Jalpy otyrysta Májilis «Qazaqstan Respýblıkasynyń keıbir zańnamalyq aktilerine jer qatynastary máseleleri boıynsha ózgerister men tolyqtyrý engizý týraly» Memleket basshysynyń zań shyǵarý bastamasy tártibimen Parlamentke engizgen zań jobasyn jumysqa aldy.
Májilistegi Agrarlyq máseleler komıtetiniń tóraǵasy Erlan Barlybaev komıtettiń atalǵan zań jobasyn jumysqa alýǵa jáne ol boıynsha qorytyndy ázirleýge daıyn ekenin aıta kele, «Zań jobasyn qabyldaýdyń maqsaty – sheteldikterdiń, azamattyǵy joq adamdardyń, sheteldik zańdy tulǵalardyń, sheteldik qatysýy bar Qazaqstan Respýblıkasy zańdy tulǵalarynyń, halyqaralyq uıymdardyń, sondaı-aq halyqaralyq qatysýy bar ǵylymı ortalyqtardyń aýyl sharýashylyǵy maqsatyndaǵy jer ýchaskelerin jekemenshik quqyǵymen jáne ýaqytsha jer paıdalaný quqyǵymen ıelenýine tyıym salýdy engizý», dedi.
Otyrysta depýtattar «Kvazımemlekettik sektordyń jekelegen sýbektileriniń satyp alýy týraly» jáne «Qazaqstan Respýblıkasynyń keıbir zańnamalyq aktilerine kvazımemlekettik sektordyń jekelegen sýbektileriniń satyp alýy máseleleri boıynsha ózgerister men tolyqtyrýlar engizý týraly» ilespe zań jobasyn birinshi oqylymda maquldady.
Qujat boıynsha baıandama jasaǵan Qarjy mınıstri Erulan Jamaýbaev búginde kvazımemlekettik sektordyń satyp alýy ártúrli normatıvtik-quqyqtyq aktilermen rettelip kele jatqanyn habarlady.
Atap aıtar bolsaq, «Samuryq-Qazyna» qorynyń satyp alýy «Ulttyq ál-aýqat qory týraly» zańmen jáne qordyń dırektorlar keńesi bekitken satyp alý qaǵıdalarymen retteledi. Al «Samuryq-Qazyna» qorynyń quramyna kirmeıtin «Báıterek», «QazAgro», «Zerde» sııaqty ulttyq kompanııalardyń satyp alýy «Memlekettik múlik týraly» zańmen jáne Qarjy mınıstrligi bekitken satyp alý qaǵıdalarymen retteledi.
«Tegin medısınalyq kómektiń kepildik berilgen kólemi esebinen dárilik zattardy satyp alatyn medısınalyq uıymdardyń jáne Biryńǵaı dıstrıbıýter «SK-Farmasııa» JShS-nyń satyp alýy Densaýlyq saqtaý týraly kodekspen jáne dárilik zattardy satyp alý qaǵıdalarymen retteledi. Ázirlengen zań jobasy «Samuryq-Qazyna» qorynyń jáne ózge de ulttyq holdıngter men ulttyq kompanııalardyń satyp alýyn retteýdi usynady. Osylaısha zań jobasy satyp alýy shamamen 3,4 trln teńge somasyndaǵy 250-den asa ulttyq kompanııalardy olardyń enshiles uıymdarymen birge qamtıtyn bolady», dedi mınıstr.
Bul rette ortalyq jáne jergilikti atqarýshy organdardyń janyndaǵy memlekettik kásiporyndardyń, aksıonerlik qoǵamdar, jaýapkershiligi shekteýli seriktestikterdiń satyp alýyn «Memlekettik satyp alý týraly» zańnyń sheńberinde qaldyrý usynylyp otyr.
Vedomstvo basshysynyń aıtýynsha, zań jobasynda kelesi negizgi tásilder kózdelgen. Eń aldymen kvazımemlekettik sektor sýbektileri úshin biryńǵaı sanalatyn zańnyń qoldaný aıasyna, qaǵıdattarǵa, shekteýlerge, tásilderge, baqylaýǵa jáne shaǵymdanýǵa qatysty bazalyq erejeler zań deńgeıinde bekitiledi. Odan keıin satyp alý prosesin naqtylaıtyn normalardy erejeler deńgeıinde reglamentteý usynylady.
Mınıstr zań jobasynyń 18 baptan turatynyn aıta kele, ony qabyldaý kvazımemlekettik sektor sýbektileriniń satyp alýynyń ashyqtyǵyn, tıimdiligin arttyrýǵa jáne osy saladaǵy sybaılas jemqorlyq táýekelderin tómendetýge múmkindik beretinine nazar aýdardy.
Nurlan Nyǵmatýlın atalǵan zań jobasy elimizdiń ekonomıkasy úshin erekshe mańyzdy ekenin aıta kelip:
– Elbasy Nursultan Nazarbaevtyń bastamasymen «Samuryq-Qazyna» ulttyq qory qurylǵan kezde osyndaı kvazımemlekettik sýbektiler jumysynyń ashyq jáne tıimdi bolýyna basa nazar aýdarylǵan bolatyn. Memleket basshysy Qasym-Jomart Toqaev ta óziniń Qazaqstan halqyna Joldaýynda kvazımemlekettik satyp alý máselesine kóńil bólip, arnaıy zań daıyndaý týraly tapsyrma berdi. Osyǵan oraı kvazımemlekettik sektordyń ashyq jáne básekege qabiletin arttyratyn jańa zań jobasy ázirlendi. Bul zań jobasyna qatysty birqatar otyrys pen talqylaý ótkizilip, kóptegen túzetý engizildi, – dedi.
Májilis Tóraǵasynyń pikirinshe, endi osy saladaǵy barlyq satyp alý boıynsha baqylaý jasalady. Sonymen birge otandyq ónimderimizdi qoldaýǵa jol ashylady. Nurlan Nyǵmatýlınniń aıtýynsha, zań qabyldanǵannan keıin jaǵdaı ózgerýge tıis. О́ıtkeni onyń normalary «Samuryq-Qazyna» qorynyń, «Báıterek», «QazAgro» holdıngteriniń ǵana emes, sondaı-aq satyp alýdyń jalpy somasy jyl saıyn shamamen 3,5 trln teńgeni quraıtyn 253 ulttyq kompanııa men olardyń enshiles uıymdarynyń qyzmetin retteıtin bolady. Bul elimizdiń qazirgi ekonomıkalyq belsendiligi qalpyna kele bastaǵan ýaqytta erekshe mańyzdy.
Palata Spıkeri atap ótkendeı, kvazımemlekettik sektordaǵy satyp alýdyń ashyqtyǵy men tıimdiligin arttyratyn zań jobasy satyp alý úshin básekelik jaǵdaılar jasaýǵa, sondaı-aq otandyq óndirýshilerdi qoldaýǵa baǵyttalǵan. Sonymen qatar zań jobasy qazaqstandyq kásiporyndardyń óndiristik qýatyn barynsha arttyryp, jumys oryndaryn saqtap qana qoımaı, jańalaryn qurýǵa múmkindik beredi.
Zań jobasy kvazımemlekettik sektor, «Atameken» ulttyq kásipkerler palatasy, saraptama uıymdary jáne qoǵamdyq birlestikter ókilderiniń qatysýymen jan-jaqty talqylanyp, qaralǵanyn aıtyp ótken jón.
Sondaı-aq otyrys barysynda depýtattar «Qazaqstan Respýblıkasynyń keıbir zańnamalyq aktilerine advokattyq qyzmet jáne zań kómegi máseleleri boıynsha ózgerister men tolyqtyrýlar engizý týraly» zań jobasyna Senat engizgen túzetýlerdi qarady. Osyǵan sáıkes Májilis komıteti Kelisim komıssııasyn qurýdy usynyp, onyń quramyna Májilistiń Zańnama jáne sot-quqyqtyq reforma komıtetiniń depýtattary Snejanna Imasheva, Arman Qojahmetov jáne Artýr Platonovty qosty.
