Depýtattar «Qazaqstan Respýblıkasynyń dıplomatııalyq qyzmeti týraly» Qazaqstan Respýblıkasynyń Zańyna ózgerister men tolyqtyrýlar engizý týraly» zań jobasyn qarady.
Zańda qazaqstandyq dıplomattarǵa qyzmetke kirý kezinde qoıylatyn talaptar kúsheıtiletin boldy. Qujatta olarǵa memlekettik tilmen qatar shet tilderin bilýi qajettigi kózdelip otyr. Quqyq buzýshylyq jasaǵany úshin dıplomatııa salasy qyzmetkerleriniń dıplomatııalyq dárejesi tómendetiledi nemese odan aıyrý da qaralady.
Máýlen Áshimbaev atalǵan zań jobasynyń erekshe mańyzyn atap ótti. Halyqaralyq arenada Qazaqstannyń múddelerin ilgeriletýde otandyq dıplomatııalyq qyzmettiń erekshe ról atqaratyny eskerildi.
«Qujat elimizdiń dıplomatııalyq qyzmetiniń quqyqtyq bazasyn jetildiredi jáne retteıdi. Joba sondaı-aq dıplomatııalyq sala ardagerlerin áleýmettik qoldaýǵa baǵyttalǵan normalardy da qamtıdy. Qabyldanǵan Zań elimizdiń dıplomatııalyq qyzmetiniń tıimdiligin arttyrýǵa óz úlesin qosady dep úmittenemiz», - dedi Máýlen Áshimbaev.
Depýtattar zań jobasyn qaraý barysynda oǵan birqatar túzetýler engizýdi usyndy. Senatorlar, atap aıtqanda, «dıplomatııalyq qyzmet ardageri» uǵymyn túzetýdi jáne osy sanatqa jatatyn adamdar tobyn qaıta qaraýdy usyndy. Sondaı-aq dıplomatııalyq poshtany elshilikter qyzmetkerleri men olardyń otbasy músheleriniń jeke paıdalanýyna arnalǵan zattar men tehnıkany jiberýge paıdalaný quqyǵyn alyp tastaýdy surady. Zań jobasy Senattyń osy jáne basqa da túzetýlerimen Májiliske qaıtaryldy.
Búgin depýtattar «Qazaqstan Respýblıkasynyń keıbir zańnamalyq aktilerine atom energııasyn paıdalaný máseleleri boıynsha ózgerister men tolyqtyrýlar engizý týraly» zań jobasyn da qarady.
Qujat atom energetıkasy salasyndaǵy memlekettik organdardyń ókilettikteri men mindetteriniń arajigin naqty ajyratady. Bul qazaqstandyqtardyń qaýipsizdik deńgeıin arttyrýda, sondaı-aq ókilettikterdiń qaıtalanýyn boldyrmaýda mańyzdy bolyp otyr. Qujat otandyq zańnamanyń keıbir erejelerin MAGATE-niń qaýipsizdik jónindegi halyqaralyq talaptaryna sáıkes keltiredi. Zań qabyldanǵannan keıin Memleket basshysyna qol qoıýǵa jiberý týraly sheshim qabyldandy.
«Qabyldanǵan zań atom energetıkasy salasyndaǵy qyzmettiń qaýipsizdigin qamtamasyz etýi jáne osy saladaǵy zańnamany jetildirýi tıis. Qujat sondaı-aq radıasııalyq qaýipsizdikti kúsheıtý máselelerin de qamtıdy. Zań qorshaǵan orta men halyq densaýlyǵyn qorǵaý salasyndaǵy memlekettik saıasattyń tıimdiligin arttyrady», - dedi Máýlen Áshimbaev.
Senatorlar otyrysta depýtattyq saýaldardy da jarııa etti. Aqmaral Álnazarova sanıtarlyq avıasııany damytý máselesin kóterdi. Narıman Tóreǵalıevtiń saýalynda erekshe qajettilikteri bar adamdardyń problemalary jáne olardy turǵyn úımen qamtamasyz etý jaıy aıtyldy. Nurtóre Júsip balalar kardıohırýrgııasy salasynda erekshe nazar aýdarýdy talap etetin máselelerge toqtaldy, al Sultan Dúısembınov jumyrtqa men qus etiniń qymbattaýyna baılanysty problemalardy sheshý joldaryn usyndy.
