Jıyn barysynda «Nur Otan» partııasynyń «О́zgerister joly: Ár azamatqa laıyqty ómir!» saılaýaldy baǵdarlamasy aıasynda jasalynǵan Jol kartasyn iske asyrý jaıy talqylandy.
Shymkent qalasy ákimdigimen ázirlengen 5 jyldyq Jol kartada qalany damytý baǵdarlamasynyń basymdyqtary eskerilip, turǵyndardy mazalaıtyn máseleler boıynsha negizgi 10 baǵyt aıqyndalǵan. Atap aıtqanda: turǵyn úımen qamtamasyz etý, áleýmettik salany damytý, ekonomıkalyq áleýetti jaqsartý, shaǵyn jáne orta bıznestiń damýyna jaǵdaı jasaý, shalǵaıdaǵy eldi mekenderdi kórkeıtý, ekologııalyq ahýaldy, jol jáne kólik ınfraqurylymy men qoǵamdyq qaýipsizdikti jaqsartý, jastardy qoldaý, qalany sıfrlandyrý. Árbir baǵytty júzege asyrý boıynsha 149 is-shara qarastyrylǵan. Baǵdarlamany iske asyrýǵa jalpy 5 jylda 1,3 trln. teńge qarjy qajet eken, onyń ishinde memlekettik bıýdjetten – 694,5 mlrd.teńge, jeke ınvestorlardyń esebinen –619,4 mlrd.teńge.
Jıynda sóz alǵan partııanyń qalalyq fılıalynyń tóraǵasy, qala ákimi Murat Áıtenov Jol kartanyń oryndalýy baqylaýǵa alynatynyn aıtyp, qajetti mejege jetý úshin qalalyq máslıhat depýttatary korpýsy jáne «Nur Otan» partııasynyń qoldaýymen qol jetkiziletinin atap ótti.
«Barshańyz jaqsy bilesizder, elimiz damý jolynda árbir kezeńde, árbir ýaqytta – «Nur Otan» partııasyna zor jaýapkershilik júktelip keledi. Partııa basshysy, Elbasy - Nursultan Ábishuly Nazarbaev halyqtyń jaǵdaıyn jaqsartý boıynsha bul joly da naqty isterdi atqarý úshin mindetterdi qoıyp otyr.Biz bul baǵytta tıisti jumys jasaıtyn bolamyz. Ákimdik tarapynan atqarylǵan jumystar partııanyń jıyndarynda, forýmdarda tyńdalyp, fraksııa men komıssııalarmen qadaǵalanatyn bolady. Jalpy, biz qazir halyqpen etene aralasyp, ózekti máselelerdi sheshýge jumys atqaratyn bolamyz. Sheshilmeıtin másele joq.
Degenmen búgin sheshilmeıtin máseleni halyqqa egjeı-tegjeı túsindirip, qashan sheshiletindigin aıqyndap aıtýymyz qajet. Birlesken jumystardyń nátıjesinde kóptegen jetistikterge jetýge bolatyndyǵyna senimdimin»,-dedi qala ákimi.
Konferensııada Saıası keńes jáne Saıası keńes Bıýrosy músheleriniń quramy bekitildi.
