Birinshiden, jer – ata-babalarymyzdan qalǵan amanat. Ekinshiden, qazaqtar eshqashan jerge jekemenshik quqyǵymen ıe bolǵan emes. Keıbireýler Amerıka, Kanada men Eýropany mysalǵa keltirip, jerdi jekemenshikke ótkizýge yntalandyrady. Bul jerde tym bolmaǵanda halyqtyń mentalıtetin eskerýimiz kerek. Ol memleketterde neni bolsyn ózine menshiktep alý mentalıteti bar, al qazaq halqy úshin jer – ortaq qundylyq. Biz jerdi qaýym, rý bolyp paıdalandyq.
Sondyqtan Prezıdentimiz Qasym-Jomart Toqaevtyń jerdi sheteldikterge satpaý jáne jalǵa bermeý týraly zań jobasyn Májiliske joldaýyn oń qadam dep esepteımin.
Qazirgi ýaqytta qazaqstandyqtyń jerdi 49 jylǵa jalǵa alý quqyǵy bar. 20 jasyńda jerdi jalǵa alyp, aýyl sharýashylyǵymen aınalyssań, 69 jasqa deıingi ýaqyt jetkilikti bolar. Eger ol jerde sharýashylyǵyn órbitip, oryndy paıdalanyp jatsa, jerdi jalǵa alý ýaqytyn zańdy túrde uzartýdy qarastyrý kerek. Osydan artyq ne kerek? Sondaı-aq jalǵa alǵan jerdiń tıimdi paıdalanylǵanyn memleket qatań baqylaýda ustaýǵa tıis.
Jer kodeksi qabyldanǵaly 18 jyldaı ýaqyt ótti. Osy ýaqyt ishinde Qazaqstandaǵy 200 mln-nan astam aýylsharýashylyq mańyzy bar jerlerdiń tek 1,8 mln gektary jekeshelendirilgen. Demek 1 paıyzǵa da jetpeıdi. Onyń ózi ońtústik aımaqtardaǵy qunarly sýarmaly jerler.
Sondaı-aq iri Almaty, Nur-Sultan, Shymkent, Aqtóbe, Qaraǵandy syndy qalalardyń mańyndaǵy aýyl sharýashylyǵyna tıimdi, mańyzy bar jerlerdi jekeshelendirip, keıin jeke turǵyn úı qurylysyna bólip, satyp jiberdi.
Tóleýtaı RAHYMBEKOV,
Ulttyq agrarlyq ǵylymı-bilim berý ortalyǵynyń basqarma tóraǵasy, Ulttyq qoǵamdyq senim keńesiniń múshesi
