"Qazaqstan óziniń ónerkásiptik saıasatynda ekonomıkanyń shıkizattyq emes sektorlaryn, onyń ústine álemdik naryqtyń konıýnktýrasyna táýeldiligi az sektorlardy damytýda balamasyz baǵyt ustanýy tıis. Sondyqtan ónerkásiptik saıasatty quqyqtyq retteýde onyń óńdeý sektoryn damytýǵa jáne ekonomıkalyq ósý kózderin ártaraptandyrýǵa basa nazar aýdarylatyn bolady", – dedi Senat Tóraǵasynyń orynbasary Nurlan Ábdirov.
Senatorlar Indýstrııa jáne ınfraqurylymdyq damý mınıstri Beıbit Atamqulovtyń baıandamasyn tyńdap, ónerkásipti damytýǵa serpin beretin birqatar usynystar aıtty. Sonymen qatar, bul usynystar osy Úkimet saǵatyna daıyndyq aıasynda senatorlar júrgizgen úlken daıyndyq jumystarynyń nátıjesi boldy.
Senatorlardyń usynystarynyń ishinde – "Memlekettik satyp alý týraly" Zańǵa ózgerister engizý de bar. Odan depýtattar otandyq ónim óndirmeıtin kásiporyndardyń ónim jetkizýdegi múmkindikterin alyp tastaýdy usynyp otyr. Sondaı-aq, ónerkásiptik saıasattyń maqsaty men mindetterin, naqty aıtqanda, mıneraldyq-shıkizattyq saıasattan óńdeý saıasatyna kóshý, eksportqa baǵdarlanǵan jáne joǵary tehnologııalyq ónim óndirý úshin jaǵdaı jasaýdy zańnamalyq túrde aıqyndaý usynyldy. Taǵy bir usynys – ınvestorlarǵa salyqtyq jeńildikterdiń ártúrli deńgeıin berip kórý. Iаǵnı, kompanııa óndiriske neǵurlym kóp ınvestısııa salsa, soǵurlym jeńildikterge ıe bolady. Senatorlar usynǵan prınsıp ónerkásipshilerdi ónimdi neǵurlym tereń óńdeýge yntalandyrýǵa tıis, ol boıynsha ulttyq jobalardy ázirleý kezinde óndiristi qaıta bólý deńgeıi joǵary kompanııalarǵa árqashan basymdyq berilýi qajet. Arnaıy ekonomıkalyq jáne ındýstrııalyq aımaqtarda jumys isteıtin kásiporyndar da neǵurlym jaýapty bolýǵa tıis. Senatorlardyń pikirinshe, memleket tarapynan qoldaýǵa ıe bola otyryp, olar óndiris, eksport, ınvestısııa kólemi, jergilikti qamtý úlesi, sondaı-aq, qaıta bólý deńgeıi boıynsha ózderine kóbirek mindetteme alýy kerek.
Depýtattar tyńdaý barysynda jumys istemeıtin óndiristerge revızııa júrgizip, olardyń ishindegi básekege barynsha qabiletti óndiristerdi qaıta iske qosý boıynsha Jol kartasyn ázirleýdi usyndy. О́ńdeýshi ónerkásiptiń orta jáne iri sýbektilerin sındıkattalǵan qaryzdar jáne lızıng túrinde nesıeleýmen qamtýdy keńeıtý úshin jańa qarjy quraldary usynyldy.
Úkimet saǵatyna daıyndyq aıasynda Senattyń Ekonomıkalyq saıasat, ınnovasııalyq damý jáne kásipkerlik komıtetiniń depýtattary túrli mınıstrlikter men mekemelerdiń, "Atameken" palatasynyń basshylyǵymen, sondaı-aq, sala sarapshylarymen kóptegen kezdesýler ótkizip, 100-ge jýyq máseleni talqylady.
Úkimet saǵatynyń qorytyndysy boıynsha ázirlengen usynymdar Mınıstrler kabınetine joldanady.
