Qumar Aqsaqalov Petropavldaǵy kópqabatty úıde bolǵan jarylystan qaza tapqandardyń otbasylaryna kóńil aıtty. «Qaza tapqandardyń týǵan-týystaryna kóńil aıtamyn. Aýrýhanada jatqan 8 adamǵa tezirek táýir bolýlaryna tilektespin. Bolashaqta osyndaı jaǵdaılarǵa jol bermeý úshin kásipkerlerge kópqabatty úılerde gaz ballonyn qoldanýǵa úzildi-kesildi túrde tyıym salynady», dedi ol.
О́ńir basshysynyń aıtýynsha, osy oqıǵaǵa baılanysty arnaıy komıssııa qurylady. Oǵan prokýratýra, TJD, kásipkerler palatasynyń ókilderi, kásipkerler jáne Petropavl qalalyq ákimdiginiń mamandary kiredi. Komıssııa kópqabatty úılerdiń birinshi qabattarynda ornalasqan kásipkerlik sýbektilerin teksermek.
«Ǵımaratty jónge keltirýge qajet qarajat qala bıýdjetinen bólinedi. Páter ıelerine birrettik materıaldyq kómek beriledi. Bir de bir adam nazarsyz qalmaıdy», dedi SQO ákimi Qumar Aqsaqalov. Petropavl ardagerler keńesi jáne qalalyq ákimdik zardap shekkenderge kómektesý maqsatynda arnaıy bank esepshotyn ashty.
Qaıyrymdylyq kómek kórsetkisi kelgender tómendegi rekvızıtter boıynsha qarjy aýdara alady:
BIN 961141002819 «Ardagerler uıymy» RQB Petropavl qalalyq fılıaly «BankSentrKredıt» AQ IIK KZ 578560000004453692
BIK KCJBKZKX KBE 18, KNP 119
Telefon/faks: 8 7152 46-50-71
Esterińizge salaıyq, 21 aqpan kúni Petropavldaǵy 5 qabatty turǵyn úıdiń birinshi qabatynda ornalasqan dámhanada gaz ballony jarylyp, eki adam qaza tapty. Osy oqıǵaǵa baılanysty qylmystyq is qozǵaldy. Zardap shekkenderdiń úsheýiniń jaǵdaıy aýyr.
