Kózińde seniń kóktem júr

Kóz aldymyzda «Kóktem» kartınasy. Boıaýǵa oranǵan bııazy arý keıpinde. Janǵa sáýle, kóńilge nur quıady. Dúnıe soǵan qaraǵan saıyn óz­ge­rip keterdeı ártúrli túster­diń qosyndysy janyńa shýaq syılaıdy.

Atalmysh týyndynyń avtory – Qazaqstan Memlekettik syılyǵynyń laýreaty, Qazaq ulttyq óner akademııasynyń professory Aǵymsaly Dúzel­hanov.

Ol – áıel beınesin jıi salatyn sýretshilerdiń biri. Onyń barlyq týyndysynan tabıǵat, ómir, mahabbat, sulýlyq, páktik syndy áıel sımvoldary kórinis tapqan. Bul shyǵarmasynda da avtor áıeldi kóktem keıpinde beınelep, mereıli mezgilge teńeıdi.

Shynynda, kóktem – tabı­ǵat jańa tirshilik úshin oıanyp, tazalyq jáne balǵyndyqpen tynystaıtyn jyldyń eń sáý­leli mezeti. Kóktemkóz arý­dyń janaryna uıa salǵan ǵa­jaıyp sát. Armandaryńnyń bastaýhatyndaı.

Kartınadan kúmispen, asyl tastarmen bezendirilgen ulttyq kıim kıgen jas áıeldi kóremiz. Onyń aınalasynda qustar men kóbelekter ushyp júr, artynda búr jarǵan jasyl butaqtar. Sándi, saltanatty sáýkelesin gúldep turǵan alma butaqtary kómkerip tur. Sýret sulýlyq qosa jańa kelgen kóktemdi sezindiredi.

Kóılek pen fonnyń ashyq sary túsin jaıly jasyl tús kómkergen. Sýretshi tús­terdiń sımvolızmine júgingenin aıtyp ótý kerek. Qazaq halqynda sary tús qoz­ǵalysty, sheksiz ómirdi, keń­dikti jáne sabyrdy bil­diredi. Halyq túsiniginde jańa kúnderdiń bastaýy esebinde sanalady. Jasyl tús qashanda jastyq shaqtyń sıpatynda.

Sýretshi san alýan túster men jas qyzdyń beınesi ar­qyly kóktemniń oıanǵan sátin kenepke túsirgen. Ishinde jazdy qýana kútken jannyń jú­rek lúpili de bar.