Barlyǵy Merılınniń balǵyn qylyǵyna tań qalýdan bastaldy. Onyń izgi iltıpaty, náreste móldir sezimi aınalasyn nurlandyryp turatyn. Shań juqpaıtyn shyraıy ǵana emes, bulalyǵy ketpegen bala minezi, sylqym da syrly sábı oıy, ózine ǵana jarasatyn ántek áreketi, altyn jalatylǵan aqquba ajary XX ǵasyrdyń jaryq juldyzyna aınaldyrdy.
Zer salsańyz, onyń boıynda teńizdeı tákappar móldirlik bar. Onsyz sulýlyqtyń tasada qalatyny aıan. Al sulýlyqsyz kórkemónerdiń kórinis berýi neǵaıbyl. Sizge, onyń ómirbaıany ekrandaǵydaı qyzyl da jasyl lentaly kórinýi múmkin. Suńǵaq denesin qymbat buıymdarmen qymtaǵan ártistiń ómirin ertegige jorýshylar da tabylady. Biraq aqzer arýdyń talaıly taǵdyrynyń sońynan erip, uly jalǵyzdyqtyń qushaǵynda kún keshkenin biri bilse, biri bilmeıdi. Jalǵyzdyń jan-muńyna eshkim úńilgen joq. Bálkim, jetim qyzdy jigerlendirgen de sol úmitsiz shaqtardyń áldıi bolar.
Shyn esimi – Norma Djan Beıker. Kınostýdııada redaktor bolyp jumys isteıtin anasy tanymal aktrısa Norma Talmedjdiń qurmetine solaı ataǵan. Al týǵan ákesi jaıly alypqashpa aqpar kóp. Kóp bolǵanymen, Norma onymen kózi tirisinde jolyqqan emes. Anasy psıhıkalyq aýrýǵa shaldyqqannan keıin, qarshadaı qyzdyń taǵdyryn qarabult basty. Qamqorlyǵyna alǵan qanshama adamnyń qabaǵyna jaýtańdaýmen kún keshti. Aqyry, muqtajdyqtan mezi bolǵan 16 jastaǵy boıjetken Radıoplan áskerı avıasııa zaýytynyń qyzmetkeri Djeıms Dogertıge turmysqa shyǵady. О́zi de joldasynyń qasyna jumysqa turady. Albyrt seziminiń shyrmaýyna oralǵan eki jastyń nekesi sátsiz aıaqtalǵanymen, boıjetken ónerdegi baǵyn sol mańnan tapqandaı. Dısproporsııa.
Avıasııa zaýytyn sýretke túsirýge kelgen amerıkalyq fotograf Devıd Konover qara jumysqa jegilgen jas arýdy baıqap qalady. Sol sátte symbatty kelinshekti obektıvke qaǵyp alyp, ǵajaıyp fotolardy modeldik agenttikterge jiberedi. Bul eleýsiz Normanyń el súıingen Merılınge qaraı basqan tuńǵysh qadamy edi. Turmystyń taýqymetin kóp kórgen ol zaýyttan shyǵyp, saǵatyna 5 dollarǵa sýretke túsýge kelisedi. Osylaısha modeldik mansaby bastalady.
Aıtpaqshy, artynan joldasy ashyq sýretin kórip, ókpeleı: «Fotograftyń aıtqanyna únsiz kelise berdiń be?» dep suraǵanda, bolashaq ártis saspastan: «Únsiz kelispedim, qasymyzda radıo oınap turǵan bolatyn» dep jaýap beredi. Ǵumyrboıy balalyǵyn joǵaltpaǵan arýdyń taýyp aıtatyn ádeti bolǵan. «Túnde kıetin jalǵyzym – №5 Chanel tamshysy» degen sóziniń astarynda da úlken mán jatqandaı. Eger siz ártisti saǵynsańyz, sol átirdi ústińizge sebińiz. О́ıtkeni odan áli sulýlyq patshaıymynyń jupary ańqıdy.
Modeldik jáne akterlik agentterdiń nusqaýymen atyn Merılın Monroǵa aýystyrady. Bul ataýdy ózi tańdaıdy. Mundaǵy «Merılın» – Brodveı juldyzynyń esimi bolsa, «Monro» – anasynyń tegi. Amerıkanyń árbir kóshesinde onyń áıdik sýretteri ilinip turdy. Ataqty «Playboy» jýrnaly bastaǵan 33 jyltyr basylymdardyń muqabasyna shyqty. Bala armanyn aqıqatqa aınaldyrý úshin aıanbaı eńbek etti. Kıno salasynda baǵyn synap, ózindik qoltańbasyn qaldyrdy.
Qoltańba demekshi, áıgili ártistiń kınodaǵy jetistigi kól-kósir. Ol somdaǵan rólderdiń árqaısysy rejısserdyń hám fılmniń bedelin arttyryp, mıllıondaǵan tabys ákeldi. Dańqty kınostýdııalarmen kelisimshart jasasyp, 20-dan astam fılmge tústi. Kóbinese baqytyn dúnıeden izdegen aqymaq qyzdyń obrazynda oınady. «Nıagara», «Djentlmender aqqubalardy artyq kóredi», «Djazda tek qyzdar bar» fılmderi arqyly álemdi moıyndatty. Ol ol ma, «Djazda tek qyzdar bar» fılmdegi basty róli úshin «Altyn globýsqa» ıe boldy.
Tarıhqa óziniń atymen kompanııa ashqan tuńǵysh áıel prodıýser retinde endi. Sóıtip, ekinshi ret beısbolshy Djo DıMadjıomen otaý qurdy. Biraq qarym-qatynastary uzaqqa sozylmady. Áıtkenmen sportshy áıgili ártisti shyn súıdi, ónerin baǵalaı bildi. Ol dúnıeden ozǵanda ýáde etkendeı jerleýine atsalysyp, jıyrma jyl boıy ár senbide qabirine alty tal raýshan gúlin ákelip turdy.
Monro ónerge jaıdan jaı kele salǵan joq. Biliminiń azdyǵyna uıalyp, únemi ózin-ózi damytýmen boldy. Kópshiliktiń kózinshe altyn men brıllıantqa aptalǵanymen, onyń bári prodıýserlerdiń kózboıaýshylyǵynan týǵan ıdeıa ǵana. Negizinde ol zergerlik jaýharlarǵa asa qyzyqpaǵan, aqshasynyń basym bóligin kitapqa jumsaǵan. «Ara-tura kitap dúkenine baramyn, ne bar ekenine kóz júgirtemin. Bir jerde meni qyzyqtyratyn bir-eki sóılem oqyp qalsam, satyp alamyn», deıdi óz esteliginde. Oǵan dálel, «Baqytty mahabbat» fılmine túsý barysynda róldi ashý úshin Tomas Výlf, Marsel Prýst, Zıgmýnd Freıdtiń shyǵarmalaryn oqyǵan. Dál sol kezde «Aǵaıyndy Karamazovtar» kitabynyń alǵashqy basylymy aldymen Monronyń qolyna túsken eken. Tipti oqyǵan týyndylaryn dostarymen talqylaǵandy unatqan.
Bireýler Merılın ózin jaı ǵana zııaly adam retinde kórsetken deýi ǵajap emes. Alaıda áıgili ártis áńgime aıtqanda ózi oqyǵan romandardan úzindi keltirip otyrǵan. Ásirese Ivan Týrgenev pen Leonıd Andreevtiń áńgimelerin, Lev Tolstoıdyń romandaryn, Aleksandr Pýshkınniń poezııasyn jáne Anton Chehovtyń pesalaryn súıip oqyǵan. Onyń sórelerinen Oskar Ýaıld, Bernard Shoý bastaǵan álem klassıkteriniń týyndylaryn taba alasyz. Merılın dúnıeden ozǵanda jeke kitaphanasynda 400-den astam kitap bolǵan. Syrt kózge ańǵal hám ashyq arýǵa uqsaǵanymen onyń IQ deńgeıi 168 balldy quraıdy. Ǵylymǵa jańalyq ákelgen ataqty Albert Eınshteınniń aqyldylyǵy 163 ballǵa baǵalanǵanyn oılasaq, sulýdyń ózin-ózi tárbıeleýge kóp ýaqyt bólgenin ańǵaramyz.
Kitapqa qumarlyǵynan bolar, amerıkalyq dramatýrg Artýr Mıllermen de shańyraq qurady. Merılın kúıeýiniń dini ıýdaızmdi qabyldaıdy. Jazýshy súıiktisine arnap pesa jazǵan. Erli-zaıyptylar ata-ana bolýdy oılaǵanymen, áıgili ártiske ana bolý baqyty buıyrmaıdy. Bul – Merılınniń eń ýytty ókinishiniń biri.
Sulýlyq patshaıymynyń AQSh-tyń 45-nshi prezıdenti Djon Kennedımen jasyryn romany týraly qaýeset te tarady. Tipti jankúıerleri ólimine sony kinálaıdy. О́miriniń sońǵy mınýttarynda Aq úıdiń basshysyna habarlasqany aıtylyp ta júr. Sol zamanda aqzer arýdyń sulýlyǵyna tabynǵandar kóp bolǵan. Úıine kún saıyn 5 myń hat keledi eken. Onyń arasynda Prezıdenttiń inisiniki de bar.
Áıgili ártis aqymaq qyzdyń róline berilgendigi sonshalyq, shynaıy ómirde de sol obrazynan shyǵa almady. 36 jasynda óz erkimen máńgi sulý da minsiz qalpynda kóz jumdy. О́zi aıtqandaı, mansaptyń eń bıik minberine shyqty, biraq ataq pen abyroı ony sýyq túnde jylyta almady. Qoshtasý rásiminde tabytta kók tústi «Pucci» kóılegin kıgen óńi taıǵan ártis jatty. «Áıelde tek eki qarý bar: týsh jáne kóz jasy» dep túsingen Merılın Monroǵa týsh ta, kóz jasy da kómektespedi. Dáýirden dańqty arý osylaı kóshti.
