Iá, sol bir tún, ıaǵnı ótken jylǵy 2 mamyr, tańǵy beske jaqyndaǵan kezdegi úreıli saǵattardy umyta qoıǵan joqpyz. Kórshi eldegi «Sardoba» sý qoımasynyń bógeti buzylyp, Maqtaaral aýdanynyń aýyldaryn sý basty. Bizdiń aýylymyzda sý deńgeıi kóterildi. Balalarymyzdyń amandyǵyn oılap, asyǵys jınaldyq. Qujattarymyzdy ǵana alyp, bala-shaǵamyzben úıden shyǵyp kettik. Kóptegen aýyldasym Atakenttegi evakýasııalyq beketterge jaıǵasty. Biz týysqandarymyzdyń úıin panaladyq. Sóıtip Jeńis aýylyndaǵy 130 úıdiń 2 myńǵa jýyq turǵyny qaýipsiz jerge kóshirildi. Aýyldaǵy kópirdi, oblystyq mańyzy bar Myrzakent – Jeńis – Jańa turmys avtomobıl jolyn sý alyp ketýi saldarynan kólikter júre almaı qaldy. Keıinirek baryp aýylymnyń sýdyń astynda qalǵanyn kórdim. Úılerimiz jaramsyz bolyp qaldy. Kindik qanyń tamyp, ómir boıy turǵan jerińniń mundaı múshkil halin kórý óte aýyr edi. Bir sátte úıimizden, mal-múlkimizden aıyryldyq ta qaldyq.
Degenmen, el-jurt bar, el aǵalary bar, dalada qalmaıtynymyzdy sezdik. Aǵaıynnyń, memlekettiń, oblys, aýdan basshylarynyń der kezinde qoldaý kórsetýi bizdi jigerlendirip, eńsemizdi túsirmedik. Búkil eldiń qoldaýyn sezindik. Qaýiptiń aldyn alý, eń bastysy adam ómirin saqtaý maqsatyndaǵy oblys ákimi О́mirzaq Shókeevtiń, aýdan ákimi Baqyt Asanov pen jaýapty qyzmettegilerdiń jedel qımyly óz nátıjesin berdi de. Elimizdiń búkil oblysy bizge kómek qolyn sozdy, azyq-túlik pen gýmanıtarlyq kómek tıelgen kólikter aǵylyp kelip jatty. Kásipkerler de apattan zardap shekkenderge qoldaý kórsetýden tys qalmady. Arnaıy ashylǵan qorǵa qarapaıym turǵyndardan, kásipkerler men uıymdardan, memlekettik mekemelerden túsken qarjy qanshama?! Memleket basshysynan bastap laýazymdy qyzmettegiler qıyn sátte halyqtyń qasynan tabyldy, janashyrlyǵyn bildirdi.
Alty aıdan keıin aýdan ortalyǵy – Myrzakent kentinen salynǵan jańa úıimizge jaıǵasyp aldyq. Jańa shaǵyn aýdanda qaladaǵydaı jaǵdaı jasalǵan. Gaz, jaryq, ystyq sý jáne taza aýyz sý barlyǵy kelip tur. Úıimizdiń aldynda saıabaq bar. 1200 oryndyq mekteptiń qurylysy júrip jatyr. Odan bólek, dárigerlik ambýlatorııa men polısııa beketiniń qurylysy aıaqtaldy. Mundaı jaǵdaı bizdiń Jeńis aýylynda múlde bolmaǵan edi. Qazir qýanyp otyrmyz. Osynshama jaǵdaıdy jasap bergen el halqyna, Elbasy men Prezıdentimizge, jergilikti basshylarǵa rahmet!
Osy bir qıyndyq bizdi biriktire tústi. Yntymaq, meıirimdilik, janashyrlyqtyń qymbat ta qajet qasıet ekenin uǵyna tústik. Alǵys – ystyq yqylas, jyly júrekpen aıtylǵan izgi nıetti sóz. Bizge qanshama azyq-túlik, kıim-keshek pen gıgıenalyq zattar jibergen halqymyzǵa myń alǵys! Qıyn kezeńde birligi jarasyp, jumyla kómektesken elime basymdy ıip rahmet aıtamyn!
Iá, ómirdiń tiregi adamgershilik pen meıirim eken. Kópshiliktiń qoldaýymen basymyzdaǵy bult seıilip, otbasyma kúlki men shattyq qaıtyp oraldy.
Alǵys aıta bilý de – tárbıe. Adam balasynyń boıyndaǵy izgi qasıetterdiń kórinisi, atadan balaǵa beriletin úlgi, ári ádet, ári qasıet. Osy qasıettiń mán-mańyzyn urpaǵyma uǵyndyryp kelemin. Olar da jyly júrekten, rııasyz kóńilden shyǵatyn ádemi sezimderin, ıaǵnı alǵystaryn qıyn sátte qolushyn sozǵan barsha jurtqa aıtýda.
Dinmuhamed ERMEKOV,
Maqtaaral aýdanynyń turǵyny
Túrkistan oblysy
