Endi, tek sanaq júrgizýshige aqparat berip qana qoımaı, sonymen qatar onlaın rejıminde jumys isteıtin mamandandyrylǵan portal qyzmetin qoldana alady. Bıylǵy sanaqtyń ereksheligi qandaı, nendeı jańashyldyq bolady? Úkimettiń bul aýqymdy naýqanǵa daıyndyǵy qandaı?
Osy jáne ózgede jáne máseleler Qazaqstan Respýblıkasynyń 2021 jylǵy Ulttyq halyq sanaǵyn júrgizý jónindegi arnaıy komıssııasynyń birinshi otyrysy barysynda sóz boldy, dep habarlaıdy QazAqparat tilshisi. Reformalar jónindegi Joǵarǵy keńeste Memleket basshysynyń tapsyrmasy boıynsha Premer-Mınıstrdiń birinshi orynbasary Álıhan Smaıylovtyń tóraǵalyǵymen arnaıy komıssııa quryldy.
Ol naýqanǵa daıyndyq pen ony ótkizýdiń negizgi uıymdastyrýshylyq jáne mazmundyq máselelerimen aınalysady. Halyqtyń sany, onyń jasy, genderlik quramy, ýrbanızasııa dárejesi, tabys deńgeıi týraly jınaqtalǵan málimetter tekserilgen, pysyqtalǵan basqarýshylyq sheshimder qabyldaýǵa negiz bolady. Onlaın sanaqty 2021 jyldyń 1 qyrkúıeginen bastaý týraly sheshim qabyldandy.
Ol 2021 jyldyń 15 qazanyna deıin mamandandyrylǵan sanaq.gov.kz veb-saıtynda jalǵasady. Saıt táýlik boıy ashyq bolady. Azamattar, qaı jerde júrse de, ózi jáne otbasy úshin saýalnama betterin toltyryp, sanaqqa óz betinshe qatysa alady. Aqparattyq qaýipsizdikti qamtamasyz etý maqsatynda Ulttyq statıstıka bıýrosy «Kıbershabýyldardy taldaý jáne tergeý ortalyǵy» ZTB-men birlesip jumystar júrgizdi.
Nátıjesinde osaldyq júıesi kúsheıtildi jáne baılanys arnasy keńeıdi. Á.Smaıylovtyń uıǵarymymen, Qazaqstan Respýblıkasynyń UQK-men birlesip, hakerlik shabýyldardyń aldyn alý maqsatynda halyq sanaǵy boıynsha aqparattyq resýrstarǵa táýlik boıy monıtorıng júrgizýdi qamtamasyz etý tapsyryldy. Sondaı-aq, Premer-Mınıstrdiń birinshi orynbasary «sanaq.gov.kz» saıtyn «Egov.kz» veb-portalymen biriktirý qajettiligin atap ótti.
Dástúrli úı-úıdi aralaý, onlaın-sanaqtan ótpegen azamattardy qamtý maqsatynda 2021 jyldyń 1 qazanynan 2021 jyldyń 30 qazanyna deıin qajetti sanıtarlyq normalardy saqtaı otyryp ótkiziledi. Sanaq júrgizýshiler planshetterdi qoldanady, bul derekter sapasyna adamı faktordyń áserin barynsha azaıtady, JSN qoldanyp naqtylyq deńgeıin joǵarylatady jáne aqparattyń qaıtalanýyn boldyrmaıdy.
Planshetke arnalǵan mobıldi qosymsha ázirlendi, onyń kómegimen suhbat berýshi barlyq kiriktirilgen arıfmetıkalyq jáne logıkalyq basqarýlardy eskere otyryp saýalnama júrgize alady, jikteýishter men anyqtamalyqtardy qoldana alady. Alynǵan derekter tikeleı ortaq derekqorǵa jiberiledi.
