Esterińizge sala keteıik, Bas memlekettik sanıtarlyq dárigerdiń qaýlysyna sáıkes Túrkistan oblysynyń aýmaǵynda koronavırýstyq ınfeksııanyń taralýyna jol bermeý maqsatynda karantın engizilgen. Kún saıyn polısııa men SES jáne basqa da múddeli organdardyń ókilderinen turatyn arnaıy toptar halyq arasynda karantın talaptaryn saqtaý boıynsha profılaktıkalyq jáne túsindirý jumystaryn júrgizedi. Mobıldik toptar dúkender, bazarlar, oıyn-saýyq oryndary, dárihanalar jáne ózge de saýda oryndarynda sanıtarııalyq-epıdemıologııalyq normalardyń buzylýyn anyqtaý maqsatynda tekseredi. Osyǵan qaramastan, keıbir azamattar men mekemelerdiń ıeleri bul talaptardy elemeı, otbasylyq jáne úılený toılaryn uıymdastyryp, kóbinese týystary men shaqyrylǵan qonaqtarynyń ómiri men densaýlyǵyna qaýip tóndiredi.
Mysaly, Tóle bı APB-niń qyzmetkerleri reıdtik is-sharalar kezinde aýyldardyń biriniń janynda kezekti “kókpar” jaıtyn anyqtady. Tártip saqshylary “kókparǵa” qatysýshylardy dereý toqtatyp, olarmen karantındi buzýǵa jol bermeý týraly túsindirý jumystaryn júrgizip, túgel úılerine taratty. Is-sharany uıymdastyrýshyǵa QR ÁQBtK-niń 425-baby (Halyqtyń sanıtarlyq-epıdemıologııalyq salaýattylyǵy salasyndaǵy zańnama talaptaryn, sondaı-aq gıgıenalyq normatıvterdi buzý) boıynsha ákimshilik hattama toltyryldy. Jınalǵan materıaldar zańdy sheshim qabyldaý úshin tıisti quzyretti organdarǵa jiberildi. Nátıjesinde “kókpar” uıymdastyrýshy Tóle bı aýdanynyń turǵynyna 30 AEK kóleminde ákimshilik aıyppul salyndy.
О́z kezeginde polıseıler Túrkistan oblysynyń turǵyndary men qonaqtaryn karantın rejımi men sanıtarlyq-epıdemıologııalyq normalardyń talaptaryn buzbaýǵa shaqyrady. Bazarlarǵa, dúkenderge jáne adamdar kóp jınalatyn basqa jerlerge, qoǵamdyq kólikterge barǵan kezde medısınalyq betperde kıip, antıseptıkterdi paıdalaný jáne áleýmettik qashyqtyqty saqtaý qajet.
