Ultymyzdyń kórnekti ókilderiniń biri, dala oıshyly, fılosof, aqyn Shákárim Qudaıberdiuly – ádebıettiń barlyq janrynda jemisti eńbek etken qaıratker. Ol adam boıyndaǵy adamgershilik qasıetterdi erekshe jyrlady. Qazaq qaýymyna adal eńbek etip, boıyna bilim nuryn sińirip, sol arqyly bıik jetistikke jetsin degen oı tastaıdy.
Onlaın-dáris barysynda jastar aqynnyń adamı qundylyqtar týraly fılosofııalyq oılarymen tanysty.
Aqyn «Maqtan úshin mal jıma, jan úshin jı, ǵıbadat pen adaldyq ar úshin jı», dep baqyttyń ózi adaldyqqa negizdeletinin aıta kelip, parasatty tulǵa bolyp qalyptasý úshin adam boıynda asyl qasıetterdiń bolýy kerektigin ashyp kórsetken.
Shákárimniń asyl oılary adaldyq, ádildik, ynsap, ádilet, meıirim sııaqty asyl qasıetterdi kirletpeýge negizdelgen.
Aqyn jastarǵa:
«Maqtan úshin mal jıma, jan úshin jı,
Qazaqqa kóz súzbestiń qamy úshin jı.
Aryń satpa, teriń sat, adaldy izde,
Ǵıbadat pen adaldyq, ar úshin jı», dep ósıet etken.
Shákárim ósıeti qazirgi órkenıetti zamanda da óz qundylyǵyn joımaıdy, ol barsha adamzattyń jan dúnıesiniń aınasy bolýy qajet. Zamandas jastardyń mindeti – dala oıshyly jyrlap ótken ar, borysh, adaldyq syndy qasıetterdi óz boılaryna daryta bilý.
Aqparat jáne qoǵamdyq damý mınıstrliginiń qoldaýymen beınesabaq respýblıkalyq jáne óńirlik telearnalar efırinde kórsetildi, sondaı-aq agenttiktiń Youtube arnasynda jáne áleýmettik jelide ornalastyryldy.
