Sement baǵasy bir aıda 13 prosentke kóterilipti. Bul úı baǵasynyń qymbattaýyna ákeldi. Depýtat Jambyl Ahmetbekov Úkimetke saýal joldap, qurylys materıaldary naryǵynda baǵany retteý qajettigin aıtty. Sondaı-aq salada qazir maman tapshy. Jalaqy da mardymsyz. Qurylysshylardyń áleýmettik kepildikteri men eńbek quqyǵy da saqtalmaıdy.
Depýtattyń aıtýynsha, qurylys salasynda 200 myńnan astam maman jetispeıdi. Úkimet kadr problemasyn sheshý úshin sheteldik jumysshylardyń elde bolý merzimin joba aıaqtalǵansha sozýy kerek. Sondaı-aq kolledj stýdentteriniń óndiristik praktıkadan ótýi men dýaldy bilim berý júıesin jetildirý qajet.
–Qurylys naryǵynda qurylys materıaldarynyń jappaı qymbattaýy baıqalyp otyr. Qurylys materıaldary baǵasynyń ósýi turǵyn úıdiń qymbattaýyna ákep soqty. Sáıkesinshe, bul memlekettik bıýdjet esebinen salynatyn mektepter, aýrýhanalar jáne basqa da áleýmettik obektiler qurylystarynyń da qymbattaýyna ákeldi. Mysaly, armatýranyń baǵasy qysqa ýaqyt ishinde 40%-55% ósti, 2020 jyldyń qyrkúıeginde bir tonna armatýranyń baǵasy 190 000 myń teńge bolsa, búgingi tańda onyń baǵasy 290000-325000 myń teńge aralyǵynda, – deıdi Májilis depýtaty.
