Sońǵy aptada koronavırýsqa shaldyqqan naýqastar sany 12 paıyzǵa artty. Bul týraly Densaýlyq saqtaý vıse-mınıstri – bas memlekettik sanıtar dáriger Erlan Qııasov aıtty.
– 17 naýryzdaǵy jaǵdaı boıynsha Qazaqstanda Sovid-19-ǵa oń nátıjemen 226 767 naýqas, al KVI-diń teris nátıjesimen 49 896 jaǵdaı tirkeldi. KVI ońnan 208 074 jáne KVI teristen 45 428 naýqas saýyǵyp shyqty. Aqpanda qańtarmen salystyrǵanda naýqastar sany 30 paıyzǵa tómendegeni baıqaldy. Sonymen qatar sońǵy 5 kúnniń ishinde táýligine 1 myńnan astam jaǵdaı anyqtaldy. Sońǵy aptada aldyńǵy aptamen salystyrǵanda naýqastar sany 12 paıyzǵa ósýi baıqalady, – dedi E.Qııasov.
Onyń sózinshe, Qazaqstan táýekeli tómen nemese «jasyl aımaqtan» táýekeli ortasha aımaqqa, ıaǵnı «sary aımaqqa» aýystyryldy. «Qyzyl aımaqta» 3 óńir – Nur-Sultan men Almaty qalalary jáne Batys Qazaqstan oblysy tur. «Sary aımaqta» Almaty, Aqmola, Atyraý, Qaraǵandy oblystary ornalasqan. Qalǵan oblystar «jasyl aımaqta».
Sonymen qatar vıse-mınıstr Qazaqstan aýmaǵynda koronavırýstyń jańa shtamdary anyqtalmaǵanyn málimdedi.
– Qazaqstanda koronavırýstyń sırkýlıasııasy boıynsha epıdemııalyq monıtorıng júrgiziledi. Qyrkúıekten bastap qańtarǵa deıingi aralyqta júrgizilgen genomdyq zertteýlerdiń qorytyndysynda el aýmaǵynda koronavırýstyń jańa shtamy, naqtyraq aıtqanda brıtandyq, ońtústik-afrıkalyq, brazılııalyq shtamdar anyqtalǵan joq. Naýryz aıynyń sońynda kezekti genomdyq zertteýler nátıjesi alynady, – dedi Bas sanıtar dáriger.
О́kinishtisi, mektep oqýshylary arasynda da koronavırýs jaǵdaılarynyń tirkelýi jalǵasyp jatyr. Oqý jyly bastalǵannan beri 10 myńnan astam mektep oqýshysy koronavırýspen aýyrǵan. Onyń ishinde 3 324 bala – oflaın rejimde bilim alǵandar. Qazirgi ýaqytta karantındik is-sharalar óńirlerdegi jáne jekelegen mekteptegi koronavırýsqa shaldyǵý jaǵdaılaryn eskere otyryp teńgerimdi túrde qoldanylady.
– Sáýirde koronavırýsqa qarsy vaksına alatyn kontıngent keńeıtiledi. Respýblıkada koronavırýs ınfeksııasyna qatysty vaksınalaý jalǵasyp jatyr. Búginde birinshi komponentpen
83 839 adamǵa ekpe jasaldy. 22 aqpannan bastap ekinshi komponentpen vaksınalaý bastalady. Búginde 19 312 adam ekpe aldy. Qolaısyz jaǵdaılar tirkelgen joq. Vaksınalaý elimizdiń barlyq óńirinde júrip jatyr. 628 ekpe pýnkti qurylǵan. Onyń 451-i jumys istep tur. Barlyǵy da vaksınany salqyn jerde ustaýǵa qajetti qural-jabdyqpen qamtamasyz etilgen, – dedi E.Qııasov.
Naýryz aıynyń sońyna deıin elimizde Spýtnık V vaksınasynyń 150 myń dozasy jetkiziledi. Bul elimizdiń barlyq óńirine 1 sáýirge deıin bólinip beriledi. Osyǵan baılanysty sáýirde koronavırýsqa qarsy ımmýndaýǵa jatatyn kontıngenttiń keńeıetindigi kútilip otyr.
Sondaı-aq Bas memlekettik sanıtar dáriger Erlan Qııasov koronavırýstyń shetelden tasymaldaný qaýpi áli de baryn alǵa tartty. Memlekettik shekarada 14 elmen áýe qatynasy qaıta jandanyp, reıster sany aptasyna 95-ke deıin ulǵaıyp otyr. Jolaýshylardyń basym bóligi Nur-Sultan men Almaty qalasyna keledi. Áli de bolsa shetelden koronavırýstyń tasymaldaný qaýpi saqtalýda. 2020 jyldyń 6 qazanynan beri halyqaralyq áýe reısterimen 322 myńnan astam jolaýshy ushyp keldi. Olardyń ishinde 44 805 adam nemese jolaýshylardyń 14 paıyzy test tapsyrdy. Onyń ishinde 239 adamda koronavırýs anyqtaldy. Al memlekettik shekaradaǵy avtomobıl ótkizý beketteri arqyly Qazaqstanǵa 835 myńnan astam adam keldi. Olardyń 20 paıyzy test tapsyryp, qorytyndysynda 809 adamda oń nátıje anyqtalyp otyr.
Sáýir aıynyń sońynda «QazQovid-In» vaksınasynyń alǵashqy ónerkásiptik partııasy shyǵarylady. Bul týraly Densaýlyq saqtaý vıse-mınıstrligi Medısınalyq jáne farmasevtıkalyq baqylaý komıteti tóraǵasynyń orynbasary Nurlybek Asylbekov atap ótti.
– О́zderińiz biletindeı, vaksınany ázirleýmen Bıologııalyq qaýipsizdik problemalary ǵylymı-zertteý ınstıtýty aınalysady. Ol Bilim jáne ǵylym mınıstrliginiń qurylymyna kiredi. Olardyń málimetterine sáıkes búginde barlyǵy da josparǵa saı júrgizilip jatyr. Klınıkalyq synaqtyń birinshi jáne ekinshi satysy aıaqtalǵanyn bilemiz. Birinshi satysy 2020 jyldyń naýryzynda, ekinshisi sáýirde aıaqtaldy. О́tken jyldyń jeltoqsan aıynyń sońynda úshinshi satysy bastaldy. Sondyqtan bári ret-retimen kele jatyr. Sáýir aıynyń sońynda vaksına daıyn bolady dep kútip otyrmyz. Birinshi kólemi 50 myń dozaǵa deıin. Sáýirdiń sońynda alǵashqy ónerkásiptik partııasynyń shyǵarylatyndyǵy kútiledi, – dedi ol.
«Sary jáne jasyl aımaqtarda» ornalasqan óńirlerde karantın rejimi barynsha jeńildetilgen. Sonymen qatar monıtorıngtik toptardyń jumysy jalǵasýda. Máselen, aqpanda qańtarmen salystyrǵanda reıd sany 1,3 esege (15 450-den 19 923-ke deıin) artty, shekteý sharalaryn buzǵandar 3,6% qurady. Kelýshilerdiń kóptigine (túngi klýb, meıramhana men kompıýterlik zaldar) baılanysty obektiler áli de zańsyzdyqqa barýda. 2021 jylǵy aqpanda sanıtarlyq-profılaktıkalyq jáne shekteý sharalarynyń talaptaryn buzǵany úshin jeke tulǵalarǵa qatysty ákimshilik is 1,7 ese (726-dan 1 282 adamǵa deıin) ósken.
