«Sý-30sm» ushaqtary keńistigimizdi kúzetetin bolady

Jaýyngerlik tehnıkany tapsyrý saltanatyna oraı uıymdastyrylǵan is-sharaǵa Qorǵanys mınıstri, general-leıtenant Nurlan Ermekbaev, Áýe qorǵanysy kúshteriniń Bas qolbasshysy, avıasııa general-leıtenanty Nurlan Ormanbetov jáne Qaraǵandy oblysynyń ákimi Jeńis Qasymbek qatysty.

Qorǵanys mınıstri jańa avıasııalyq tehnıkanyń Qazaqstan Qarýly Kúshterin qaıta jaraqtandyrý josparyna sáıkes Áskerı-áýe kúshteriniń qaramaǵyna kelip túskenin málim etti.

– Manevrligi asa joǵary, kóp maqsatty «Sý-30SM» joıǵyshtary ásker men nysandardy áýe shabýylynan qorǵaý, áýe jáne jerdegi nysanalardy  anyqtaý men joıý múmkindigin edáýir arttyrady. Bul ushaqtardyń arqa­synda Qarýly Kúshterdiń jaýyngerlik áleýeti artady, – dep atap ótti N.Ermekbaev.

Atalǵan ushaqtar kún demeı, tún demeı, kez kelgen aýa raıynda áreket ete ala­tyn, jaýdyń ushaqtaryn atyp túsirip, jerdegi nysandardy joıyp qana qoımaı, áýe barlaýyn júrgizip, bas­qa ushaqtarǵa maqsatty nus­qaý bere alatyn, 4++ dep tań­balanatyn jańa býyn­nyń avıasııalyq tehnıkasy. Budan bólek, «Sý-30SM» joıǵyshtary uzaq qa­shyqtyqqa ushady jáne olar­ǵa aýada janarmaı quıýǵa bolady.

Reseılik áskerı mamandar bul joı­ǵysh­tardyń álem­degi eń tıimdi áskerı ushaq­tardyń biri ekenin aıtady. Mysaly, reseılik synaq ushqyshy Maksım Kolıýshın «Sý-30SM» joıǵyshymen 2012 jyldan bastap ushady eken. Onyń aıtýynsha, atal­ǵan ushaq – álemdegi eń úzdik áskerı-avıasııalyq tehnı­ka­nyń biri.

Reseıden kelgen jańa ushaq­tardyń qulaǵynda oınaý úshin Qaraǵandy avıa­sııa­lyq bazasynyń ushý jáne ın­jenerlik-tehnıkalyq qu­ramy Taldyqorǵan qala­synda jáne Irkýtsk avıa­sııalyq zaýytynda tolyq qaıta oqytýdan ótken. Búgingi kúnde olardyń bul ushaq­tarmen ushýǵa, olardy paıdalanýǵa jáne qyzmet kórsetýge tıisti ruqsattary bar. Jalpy, bizdiń taraptyń «Irkýtsk» avıasııalyq zaýytymen yntymaqtastyǵy budan bes jyl buryn bastalǵan eken.

Teorııa men tájirıbeden turatyn eki kezeńdik qaıta oqytýdan ótken ushqyshtyń biri Temirlan Báımenov. Ol óziniń aldaǵy ýaqytta zamanaýı «Sý-30SM» joıǵy­shymen ushatynyna óte qýa­nyshty ekenin jetkizdi. Jas ushqysh atalǵan avıasııalyq tehnıkanyń arqasynda áýe keńistigimizdiń qorǵanysy nyǵaıa túsetinin senimdi túrde aıtty.

Al oblys ákimi Jeńis Qa­symbek áskerı­lerge qoıylǵan  mindetterdi oıdaǵydaı atqa­ryp shyǵa­ty­nyna senim bildirdi já­ne olardy osy mańyzdy oqı­ǵamen quttyqtady.

Qaraǵandy oblysy