Memorandým Kaspıı teńizindegi «Dostlýg» ken ornynyń kómirsýtegi resýrsyn ıgerý, jasaqtaý, birigip barlaýdy maqsat etedi.
Qos memlekettiń prezıdentteri seriktestik josparyn keńesip, atalǵan aımaqtyń ózekti máselelerin talqylady. Osy rette Ázerbaıjan Syrtqy ister mınıstri Djeıhýn Baıramov Túrikmenstanǵa resmı saparmen barǵanyn aıta ketken jón.
«Osy kelisim negizinde eki el «Dostlýg» ken ornynyń damýy jolynda jumys istep qana qoımaı, Túrikmenstannan Ázerbaıjanǵa Kaspıı teńizi arqyly tasymaldanatyn tabıǵı gaz máselesin sheshýdi de jolǵa qoıady dep senemin. Bul Túrikmenstan Respýblıkasynyń óz ónimin senimdi naryqqa tasymaldaýy úshin de mańyzdy degen oıdamyn», dedi jıynǵa qatysqan AQSh-tyń Ázerbaıjandaǵy burynǵy elshisi Metıý Brıza.
Iran Syrtqy mınıstri Muhammed Djavad Zarıftiń de jaqyn kúnderi Ázerbaıjanǵa saparlap baratyny belgili boldy. Odan ári mınıstr Reseı, Armenııa men Grýzııa elderine barýdy josparlap otyr.
Jańa memorandým eki energetıkalyq derjavanyń Kaspıı teńizi aımaǵynda turaqty ekonomıkanyń damýyna jaǵdaı jasaıdy degen boljam bar. Bul taqyryp Gýrbangýly Berdimuhamedovtiń 2020 jyly naýryzda Bakýǵa sapary barysynda talqylanǵan-dy. Túrikmenstan prezıdenti memorandýmnyń «Dostlýg» dep atalýy jaqsy belgi, eki el arasyndaǵy dostyqty odan ári nyǵaıtady degen senimin jasyrmady. Sonymen birge onyń jańa ınvestısııalarǵa bastama bolatyny da sóz etildi.
Aıta keteıik, 2018 jyly tamyzda teńizben shektesetin 5 eldiń basshylary Aqtaý qalasynda bas qosqan-dy. Qazaqstan, Ázerbaıjan, Túrikmenstan, Reseı men Iran prezıdentteri qatysqan 5-sammıtte konvensııa jobasy usynylyp, Kaspıı teńizi jaǵalaýynda ornalasqan memleketterdiń quqyqtary men jaýapkershiligi anyqtalǵan bolatyn.
