«Bul bettegi aǵashtar shyǵymy jaqsy. Qazir munda egilgen Syr talynyń 90 paıyzdan astamy shyǵyp tur. Kúre joldyń kent jaǵyndaǵy tal-daraqtyń jaǵdaıyna alańdaýly edik. «Aqkıiz» kanalynyń arnasy tazalanǵannan keıin aıaq sýdan problema bolmaý kerek»,-dedi Qazaly orman jáne janýarlar dúnıesin qorǵaý mekemesiniń bólim basshysy Býrabaı Orazǵalıev.
Sala mamanyn muqııat tyńdaǵan aýdan basshysy jasyl beldeýdegi jumystardy odan ári jandandyryp, jelektiń jaıqalyp ketýine kóp kóńil bólýdi tapsyrdy.
Munan soń Áıteke bı kentine kire beris joldyń qos qaptalyndaǵy jasyl beldeý mańynda atqarylǵan jumystarmen tanysty. Munda aryq boıyndaǵy sýdyń tuıyqtalyp qalýy óskinderdiń boı alyp ketýine kedergi keltirip tur.
Bul máseleni sheshý úshin aýdan basshysy Murat Ergeshbaev kent ákimi Qaıraqbaı Orynbasarovqa keshendi jospar daıyndaýdy tapsyrdy.
Kent ákimi aýdan ortalyǵyndaǵy jasyl jelektiń sanyn kóbeıtý maqsatynda taǵy bir joba daıyndaǵandaryn jetkizdi. Bul jasyl beldeý Áıteke bı kentiniń «Mektepbaı» ýchaskesi jaǵynda ornalasady. Aýmaǵy 5,6 gektar. Joba quny da qomaqty. Onyń ishinde jerdi daıyndaý jumystarynan bastap taldardy kútip ustaý shyǵyndary da qarastyrylǵan.
Aýdan basshysy bul jobany qoldap, oblystyq tabıǵı resýrstar jáne tabıǵat paıdalanýdy retteý basqarmasyna usynys berýdi tapsyrdy.
