Oblys ákimdiginiń baspasóz qyzmetiniń habarlaýynsha, bes aýdanda qolǵa alynǵan jumystardyń tabysty júzege asýyn óz baqylaýyna alǵan óńir basshysy Saryaǵash, Keles aýdandaryn aralady.
Sapardy Jibek joly aýyldyq okrýgindegi «Bes juldyz» bala baqshasynyń jumysymen tanysýdan bastaǵan oblys ákimi 450 balany tárbıelep otyrǵan mektepke deıingi bilim mekemesiniń ujymymen sóılesip, quryltaıshysymen kezdesti.
Budan keıin óńirdiń aýyl sharýashylyǵy salasyna aıtarlyqtaı úles qosyp jatqan ónerkásiptik jylyjaı keshenimen tanysty. Jibek joly aýyldyq okrýgi, Zortóbe eldi mekeninde ornalasqan keshenniń aýmaǵy – 12,85 ga.
Ozyq tehnologııalardy paıdalana otyryp kóshet ósiretin jylyjaıda jylyna 12 mıllıon dana kóshet satylymǵa shyǵarylady.
600 mıllıon teńge ınvestısııa salynǵan nysanda kásipker óz qarjy esebinen avtomattandyrylǵan basqarý júıesi bar tóbeden búrký arqyly sýǵarý ádisimen ortalyqtandyrylǵan jylytý qazandyǵyn ornatqan.
Munan soń Jarty tóbe aýyldyq okrýgi, Yntymaq eldi mekenindegi Keles ózeniniń boıyndaǵy kópirdiń qurylysymen tanysqan О́mirzaq Shókeev uzyndyǵy 60 metr, eni 10 metr bolatyn jobanyń sapasyn tekserdi.
Keles aýdanyna jasaǵan sapar barysynda óńir basshysy Abaı aýylynda «Aýyl – el besigi» baǵdarlamasy aıasynda jóndeýden ótken Turar Rysqulov kóshesiniń jumysymen jáne Qoshqarata aýyldyq okrýgi, Jambyl eldi mekenindegi № 29 jalpy orta mektebiniń qurylysymen tanysty.
Qurylysy byltyr bastalǵan mektep 2021 jyldyń tamyz aıynda aıaqtalady dep josparlanyp otyr.
Atap óteıik, Túrkistan oblysy aýdandary men eldi mekenderiniń damýyna oń serpin beretin 67 joba qolǵa alynǵan. 10 joba Úkimet maquldaýynan ótip, 2021 jyly tıisti qarajat bólinetin boldy.
Budan bólek, oblystyq bıýdjet esebinen 40 mıllıard teńge qaralyp, 57 joba iske asyrylyp jatyr. Ol qarjynyń 30 mıllıard teńgesi bıyl bólinse, 10 mıllıard teńgesi kelesi jyly osy jobalardy aıaqtaýǵa bólinedi.
