Búgin, 1 jeltoqsan kúni Lıvannyń soltústiginde sýnnıtter men alavıtter arasynda qaıtadan urys qımyldary bastaldy. Bul týraly ITAR-TASS habarlady.
«Lıvannyń Trıpolı qalasynyń soltústik bóliginde keskilesken urys qımyldary júrip jatyr. «Ál-Manar» televıdenıesiniń habaryna qaraǵanda, túnde sýnnıt-sodyrlardyń bir toby alavıtterdiń Djebel Mohsendegi anklavyna shabýyl jasap, kepilge adam alyp ketýge áreket jasaǵan. Qarýly shabýyl oqıǵaǵa Lıvan áskerleri aralasqannan keıin ýaqytsha toqtap turǵan kezde oryn aldy», - dep málimdeıdi agenttik tilshisi.
Bul qaqtyǵystardan toǵyz adam qaza bolyp, toǵyz soldatty qosyp esepke alǵanda qyryq adam jaraqattanyp qaldy..
Jeksenbi kúni tańerteń Zahrııa, Azmı jáne Karam kóshelerinde, sondaı-aq Sırııamen shekara aýmaǵynan tartylatyn halyqaralyq tas joldyń boıynda atys bastaldy. Sodyrlar taǵy granatometti belsendi túrde qoldanýǵa kiristi. Bul áreket jurtty baspalarda tyǵylýǵa májbúr etýde. Kólemi jaǵynan eldegi ekinshi qalada tirshilik toqtap qaldy.
Sırııadan 30 shaqyrym jerdegi Trıpolıde bolyp jatqan oqıǵalardy Beırýt kommentatorlary óz elderindegi jaǵdaılarmen baılanystyra qarastyryp otyr. Munda Sırııa búlikshileri Lıvannyń soltústigindegi sýnnıt fýndamentalısterinen keń qoldaý alýda. Al hrıstıandarmen qosqanda, trıpolıdegi úlesi 20 paıyzdan aspaıtyn alavıtter kerisinshe Bashar Asad úkimetiniń odaqtastary retinde qımyl kórsetip keledi.
Baqytbek Keneshuly.
Derekkóz: «ITAR-TASS»
