Bizdiń kezimizde qazirgideı aqparattyq tehnologııa bolǵan joq. Men ǵalym retinde qandaı bıikterge jetsem de, kitap pen merzimdi basylymdarǵa qaryzdarmyn. Sonyń ishinde kezinde «Sosıalıstik Qazaqstan» atalǵan qazirgi «Egemen Qazaqstan» gazetiniń orny aıryqsha. Onyń elimizben birge jasasyp kele jatqan baıyrǵy basylym retinde de ózindik ustanymymen oqyrmandarynyń kóńilinen berik oryn alǵany shyndyq.
Jastyq shaqta elimizdiń bas basylymyn oqýdy ádetke aınaldyrǵanymyz sonshalyq, áli kúnge bir sanyn jiberip alsaq, bir nárse jetpeıtindeı kádimgideı kóńilimiz qońyltaqsyp turady.
Bizdiń kezimizde qazirgideı aqparattyq tehnologııa bolǵan joq. Men ǵalym retinde qandaı bıikterge jetsem de, kitap pen merzimdi basylymdarǵa qaryzdarmyn. Sonyń ishinde kezinde «Sosıalıstik Qazaqstan» atalǵan qazirgi «Egemen Qazaqstan» gazetiniń orny aıryqsha. Onyń elimizben birge jasasyp kele jatqan baıyrǵy basylym retinde de ózindik ustanymymen oqyrmandarynyń kóńilinen berik oryn alǵany shyndyq.
Jastyq shaqta elimizdiń bas basylymyn oqýdy ádetke aınaldyrǵanymyz sonshalyq, áli kúnge bir sanyn jiberip alsaq, bir nárse jetpeıtindeı kádimgideı kóńilimiz qońyltaqsyp turady.
Munyń ózi «Egemenniń» eldiń múddesin kózdeıtin materıaldarynyń qundylyǵynan da bolar. Qashanda basylymda jarııalanǵan materıaldar salmaqty oı, salıqaly pikirge qurylady. Bir sáttik sensasııa qýyp ketpeıdi, eldiktiń, birliktiń sózin sóıleıdi. Halyqty tárbıeleýge, jaqsyǵa talpyndyrýǵa yqpal etetin máselelerdi qozǵaıdy. Qazaqtyń, memleketimizdiń tarıhy, salt-dástúri, mádenıeti men ádebıeti, ótkeni men búgini, alashtyń ardaqtylary jaıly eń jerine jetkize jazatyn «Egemen» desem, artyq aıtqandyq bolmas. Jazǵanda da jerine jetkize, ıleýin qandyra, qazaq tiliniń maıyn tamyza otyryp, oqyrmanǵa qajetti derekterdi mol keltiretini unaıdy.
Elimizdiń bas basylymynda ataqty ǵalymdar, jazýshylar, óner qaıratkerleri qalamynan týǵan tarıhı-tanymdyq týyndylar kim-kimdi de ózine tarta túsetini barshaǵa aıan nárse. Kúndelikti sandarynan basqa ár aıdyń sońǵy sársenbisinde 16 bet bolyp shyǵatyn «Etjeńdi «Egemen» sanyn jata-jastana oqıtynymyzdy jasyrýdyń reti joq. Mundaǵy materıaldardy kózi ashyq, kókiregi oıaý azamattardyń barlyǵy da qalt jibermeıtinin kórip júrmiz. Tipti qazir teledıdarǵa, ınternetke boı aldyrǵan stýdent jastar arasynda bul basylymnyń bedeli bıik. Olar basylymda jarııalanǵan materıaldardan kóp maǵlumat alatyndaryn aıtady. Sondyqtan bolar, taralymy eń kóp basylym da osy gazet.
«Egemen» kópultty, kópkonfessııaly elimizdegi tatýlyq pen birliktiń biriktirýshisi ispetti, ylǵı da halyqtar arasyndaǵy dostyqty nasıhattaıtyn materıaldar usynady. Elbasynyń sara saıasatyn júzege asyrýdyń barysymen, óńirlerdegi oń ózgeristermen de osy basylymnan habardar bola alasyń. Ulttyq qundylyqtarymyzdy ulyqtaý ustanymy da ornyqty. Bir sózben aıtqanda, bul gazettiń aqparattar aıdynynda ózindik qoltańbasy qalyptasqan bedeldi basylym ekeni sózsiz. Sondyqtan da, ár qazaqtyń otbasynda «Egemendi» asyǵa kútedi.
Amangeldi AITALY,
fılosofııa ǵylymdarynyń
doktory, professor.
Aqtóbe oblysy.
