. Elbasy Nursultan Nazarbaev osy saıası baǵdardyń arqasynda eldiń áleýmettik jáne mádenı ortasy ózgerip kele jatqanyn aıtyp ótti. Qoǵamdyq sanany jańǵyrtýǵa baǵyttalǵan «Rýhanı jańǵyrý» baǵdarlamasy qazaqstandyqtardyń oı júıesine, halyqtyń ómirine oń ózgeris ákelip, memlekettik til jalpyǵa ortaq moıyndalǵan, biriktirýshi til róline ıe boldy. Assambleıa Arys pen Maqtaaral aýdanyndaǵy oqıǵalarda úlken áleýmettik kómek kórsetti. Bul baǵyttaǵy jumys jalǵasyn tabady», dedi J.Túımebaev.
Sonymen qatar QHA Tóraǵasynyń orynbasary Janseıit Túımebaev ultaralyq qarym-qatynas bilim, mádenıet, til saıasaty salasyndaǵy kóptegen jumys júrgizýge tikeleı baılanysty ekenin jetkize otyryp, Elbasy Assambleıa keńesinde jańa ınklıýzıvti saıasatqa suranys baryn málim etkenin eske saldy: «Memlekettik til biriktirýshi faktorǵa aınalýy tıis. Ol elimizdiń birligin bekemdeı túsedi. Bizge bilim salasynda da, azamattyq ortada da memlekettik tildi úıretetin ǵylymı turǵyda negizdelgen ádistemesi kerek. Elbasy bul turǵyda tapsyrma berdi. QHA Ǵylymı-sarapshylyq keńesi bul jumysqa óz úlesin qosýy tıis. Keler jyly Táýelsizdigimizge 30 jyl tolady. Iá, otyz jyl da óte shyqty. Osy kúnge jetý úshin barsha qazaqstandyq birlese aıanbaı eńbek etti. «Damýdyń syry – birlikte, tabystyń syry – tirlikte» ekenin kókeıge berik túıgen el ozady. Osy jolda ǵylymı-sarapshylyq keńestiń qosar úlesi zor ekendigine senimdimin. Birligi jarasqan, Týy bıik, tuǵyry berik Qazaq eli máńgi jasasyn!», dep túıindedi.
Sondaı-aq otyrys barysynda qatysýshylar «QHA qalyptasýyndaǵy Qazaqstan Respýblıkasynyń Tuńǵysh Prezıdenti N.Á.Nazarbaevtyń róli», «Qazaqstandyq biregeılikti qalyptastyrý», «Memlekettik jáne til saıasatyn damytýdaǵy Qazaqstan halqy Assambleıasynyń róli» taqyryptarynda óz oılaryn ortaǵa saldy.
Is-shara sońynda «Qazaqstan halqy Assambleıasy: birlik pen kelisimniń 25 jyly» atty kitabynyń tusaýkeseri ótti.
