Úmitkerlerdi irikteý jáne qujattardy tekserý rásimi alǵash ret aqparattyq júıeniń kómegimen onlaın formatta ótkizildi. Baıqaýǵa qatysýshylardyń qyzmeti oqytý sapasy men ǵylymı-zertteý jetistikteri boıynsha baǵalandy. Baıqaý nátıjeleri mınıstrliktiń saıtyna ornalastyryldy.
Mınıstr bilim jáne ǵylym júıesi úshin mundaı baıqaýlardyń ashyq túrde ótýi mańyzdy ekendigin erekshe atap ótti.
«Pandemııa kezinde elimizdiń joǵary bilim berý júıesi mańyzdy synaqtan ótip, joo-lardyń jumysy jaqsy deńgeıde uıymdastyryldy. Osy rette syn-qaterlerdi múmkindik retinde qabyldaýǵa tıispiz. Qandaı da bir qıyndyqtar men qolaısyzdyqtarǵa qaramastan, qazaqstandyq oqytýshylar bul jaǵdaıǵa tez beıimdeldi. Búgingi tańda bizdiń aldymyzda oqytýshynyń bedelin arttyrý, eńbek júktemesin azaıtý, eńbekaqyny kóbeıtý, oqytýshylardy ózine tán emes fýnksııalarǵa tartýǵa jol bermeý boıynsha jáne elimizdiń Prezıdenti Qasym-Jomart Toqaev aıqyndaǵan basqa da birqatar mańyzdy mindet tur. Men baıqaý jeńimpazdaryn bul marapatpen shyn júrekten quttyqtaımyn jáne árqaısysyna myqty densaýlyq, tolaǵaı tabys pen otbasy amandyǵyn tileımin», dedi Ashat Aımaǵambetov.
Konkýrsqa respýblıkanyń 73 joǵary oqý ornynan 623 úmitker qatysty.
Qazaqstannyń úzdik oqytýshylarynyń qatarynda belgili telejýrnalıst, L.N.Gýmılev atyndaǵy EUÝ-diń professory Esenbekova Ulbosyn Meıirbekqyzy da bar.
Fılologııa ǵylymdarynyń kandıdaty, qaýymdastyrylǵan professor U.M. Esenbekovanyń úzdik oqytýshy ataǵy ǵalymnyń qazaq televızııasy men jýrnalıstıkasyn damytýǵa qosqan eńbeginiń ádiletti baǵasy dep sanaımyz.
