Al Túrkistan qalasynda 12 kópqabatty úıdiń qurylysy aıaqtalyp, 660 otbasy páter aldy. Olardyń ishinde baspana kezeginde turǵan azamattar men nesıege alǵan turǵyndar bar. Sonymen qatar, Túrkistan qalasy ákimshilik iskerlik ortalyǵynda jańadan 7, 9 jáne 12 qabatty 65 turǵyn úılerdiń qurylysy júrgizilýde. Turǵyn úılerdiń qurylysy bıyl tolyq aıaqtalady. Oblystyq qurylys basqarmasynyń málimetinshe, ótken jyldyń qorytyndysy boıynsha, baspanaǵa muqtaj kezekte turǵan 800-ge jýyq otbasy turǵyn úımen qamtamasyz etildi. Atap aıtqanda, Kentaý qalasynda – 600 páter, Túlkibas aýdanynda – 24, Shardarada – 80, Saryaǵash aýdanynda 90 páter paıdalanýǵa berildi. Budan basqa, aýdan, qalalarda kópbalaly otbasylardy baspanamen qamtamasyz etý úshin ekinshi deńgeıdegi naryqtan memlekettik bıýdjet esebinen 400-ge jýyq páter satyp alyndy. Jyl qorytyndysy boıynsha barlyq baspanalar óz ıelerin tapty.
Sonymen qatar jeke turǵyn úı qurylysyna bólingen 2617 jer telimderine sý, elektr jáne gaz qubyrlary tolyq tartylyp, oblys kóleminde jer kezeginde turǵan azamattarǵa bólindi.
