Atyraý oblysynyń burynǵy ákimi Bergeı Rysqalıev qurǵan qylmystyq toptyń 22 múshesine qatysty qylmystyq is oblystyń qylmystyq ister jónindegi mamandandyrylǵan aýdanaralyq sotynyń qaraýyna kelip tústi. Osy qylmystyq is 777 tomnan turady. Bul týraly «Qazaqstan» telearnasy habarlady.
Bergeı Rysqalıev onyń aǵasy Amanjan Rysqalı men olardyń 9 sybaılasy halyqaralyq izdeýde. Olarǵa qatysty qylmystyq istiń materıaldary jeke óndiriske shyǵaryldy.
B. Rysqalıev uıymdastyrǵan qylmystyq top memleketke jáne ózge tulǵalarǵa 70 mlrd.-tan astam teńgege zalal keltirgen . Sondyqtan tergeý barysynda aıyptalýshylardyń jyljymaly jáne jyljymaıtyn múlkiniń alty júzge jýyq túrine tyıym salyndy.
Qurylǵan qylmystyq toptyń 22 múshesiniń arasynda B. Rysqalıevtiń burynǵy birinshi orynbasary Bolat Dáýkenov, orynbasary Asqar Ábdirov jáne Atyraý qalasynyń burynǵy ákimi Asqar Kerimov te bar. Al qazir sotqa kelip túsken qylmystyq isterdi qaraıtyn sýdıa belgilenip, materıaldarmen tanysý ústinde.
«Alǵashqy sot talqylaýy ústimizdegi jyldyń 24-shi jeltoqsanynda ótedi dep josparlanyp otyr. Ári qaraı qosymsha málimetterdi alǵashqy sot talqylaýy bitkennen keıin habarlaıtyn bolamyz. Jarııaly túrde ótetin bolsa, belgilengen zańǵa saı, barlyq buqaralyq aqparat quraldary qatysatyn bolady»,-deıdi oblystyq sottyń baspasóz hatshysy Boranbaı Ǵalıev.
Baqytbek Keneshuly.
Derekkóz: «Qazaqstan» telearnasy
Foto: Pravoektb.ru
