Sharanyń resmı ashylý rásimine Qyzylorda oblystyq máslıhatynyń hatshysy Naýryzbaı Baıqadamov, oblystyq bilim basqarmasynyń basshysy Aqzıra Qasymova jáne óńirdegi kolledj dırektorlary qatysty.
Quzyrettilik ortalyǵy óńir ekonomıkasyn básekege qabiletti eńbek resýrstarymen qamtamasyz etý, ınjener-pedagog kadrlardyń biliktiligin arttyrý jáne qaıta daıarlaý boıynsha sapaly qyzmetter kórsetýge múmkindik beredi.
Kolledjdegi jańa ortalyq «Jas maman» jobasy aıasynda iske asyp, nátıjesinde 2 zerthanalyq kabınetpen jabdyqtalǵan. Bul «elektrmen qamtamasyz etý», «elektr jáne elektr mehanıkalyq jabdyqtar» mamandyqtarynyń stýdentteri úshin erekshe múmkindik bermek.
Jańa ortalyqta oqý zerthanasy, WorldSkills trenajarlyq jattyǵý kabıneti ornalasqan. Quzirettilik ortalyqtyń jumysyn tıimdi uıymdastyrý úshin birqatar kásiporyndarmen ekijaqty memorandým jasaldy.
Aldaǵy kezde jańa ortalyqta kóshpeli jáne qashyqtyqtyq ádistemelik is-sharalar, konkýrstar men semınarlar, master-klas ótkiziledi.
