Táýelsizdikti moınyna tumar qylyp taqqan qazaq balasynyń qııalyna qanat bitirgen, qadamyna qut darytqan bir qudiret bolsa, ol – bahadúr babalarymyzdyń dańqty joly. Sol jolmen qaıta júrý múmkin bolmasa da, dáýir bet-beınesin zaman yńǵaıyna súıenip, árkim ártúrli oı keńistiginde beıneleıdi. Mundaǵy «Ǵasyrlar úni» kartınasy bizdiń sol pikirimizdi ústep turǵandaı. Avtory – Sýretshiler odaǵynyń múshesi, Qazaq KSR-iniń Sh.Ýálıhanov atyndaǵy Memlekettik syılyqtyń laýreaty Bátıma Záýirbekova. Sýretshi oqyrmanǵa dáýir daýysyn jetkizýge oqtalǵan.
Onyń qolynan qazaqstandyq, sheteldik mýzeıler men jeke kolleksııalarda saqtaýly turǵan gobelen, keskindeme jáne grafıkalyq (portret, peızaj, natıýrmort, abstraktili kompozısııalar) janrdaǵy 300-den astam týyndy shyqty. Bulardyń bári ultymyzdyń rýhanııatyna quıylǵan jaýhar jádigerler. Biz osy rette oqyrman nazaryna tarıhqa astar bolǵan tamasha týyndysyn usynyp otyrmyz.
Qylqalam sheberi «Ǵasyrlar úni» shyǵarmasynda qola dáýirindegi ataqty tamǵaly petroglıfterindegi kóne beıneler sımvolyn utymdy paıdalanǵan. Munda Qazaqstan aýmaǵyn meken etken halyqtarmen baılanys anyq baıqalady. Biz kenep betinde túster men pishinderdiń oınatylýynan týǵan áıel, Kúnbasty qudaı, balbaldardyń pishinderi arqyly ejelgi dáýirdiń daýysyn estımiz.
Týyndy ara-arasynda yrǵaqty áshekeıge aýysatyn joǵarydan tómen túsken sáýledeı syzyqtardyń maıly boıaý gammasymen oryndalǵan. Kartınanyń keńistigi tústik názik gradasııalarmen aýystyrylady. Fondyq tik syzyqtar kompozısııadaǵy basty beınelerdiń nobaıyn jasaýda erekshe ról atqaryp tur.
Kartına sımvolızm stılinde jazylǵan. Sýretshi jasyryn úndeýdi, allegorııany, tipti tereń fılosofııalyq nemese mıstıkalyq mándi shıfrlardy qoldanǵan. Olar kórermendi tereń oılanýǵa, sıýjetti jeńil qabyldaýdan bas tartyp jáne avtor oıynyń naǵyz túıinin tabýǵa ıtermeleıdi.
Qazaq halqynyń mádenı bulaqtarynan sýsyndaǵan B.Záýirbekovanyń shyǵarmashylyǵy bizdiń halqymyzdyń ásem dúnıetanymymen tanystyryp, ulttyq sana-sezimdi saqtaýǵa kómektesedi.
