Qazir Qostanaı qalasynyń turǵyndary birinshi surypty nandy 105 teńgeden satyp alyp otyr. Al Jeleznodorojnyıdyń jumsaq nany odan eki ese arzan. Aýyl turǵyndarynyń aıtýynsha, bul eldi mekende sońǵy bes-alty jyldyń ishinde nan baǵasy ózgermegen.
Jergilikti seriktestikke qarasty naýbaıhana sol mańaıdaǵy aýyldardy sapaly ári arzan áleýmettik nanmen qamtýmen qatar, neshe túrli toqash, pispe nan sııaqty shaı ishkende tiske basar jyly-jumsaq túrlerin pisiredi. Naýbaıhanadan shyqqan arzan ónim Oktıabr aýyldyq okrýgine qarasty aýyldarǵa, odan qaldy kórshiles Aqmola oblysynyń birqatar eldi mekenderine jóneltiledi.
– Kúnine shamamen 1200 bólke nan pisiremiz. Bul aýyl turǵyndaryna da, syrttan keletin shaǵyn kásipkerlerge de jetedi. Eń bastysy, un ózimizdiki. Sondyqtan baǵany turaqty ustap otyrýǵa múmkindik bar, – deıdi seriktestik basshysy Maksım Artemýk.
Jaqsynyń jaqsylyǵyn aıtpasqa bolmaıdy, taıaýda Maksım Artemýk Oktıabr aýylyndaǵy aýrýhanaǵa quny 22 mln 783 myń teńge turatyn anestezıologııalyq keshendi syıǵa tartty. Aýyl medısınasyn damytýǵa asa qajet keshenniń tósek aldyna qoıylatyn monıtory men jasandy jolmen demaldyratyn arnaıy qurylǵysy bar. Oktıabr aýrýhanasy oblys ortalyǵynan 220 shaqyrym qashyqtyqta jatyr. Sondyqtan aýyr naýqastardy der kezinde oblystyq aýrýhanaǵa jetkizý qıynǵa soǵatyn. Kásipker syıǵa tartqan asa qymbat medısınalyq qurylǵy endi mundaı naýqastardy alysqa aparmaı-aq, olarǵa aýyldyq aýrýhanada ota jasaı berýge múmkindik týǵyzyp otyr.
Dárigerlerdiń aıtýynsha, jergilikti seriktestik aýyldyń densaýlyq salasyna kópten beri qoldaý kórsetip keledi.
– Aýyldyq aýrýhana ǵımaraty osydan 3 jyl buryn «Jeleznodorojnyı AMF» seriktestiginiń qarjysyna kúrdeli jóndeýden ótti. Al 2018 jyly atalǵan seriktestik «Rýhanı jańǵyrý» baǵdarlamasy aıasynda 12 páterli turǵyn úı saldy. Bul úılerde qazir aýylsharýashylyq salasynyń qyzmetkerleri, muǵalimder men dárigerler turyp jatyr. Kóp jyldan beri ÝDZ apparatyna muqtaj bolyp kelip edik, Maksım Fedorovıch byltyr aýrýhanaǵa 15 mln teńge turatyn joǵary sapaly ÝDZ qurylǵysyn tartý etti. Qazir aýyl turǵyndary ÝDZ-tekserýden ótý úshin burynǵydaı qalaǵa sabylmaıdy, osy jerde qaralady, – dedi Oktıabr aýyldyq aýrýhanasy bas dárigeriniń mindetin atqarýshy Marına Horoshýn.
Osydan bir-eki jyl buryn oblys basshysynyń bastamasymen qolǵa alynǵan «Kórkeıe ber, Qostanaı» arnaıy jobasy boıynsha Qarasý aýylynda 9 úı boı kóterip, muǵalimder men dárigerlerge tabys etilgen. Turmysqa jaıly ári jyly bul úılerdiń bireýi «Jeleznodorojnyı» seriktestiginiń qarjysyna turǵyzylǵanyn da aıta ketý kerek. Munyń syrtynda, jergilikti seriktestik byltyr 135 mln teńge qarjyǵa Oktıabr aýylyndaǵy kásibı-tehnıkalyq ýchılısheniń oqý ǵımaratyn da kúrdeli jóndeýden ótkizip berdi. Al aýyl mektebiniń oqý ozattary jergilikti seriktestikten aı saıyn arnaıy stıpendııa alyp otyrady.
