Sonymen qatar vaksınany kólikpen jetkizýdi durys uıymdastyrý jáne ony talapqa saı saqtaý úshin muzdatqysh qondyrǵylar, refrıjeratorlar jáne termokonteınerler satyp alynǵan.
– Ekpe salý isiniń ashyqtyǵyn qamtamasyz etý úshin biz buryn bolyp kórmegen is-sharalarǵa bardyq: árbir ekpe kabınetine ol jerde bolǵan jaǵdaıdy onlaın rejimde kórsetip otyratyn beınekameralar ornattyq. Munyń ózi bizdiń jáne azamattarymyzdyń vaksınalaý barysynyń qaýipsizdigine degen senimin kúsheıtedi. Iаǵnı kerek bolǵan jaǵdaıda bizde ekpe salynǵany týraly faktiniń rastyǵyn dáleldeýge múmkindik bar. Jáne bul beınetúsirilimder jyldyń sońyna deıin saqtalady, – deıdi oblystyń bas dárigeri.
Qaraǵandy oblysynda vaksınalaý kólemi aı ótken saıyn ulǵaıa bermek. Jergilikti densaýlyq saqtaý basqarmasy jyl aıaǵyna deıin óńirdiń 700 myńǵa jýyq turǵynyn ekpeden ótkizýdi josparlaǵan. Ázirge keıbir málimetterge qaraǵanda, medısına salasyndaǵy 600-den astam qyzmetker vaksına saldyrypty.
Eske salar bolsaq, elimizdegideı Qaraǵandy oblysynda da vaksınalaý is-sharasyna aldymen medısına qyzmetkerleri táýekelge bel býyp, ún qosty. Jalpy jospar boıynsha koronavırýsqa qarsy ekpeni birinshi kezekte ınfeksııalyq aýrýhanalardyń, medısınalyq jedel járdem men jansaqtaý bólimsheleriniń, alǵashqy medısınalyq-sanıtarlyq kómektiń, qabyldaý bólmesiniń, sanepıdqyzmettiń 100 myńdaı qyzmetkeri alady degen boljam bar. Ekinshi kezeńde jalpy bilim beretin mektepterdiń, joǵary oqý oryndarynyń pedagogteri jáne medısınalyq qyzmet kórsetý salasynyń ókilderinen turatyn 150 myńǵa jýyq adam vaksınalanbaq. Al úshinshi kezeńniń úlesine mektep-ınternattyń, mektepke deıingi balalar mekemeleriniń pedagogterin, stýdentterdi, sozylmaly aýrýlary bar turǵyndardy qosqanda barlyǵy 600 myń adam keledi degen jospar bar.
Qazirgi tańda «jasyl aımaqqa» qaıta oralǵan Qaraǵandy oblysyndaǵy epıdemııalyq ahýal turaqtalyp keledi. Mysaly, ınfeksııalyq stasıonarlarda 500 pasıent em alyp jatyr. Bul bar bolǵany jalpy tósektik oryn qorynyń 11%-yn ǵana quraıdy.
Dáriger mamandar koronavırýs ınfeksııasy vaksınaǵa baǵynatyn syrqat túrine jatady dep esepteıdi. Sondaı-aq olar elimiz boıynsha salynyp jatqan vaksına túrleriniń qatań tekserý-suryptaýdan ótkenin, sol sebepti de preparattardyń qaýipsizdigi men tıimdiligine kúmánmen qaramaý kerek ekenin aıtady. Sondyqtan mamandar jurtty messendjerlerdegi neshe túrli kúmándi aqparattardyń jeteginde kete bermeı, resmı derek kózderiniń shynaıy málimetterine den qoıýǵa shaqyrady.
Osy oraıda aıta ketý kerek, oblysta alǵashqy kúnderi ekpe saldyrǵan medısına qyzmetkerleriniń ystyǵy kóterilip, ol 37,8 gradýsqa deıin jetken bolatyn. Qaraǵandy oblystyq densaýlyq saqtaý basqarmasyna qarasty qoǵamdyq densaýlyq saqtaý qyzmetiniń jetekshisi Bıbigúl Tólegenova muny jaqsy kórsetkish dep baǵalaıdy. «Nege deseńiz, – deıdi ol, – temperatýra kóterilgen saıyn antıdene belsendi túrde qalyptasyp, ımmýndyq júıe jaqsy jumys isteı bastaıdy».
Sondaı-aq maman vaksınalaýdyń pandemııadan saqtap qalatyn jalǵyz ǵana jol ekenin aıtady. «Ekpe saldyrý naýqany týraly jaǵymsyz pikirler tek áleýmettik jelilerde ǵana aıtylyp júr. Al emhanalardaǵy jaǵdaıǵa qarasaq, adamdar kúnde habarlasyp, múmkindikterine qaraı ekpe saldyrýǵa nıetti bolyp jatyr», deıdi oblystaǵy qoǵamdyq densaýlyq saqtaý qyzmetiniń jetekshisi.
Jasyratyny joq, qazir qoǵamda «Nege tek reseılik «Spýtnık V» ǵana?» degen pikirler aıtylyp qalyp júr. Bul jerde mamandar keltirgen ýáj ben dálelge nazar aýdarsaq, jaǵdaı shynynda da kúrdeli eken. Máselen, keıbireýler aıtqandaı, amerıkalyq Phizer kompanııasynyń ónimin satyp alǵanymen, ony elimizge jetkizýdiń joly tipti de ońaı emes kórinedi. Ol preparatty tek qana -80 gradýs temperatýrany qatań saqtaı otyryp tasymaldaý kerek. Sheteldik vaksınany amaldap jetkizgen kúnniń ózinde ony paıdaǵa jaratý úshin tek Almaty men Nur-Sultan qalalarynda ǵana ortalyq ashý múmkindigi bar eken. Basqa óńirlerge jetkizý ázirge qoldan kelmeıtin sharýa degendi aıtady mamandar.
Vaksınalaýǵa qatysty taǵy bir jańalyq: 15 aqpannan bastap Qaraǵandy farmasevtıkalyq kesheninde transferttik tehnologııaǵa arqa súıep óndirilgen ekpe konveıerden shyǵýy múmkin. Al aldymyzdaǵy sáýir aıynda otandyq QazCovid-in vaksınasy óndirile bastaıdy degen derek bar.
Qaraǵandy oblysy
